Օպերայի և բալետի ազգային ակադեմիական թատրոն

Հայաստանում «մշակութային» խարդախությունները նոր երանգներ են ստանում

46
(Թարմացված է 21:15 20.10.2016)
Զանգվածային միջոցառումների կեղծ տոմսերը դարձել են խարդախների նոր թրենդը։ Նշանավոր դերասան Արմեն Ջիգարյանի իբր ստեղծագործական երեկոյի և Հայաստանի վաստակավոր արտիստ Վանուշ Խանամիրյանի հոբելյանի կեղծ տոմսերի կեղծումը մեծ արձագանք ստացավ հասարակության մեջ։

ԵՐԵՎԱՆ, 20 հոկտեմբերի — Sputnik. Կեղծ տոմսերը տարածվել են անհայտ անձանց կողմից։ Ինչպես հայտնի է դարձել Sputnik Արմենիային, հայկական պարի վարպետ Վանուշ Խանամիրյանի հիշատակի երեկոյի կեղծ տոմսերը ձեռք է բերել Լուսակերտի թռչնաֆաբրիկայի ղեկավարությունը։ Այդ խարդախությունից տուժածներից մեկը` Վազգենը, ասաց, որ անհայտ անձինք վաճառել են գոյություն չունեցող համերգի տոմսերը ֆաբրիկայի տնօրենին։ Նա էլ տարածել է աշխատողներին։

«Ֆաբրիկայի աշխատողներից մեկը` իմ լավ ծանոթը, ինձ երկու տոմս տվեց, քանի որ այդ օրը չէր կարող համերգ գնալ։ Արդյունքում տոմսերը մեզ հասան, և ես ու մայրս գնացինք Հակոբ Պարոնյանի անվան երաժշտական կոմեդիայի պետական թատրոն։ Եվ որքան զարմացանք, երբ իմացանք, որ ոչ մի համերգ չկա»,- ասաց Sputnik Արմենիայի զրուցակիցը։

Միջոցառումը պետք է կայանար սեպտեմբերի սկզբին։ Թատրոնի աշխատողները խորհուրդ տվեցին ապագայում ավելի ուշադիր լինել և ստուգել տոմսերի վրա կնիքի առկայությունը։

Նման իրավիճակում հայտնվել է ևս մի քանի մարդ, այդ թվում` ֆաբրիկայի աշխատակիցները։ Վազգենը պատմեց, որ այդ օրը թատրոնի մոտ հավաքվել էին «մշակութային» խարդախության մյուս զոհերը, որոնք պարզել են` բացի այն, որ նրանք գոյություն չունեցող համերգի տոմսեր ունեն, դրանք բոլորը նույն տեղի համար են։

Sputnik Արմենիայի թղթակիցը փորձեց կապվել Լուսակերտի թռչնաֆաբրիկայի հետ, սակայն լսափողում հնչեց անհույս «հեռախոսը միացված չէ կայանին»։ Ինչ վերաբերում է Ջիգարխանյանի ստեղծագործական երեկոյին, որը պետք է տեղի ունենար Սպենդիարյանի անվան օպերայի և բալետի ազգային ակադեմիական թատրոնում, ապա որոշ ԶԼՄ-ների տվյալներով` վաճառվել է շուրջ 100 տոմս։ Այդ համերգը նույնպես չէր կարող կայանալ, քանի որ մտացածին էր։

Մշակույթի նախարարությունը նախազգուշացրել է

Մշակույթի նախարարությունը հերթական անգամ նախազգուշացրել է այն մասին, թե ինչպես խուսափել համերգների և ներկայացումների տոմսերը կեղծող խարդախներից, այդ մասին գրված էր Facebook սոցիալական ցանցի նախարարության էջում։

«Հայաստանի մշակույթի նախարարության նախաձեռնած տոմսերի միասնական համակարգի ներդրումը լավագույն միջոցն է` բացառելու կամ կրճատելու կեղծ տոմսերի վաճառքի ռիսկերը»,- ասվում է գերատեսչության հայտարարությունում։

Նախարարությունում նաև նշել են, որ հիմա իրավապահ մարմիններն անհրաժեշտ միջոցներ են ձեռնարկում այն մարդկանց անձը հաստատելու համար, որոնք կեղծ տոմսեր են վաճառել։

Կատարվում է քննություն

Այս գործով ընթանում է քննություն, հարուցվել է քրեական գործ։ Հայաստանի քննչական կոմիտեն հետաքննում է Արմեն Ջիգարխանյանին և Վանուշ Խանամիրյանին նվիրված միջոցառումների կեղծ տոմսերի իրացման փաստը։

Սա Երևանում խարդախության առաջին դեպքը չէ։ 2015թ-ի հոկտեմբերի 8-ին դրա հետ բախվել են Եվրո-2016-ի շրջանակում Հայաստան-Ռումինիա հանդիպման երկրպագուները։ Խարդախները կեղծ տոմսեր են տպել և վաճառել սպորտի սիրահարներին։ Զոհերի շարքում եղել են արտասահմանցիներ, որոնք հատուկ ժամանել էին Հայաստան` խաղը դիտելու համար։ Տոմսերի արժեքը կազմել է 4000-10000 դրամ։

Հ. Գ. Անհասկանալի է, թե ինչ նպատակ ունեն խարդախները` գումար վաստակե՞լ, թե՞ բացասական զգացմունքներ առաջացնել հանրության շրջանում, որ նրանք այլևս ցանկություն չունենան այցելելու առանց այն էլ կիսադատարկ համերգասրահներ։ Ամեն դեպքում, Երևանի մշակութային կյանքը հարուստ է իրադարձություններով, բայց բոլորը չէ, որ ունեն ժամանակ և միջոցներ, որպեսզի շաբաթական թեկուզ մեկ անգամ այցելեն թատրոն։ Դա կրկնակի ցավալի է։

46