ԵՐԵՎԱՆ, 7 հոկտեմբեր — Sputnik. Երևանի քաղաքապետ Տարոն Մարգարյանը շնորհավորական ուղերձ է հղել գրադարանի օրվա առթիվ, որտեղ նշել է, որ գրի ու գրականության, գրքի նկատմամբ հայ ժողովրդի առանձնահատուկ սերն ու վերաբերմունքը գալիս է դարերի խորքից:
Նրա խոսքով` այսօր գրադարանավարներին է վստահված ոչ միայն այդ սերն ու վերաբերմունքը պահպանելու, այլև խորացնելու և հարստացնելով եկող սերունդներին փոխանցելու պատվաբեր, բայց և պատասխանատու առաքելությունը:
«Գիտության և տեխնիկայի զարգացման ժամանակակից պայմաններում, երբ համակարգիչը, բարձր տեխնոլոգիաները մտել են մեր կյանքի ու կենցաղի գրեթե բոլոր ոլորտներ, ձեր բարեխիղճ աշխատանքի շնորհիվ է գիրքը, ընթերցանությունը շարունակում մնալ մատաղ սերնդի կրթության, դաստիարակության ու համակողմանի զարգացման կարևոր բաղադրիչներից մեկը»,- նշել է Մարգարյանը:
Նա համոզված է, որ պահպանելով գրադարանային գործի լավագույն ավանդույթները, «ձեր նվիրված աշխատանքով, նաև արդյունավետորեն կիրառելով ժամանակակից տեխնոլոգիաները, ձեր անուրանալի ներդրումը կունենաք մատաղ սերնդի և, ընդհանրապես, մեր հասարակության կրթման ու զարգացման, նաև մեր երկրի արժանավոր քաղաքացիներ դաստիարակելու կարևոր գործում»:
Քաղաքապետը բարօրություն է մաղթել բոլորի ընտանիքներին և հաջողություններ՝ պատասխանատու և պատվաբեր գործում:
