ԵՐԵՎԱՆ, 29 սեպտեմբերի — Sputnik. Նախարար նշանակվելու մասին լուրն իմանալիս Արմեն Ամիրյանը առաջնահերթության կարգով օրիգինալ մոտեցում է ցուցաբերել կնոջ նկատմամբ։
«Դուռը զանգեցի, կինս բացեց, գրկախառնվեցի նրան և ականջին շշնջացի`սիրելիս, ես իմ ժամանակի մեծ մասը հատկացնելու եմ ուրիշին»,-ասաց Ամիրյանը։
Նկատելով, որ կինն այդ խոսքերից շփոթվել է, Ամիրյանն ավելացրել է.
«Շտապեցի հավելել` հանգստացիր. ես այդ ժամանակը նվիրելու եմ հայրենի մշակույթին և այն ծառայությանը, որին կոչված եմ»,- ժպիտով ավելացրեց նախարարը։
Այն հարցին, թե որ ոլորտներից է սկսելու փոփոխությունները, Ամիրյանը նախ պատասխանեց, որ պետք է նետվել խնդիրների մեջ ու շարժվել առաջ։
«Առաջնահերթ խնդիրը գրահրատարակչական ոլորտի ամբողջական ցիկլն է, որը պետք է վերանայել` սկսելով նոր տիպի գրախանութների ստեղծումից, որոնք կդառնան ընտանեկան հանգստի կենտրոններ։ Այս փորձը պետք է տեղայնացնել ամբողջ հանրապետությունով մեկ»։
Sputnik Արմենիայի այն դիտարկմանը, որ երիտասարդները գրքերի թվայնացված տարբերակների կարիքն են զգում, Ամիրյանը պատասխանեց, որ այդ հարցը ևս օրակարգում է։
«Ամբողջ աշխարհն արդեն օգտագործում է թվային գրքեր, բայց Հայաստանում, ցավոք սրտի, այդ պակասը կա։ Իմ նախաձեռնությունը կներառի նաև այդ ճյուղը»,-ավելացրեց նա։
Նա լրագրողներին խնդրեց հնարավորինս շատ լուսաբանել խնդիրները` հանրության ձայնն իրեն լսելի դարձնելու համար։
