Արսենն ու Մարիամը

«Արնաքամ էի լինում. տաք օր էր, բայց ահավոր մրսում էի»․ աչքը կորցրած զինվորն ամուսնանում է

1966
(Թարմացված է 15:41 21.02.2021)
Արցախյան 44–օրյա պատերազմն Արսենի համար ընդամենը 1 օր տևեց, շատ բան տեսնել ու անել չհասցրեց ծանր վիրավորման պատճառով։ Բայց հասցրեց այդ մռայլ օրերին մեզ լավի հույս ներշնչել՝ հենց հիվանդանոցում սիրած աղջկան ամուսնության առաջարկություն անելով։

Պատերազմը նոր էր սկսվել. ամեն օր նոր անուններով երկարող զոհերի ցուցակ, անորոշություն, ցավ, խավար… Հանկարծ թունելի վերջում երևացող լույսի նման ու լույսի արագությամբ համացանցում տարածվեց մի տեսանյութ. պատերազմում ծանր վիրավորում ստացած, մի աչքը կորցրած տղան հենց հիվանդանոցում ամուսնության առաջարկություն է անում սիրած աղջկան: Պատերազմից հետո կյանք կա․․․

-Ոչ մի վայրկյան չեմ կասկածել Մարիամի վրա, չեմ մտածել, որ կարող է՝ մեր միջև ինչ-որ բան փոխվի, որովհետև աչքս հեռացրել են։

-Այս ամենից հետո ավելի շատ էի ձգտում, որ միշտ Արսենի կողքին լինեմ…

Արսենը

Արսենի 23-ը հունվարին լրացավ․ այս 23 տարիների ընթացքում շատ փորձությունների միջով է անցել, բայց ոչ թե կոտրվել, այլ ավելի ուժեղ է դարձել, չարանալու փոխարեն՝ ավելի ազնվացել․․․․ Արսեն Ավետիսյանի ու նրա երկվորյակ եղբոր կյանքը հեշտ չի եղել: 8 տարեկանում կորցրել են մորն ու մնացել մոր ընկերոջ խնամակալության տակ:

Арсен Аветисян в свадебном салоне
© Sputnik / Asatur Yesayants
Արսեն Ավետիսյան

«Ես միայն վերջերս զարմանքով իմացա, որ Օնիկ ձյաձյան Արսենի հայրը չէ, Արսենն էլ ինձ միշտ ասում է՝ իմացիր` պապա ես ասելու»,- պատմում է Մարիամը:

«Ինքը մեզ համար մայր է եղել, հայր, քույր, եղբայր, ընկեր…»,- ավելացնում է Արսենը։

Արսենն աշխատանքի սովոր տղա է․ Ֆիզկուլտ ինստիտուտում սովորելուն զուգահեռ Վերնիսաժում առևտրով էր զբաղվում, երբ հանդիպեց Մարիամին:

Արսենն ու Մարիամը

Վայոցձորցի Մարիամին մի անգամ պատահաբար տեսավ փողոցում ու սիրտը կպավ: Սկսեցին հանդիպել, հարաբերությունները լրջացան։ Արսենը պատասխանատու տղա է, ուստի միանգամից սկսեց վաղվա օրվա մասին մտածել: Ընտանիք ստեղծելուց առաջ ամենակարևոր հարցը տուն ունենալն է: Իմացավ, որ ՊՆ ծառայողների համար հիփոթեքային պայմանները բավականին հարմար են: Հանուն սիրո, հանուն Մարիամի ու հանուն իր երազած ընտանիքի` որոշեց պայմանագրային ծառայության անցնել:

«Ասում էի՝ գոնե քաղաքի մեջ ծառայի, ասաց՝ չէ, տան տղամարդը ես եմ, տենց եմ որոշել»,- կատակում է Մարիամն ու անկեղծանում՝ սիրում է, երբ տղամարդն ամուր, անսասան խոսք ունի։

Арсен Аветисян на боевом дежурстве
© Photo : provided by Arsen Avetisyan
Արսեն Ավետիսյան

«Կարող էի այլ տեղ ընտրել, ասֆալտի վրա ծառայել, բայց շատ եմ սիրում Քարվաճառը, հիմա էլ եմ պատրաստ գնալ, շարունակել ծառայությունս էնտեղ։ Ախր ոչ մի միլիմետր չտվեցինք, պահեցինք...»։

Արսենի տեսած պատերազմը

Արսենի կռիվը 1 օր տևեց․․․ Ծանր վիրավորում ստացավ հենց սեպտեմբերի 27-ին։ Հիշում է այդ մեկ օրվա դժոխային ամեն րոպեն, իր հետ դիրքում եղած բոլոր 20 տղաներին, որոնցից քչերը ողջ մնացին։

«7:20 էր, տղերքից մեկը եկավ, ասաց՝ բեսպիլոտնիկները եկել են։ Մեր պոստը գծի ամենավերջինն էր, Օմարից հետո ամենաբարձրը մերն էր, մի 200 մետրի վրա ադրբեջանցիները պոստ ունեին, դրանից հետո Գյանջան էր: Դիրքի ամենափոքրը ես էի․ մենակ բուշլաթս հագա՝ ոչ բռոնիկ, ոչ մի բան, առաջին ձեռիս տակ ընկած կասկան վերցրի, սնայպերս, մագազին խփեցի վրեն, ուղիղ պոստ: Հավաքվանք պոստում ու սկսվավ մինամյոտով․․․»,-իրադարձությունների ընթացքը ներկայացնում է Արսենը։

Ասում է՝ երկնքում այնքան ԱԹՍ կար, որ թվում էր՝ կողքիդ են։ Իր տեղեկություններով՝ առաջին օրը ադրբեջանական կողմը միանգամից 1000 ԱԹՍ է կիրառել։ Անդադար դիրքի ուղղությամբ աշխատող հրետանին ամեն ինչ հողին էր հավասարեցրել։

Арсен Аветисян на боевом дежурстве
© Photo : provided by Arsen Avetisyan
Արսեն Ավետիսյան

«Պոստ չկար էլ, սնայպերիս յաչեյկեն մնացել էր, ես ու վարդենիսցի Գևորը մտնում ենք, մի հոգու ինքը խփեց, հետո 2 հոգու ես, 5 վայրկյան հետո սնարյադն ուղիղ իմ յաչեյկի վրա ա ընկնում, բախտներս բերեց, փլվեց, մնացինք տակը, իրար օգնելով՝ դուրս եկանք»։

Հաջորդ հարվածից արդեն ինքն է վիրավորվել․ երկաթի բեկորը մտել է աչքի մեջ, իսկ հարվածի ալիքը նրան մի կողմ է շպրտել։ Ընկերները մի կերպ թաքստոց են հասցրել վիրավոր Արսենին։

«Գրանատ ուզեցի․ որ մտնեին պոստ, մի հատը կքաշեի, կգցեի դուրս, մեկն էլ կքաշեի, կպահեի մոտս: 3-4 ժամ էդտեղ մնացի, արնաքամ էի լինում։ Հետո թալինցի Հովոն եկավ (իրա հալալ ախպերը մահացավ էդ պոստում), ինքն ինձ իջացրեց էդ պոստից: Շատ արյուն էի կորցրել, ահավոր մրսում էի՝ չնայած դրսում շատ տաք էր»։

Արսենին տեղափոխել են Վարդենիս, առաջին բուժօգնությունից հետո էլ Երևան՝ «Աստղիկ» ԲԿ։ Հետո պետք է իմանար՝ իրեն տեղափոխելուց հետո ադրբեջանցիները գրավել են իրենց դիրքը, թեև` ժամանակավոր։

Հիվանդանոցն ու մատանին

Արդեն հիվանդանոցում Արսենն իմանում է, որ իր փրկվելը հրաշք էր․ բեկորը կանգ էր առել ուղեղից մոտ 1մմ հեռավորության վրա։ Արթնանալուց ժամեր անց տեսնում է Մարիամին։

«Ես առավոտյան 9-ից դռների մոտ էի, միայն 12-ին ներս թողեցին»,- ասում է Մարիամը։

Հենց այդ ժամանակ էլ Արսենը որոշում է՝ կյանքում ոչ մի րոպե պետք չէ կորցնել, այն միշտ կարող է վերջինը լինել։ Աստծո հրաշքով փրկվել է, էլ չի սպասելու, հենց այստեղ էլ սիրած աղջկան ամուսնության առաջարկություն է անելու։

Арсен Аветисян с невестой Мариам Кочарян после операции
© Photo : provided by Arsen Avetisyan
Արսենն ու Մարիամը

«Հոկտեմբերի 2-ն էր, զանգեցի ախպորս, ասացի՝ աշխատավարձս նստել է, քարտիցս փողը հան ու գնա մատանի առնելու։ Շուտ վերցրու ու բեր»։

Մինչ բժիշկներն Արսենի աչքին իմպլանտ էին տեղադրում, նա բժշկուհիներին, բուժքույրերին ցույց էր տալիս եղբոր ուղարկած մատանիների լուսանկարները։

Մինչև վերջին վայրկյանը հարցնում էր՝ կապրե՞մ, բժիշկ. պատմում է ռազմական բժիշկը

«Ասացի՝ դուք աղջիկ եք, ձեր ճաշակն ավելի լավը կլինի։ Որ մատանին ընտրեցին, հենց էդ նկարն էլ հետ ուղարկեցի ախպորս ու ասեցի՝ սա»։

Մինչ Արսենի երկվորյակ եղբայրը հիվանդանոց կհասներ, բուժանձնակազմը հասցրել էր տորթ գնել ու օպերատոր գտնել սպասվելիք իրադարձությունը նկարահանելու համար։

Арсен Аветисян с невестой Мариам Кочарян после операции
© Photo : provided by Arsen Avetisyan
Արսենն ու Մարիամը

Ու հենց հիվանդանոցի ընդունարանում էլ Արսենն իր կյանքի ամենակարևոր հարցը տվեց Մարիամին` կամուսնանա՞ս ինձ հետ․․․

Երազանքի հարսանիք

Այս հուզիչ տեսանյութը համացանցում հայտնվելուն պես «Սեմիլլա» հարսանյաց սրահի տնօրեն Տաթև Մելքոնյանը շտապել է գտնել զույգին։

«Մարիամն ասաց՝ մենք հարսանիք չենք անելու, ասացի՝ ո՞նց թե հարսանիք չեք անելու»,- ասել է Տաթևն ու կապ հաստատել ոլորտի տարբեր ներկայացուցիչների հետ։ Բոլորն էլ, լսելով պատմությունը, անմիջապես համաձայնել են հարսանիքի իրենց վերաբերող հատվածը նվեր անել զույգին։ Արդյունքում ռեստորան, մեքենաների վարձակալություն, պար, 4 թամադա, ֆոտո-վիդեոնկարահանում, կենդանի երաժշտություն ու շատ ավելին նվեր կլինի։ Տաթևն ասում է՝ անգամ էստրադայի աստղեր են ելույթ ունենալու, բայց փակագծերը չի բացում, անակնկալ է։

«Էդ տխուր օրերին առաջին զույգն էր, խավարի մեջ լույսն էր»,- նշում է Տաթևը։

Арсен Аветисян с невестой Мариам Кочарян после операции
© Photo : provided by Arsen Avetisyan
Արսենն ու Մարիամը

Ապրիլի 5-ին կայանալու է Արսենի ու Մարիամի 350-400 հոգանոց շքեղ հարսանիքը․ ներկա են լինելու հիվանդանոցի բուժանձնակազմը, իր հետ բուժվող զինվորները և շատ ուրիշներ։

  • Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    © Sputnik / Asatur Yesayants
  • Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    © Sputnik / Asatur Yesayants
  • Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել
    © Sputnik / Asatur Yesayants
1 / 3
© Sputnik / Asatur Yesayants
Հարսանյաց սրահի տնօրեն Տաթև Մելքոնյանն օգնում է Մարիամին հարսի զգեստ ընտրել

«Մեր կողմից միայն հարսն ու փեսան են, մեկ էլ մատանիները»,- ասում է Արսենը։

Վերջաբանի փոխարեն

Չնայած ամբողջ ցավին, կորուստներին՝ Արսենը զինվորական ծառայությունից հիասթափված չէ։

«Մեծ պատիվ է էդ ֆորման հագնելը, չգիտեմ, թե էդ բառը ոնց ասեմ, բայց պոստ պահելը տղավարի է՝ ուժեղ, ձիգ տղու տեղ է։ Եթե էս կռիվը մենակ Ադրբեջանի հետ լիներ, հիմա մենք մենակ մեր պոստի սաստավով մտել էինք Բաքու, իրենք կռվել չգիտեն․․․»։

Միայն չի կարողանում հաշտվել տղաների կորստի հետ… Ասում է՝ զոհված, գերեվարված, հաշմանդամություն ձեռքբերած տղաներից շատ-շատերին չի էլ ճանաչել, բայց համարում է՝ բոլորն էլ իր ընկերն են, իր «ախպերն են»։

«Աստված չանի` էլի պատերազմ սկսվի, էլի գնալու եմ, որ չկարողանամ էլ կռվել, զենք օգտագործել, գոնե պատրոն կլիցքավորեմ, կտամ տղերքին, արյան գնով էլ լինի, պետք է պահես հողդ»։

Արսենը Հայաստանից հեռու կյանքը չի էլ պատկերացնում, ասում է՝ անգամ եթե դղյակ էլ նվեր ստանա, այս հողում իր եղբայրների արյունն է։

Որոշել է՝ 3 որդի է ունենալու, աղջիկներ էլ են պետք, բայց 3 տղան պարտադիր է, մեր ազգը պետք է ուժեղանա այս հարցին վերջնական լուծում տալու համար։

Տաք ոտքերով, սառը գլխով․ ինչպես մայրական օրհնանքները գուլպայի միջոցով սահման հասան

1966
թեգերը:
Արսեն Ավետիսյան, Արցախ, Պատերազմ, Վիրավոր, Զինվոր
Ըստ թեմայի
Հարսանիք լեռներում՝ ամպերից վեր. Խուստուփի հայտնի զույգի պատմությունը
Պատերազմից հետո սեր կա. արցախցի Հայկազի ու Ռուզանի հարսանիքը` ժամանակավոր կացարանում
Շատ էին իրար սիրում... Արցախում զոհված Վահեի և վթարից մահացած Շուշանի կյանքի պատմությունը
Դոնալդ Թրամփի կողմնակիցները Կոնգրեսի շենքի մոտ. 7 դեկտեմբերի, 2021

Ովքե՞ր և ինչո՞ւ էին սպասում Թրամփի վերադարձին մարտի 4-ին

91
(Թարմացված է 21:41 05.03.2021)
Եկեք անկեղծ լինենք։ Ամերիկացիները լավ պրծան։ Ինչո՞ւ։ Որովհետև այդ երկրի իրավապահ մարմինները տեղեկություններ ունեին, որ մարտի 4-ին ծայրահեղականները կրկին հարձակվելու էին Կապիտոլիումի, այսինքն՝ իրենց պառլամենտի շենքի վրա։

Դոնալդ Թրամփը, որի վերադարձին սպասում էին մարտի 4-ին, այդպես էլ չվերադարձավ

Կոնգրեսի ստորին պալատի անդամները նույնիսկ որոշեցին անվտանգության նկատառումներով չեղյալ հայտարարել հինգշաբթի օրվա իրենց նիստը։ Ինչպես հայերն են ասում՝ շառից հեռու։ Բայց սենատորներն այնուամենայնիվ տղամարդ գտնվեցին և նիստ արեցին, չնայած լրիվ իրավունք ունեին ձեռնպահ մնալու, հիշելով հունվարի 6-ի դեպքերը, երբ Կապիտոլիումի վրա հարձակում ձեռնարկվեց։ Երևի հիշում եք՝ այն ժամանակ զոհվեց 5 մարդ, դեմոկրատները պնդեցին, թե հենց նոյեմբերյան ընտրություններում պարտված Դոնալդ Թրամփն է սադրել մարդկանց և դրդել նրանց հարձակվել խորհրդարանի վրա։ Կոնգրեսում իմպիչմենտ նախաձեռնվեց, այն էլ աննախադեպ իմպիչմենտ, որովհետև մինչ այդ Ամերիկայի որևէ նախագահի նկատմամբ երկրորդ անգամ պաշտոնազրկելու գործընթաց չէր նախաձեռնվել, բայց Սենատը արդարացրեց Դոնալդ Թրամփին։

​Կարող եմ ենթադրել, որ հիմա ձեզ մոտ հաստատ բնական հարց է ծագել՝ բայց ինչու էր Կոնգրեսի վրա երկրորդ հարձակումը սպասվում հենց մարտի 4-ին։ Ուղղակի մինչև 1933 թվականը Ամերիկայի բոլոր նախագահների պաշտոնադրման արարողությունը միշտ տեղի էր ունենում նույն օրը՝ մարտի 4-ին։ Բայց մոտ 90 տարի առաջ ընդունվեց ԱՄՆ-ի Սահմանադրության 20-րդ ուղղումը, որով այդ արարողության ամսաթիվը փոխվեց, և այժմ, ինչպես գիտեք, ամերիկացի նախագահները երդում են տալիս հունվարին։ Բայց կա Ամերիկայում առնվազն մի շատ տարօրինակ կազմակերպություն, որը շատ է նման աղանդի, և դրա հետևորդները չգիտես ինչու, հավատում են, թե Թրամփը կարող էր «օրինական հիմքերով» վերադառնալ Սպիտակ տուն հենց մարտի 4-ին ու կդառնար Ամերիկայի 19-րդ նախագահը Ուլիս Գրանտից հետո, որը պաշտոնավարել է 1869-ից մինչև 1877 թվականը։

Ուզում ես զարգանալ՝ գնահատիր անցյալդ

Ինչո՞ւ են «Քենոն» կոչվող կազմակերպության կամ աղանդի անդամները Ամերիկայի պատմությունից դուրս թողնում մի հսկա հատված և համարում, որ 1871 թվականից հետո ընդունված բոլոր օրենքները որևէ իրավական ուժ չունեն։ Ուղղակի այդ թվականին Ամերիկայի իշխանությունները կազմավորեցին, այսպես կոչված, Կոլումբիայի շրջանը, որտեղ, ինչպես հայտնի է, գտնվում է ԱՄՆ-ի մայրաքաղաք Վաշինգտոնը։ «Քենոնի» անդամները համոզված են, որ նման իրավասություն կառավարությունը չուներ այն պարզ պատճառով, որ երկիրը կազմված է նահանգներից, հենց այդպես էլ կոչվում է Միացյալ նահանգներ, այլ ոչ թե նահանգներ և շրջան։ 

​Ավելին, ծայրահեղականները համոզված են, որ չպիտի լինեն դաշնային, այսինքն բոլոր բնակիչների համար պարտադիր օրենքներ, քաղաքացին չպետք է հարկեր մուծի՝ սա, իհարկե, որոշ հայաստանցիների սրտով է, և վերջապես ազգային տարադրամ՝ դոլար, չպիտի գոյություն ունենա, քանզի այդ դոլարը սահմանափակում է մարդկանց անձնական իրավունքները։ Այ սա հազիվ թե դուր գա հայաստանցիներին, որոնք թե դոլարով փող են ստանում արտերկրից, թե իրենց կուտակումներն են առաջվա պես դոլարով պահում, չնայած մեր հարազատ դրամը, կարծես թե, վաղուց է ապացուցել իր կենսունակությունը։

Չգիտեմ՝ արդյո՞ք Վաշինգտոնում իրավապահները ժողովրդից անթաքույց պաշտպանում էին իրենց հարազատ պատգամավորներին լուսաձայնային սարքերով, ինչպես մեր Ազգային ժողովի բակում՝ Բաղրամյան պողոտայում ընդդիմության վերջին հանրահավաքի ժամանակ, բայց փաստն այն է, որ Կապիտոլիումի վրա հունվարյան հարձակումից հետո, ինչպես տեղեկացնում է ԲիԲիՍի-ն, աշխատանքից ազատվել է ամերիկյան պառլամենտի պահպանության գլխավոր պատասխանատուն։

​Եվ վերջում այն մասին, թե արդյոք ոմանք իրոք ցանկանում էին, որ Թրամփը հետ գա և կարգ ու կանոն հաստատի Ամերիկայում, և ինչու չստացվեց։ Այն, որ ուզում էին՝ նույնիսկ Ամերիկայի Հետաքննությունների դաշնային բյուրոն և Ներքին անվտանգության նախարարությունն են հաստատում։ Նրանց տվյալներով, դեռ այս տարվա փետրվարին ծայրահեղականները Կապիտոլիումի վրա հարձակվելու ծրագրեր էին կազմում և մտադիր էին 4 հազար ամերիկացի հավաքել մարտի 4-ին Կոնգրեսի շենքի մոտ։

Դժվար է ասել, թե ինչը խանգարեց՝ միգուցե լավ չէին մշակել ծրագրերը, միգուցե Դոնալդ Թրամփը, այնուամենայնիվ, այդքան մեծ հեղինակություն չի վայելում։ Սակայն վարկածներից մեկն էլ սա է՝ մարդիկ չուզեցին դիպուկահարների զոհ դառնալ։ Իհարկե, եթե այդ դիպուկահարները կային։

91
թեգերը:
իմպիչմենտ, Դոնալդ Թրամփ, ԱՄՆ
թեմա:
5 րոպե Դուլյանի հետ
Ըստ թեմայի
«Հանրահավաքային թվաբանության» խնդիրը Հայաստանում, կամ նման վեճեր լինում են նաև ԱՄՆ–ում
Ֆուտբոլային վրեժ, կամ կո՞ղմ եք, որ կինը բաժանվելիս կլորիկ գումար ստանա
Ատելի և սիրելի դիմակը, որը մեկին հոգեկան հանգստություն է բերում, մյուսին՝ անհանգստություն
Օնիկ Գասպարյան, Նիկոլ Փաշինյան. արխիվային լուսանկար

Փաշինյան vs Գլխավոր շտաբ, կամ ինչ է պակասում ընդդիմությանը հաջողության հասնելու համար

388
(Թարմացված է 11:48 05.03.2021)
Զինվորականները սպասում են Սահմանադրական դատարանի որոշմանը, ընդդիմությունն էլ իր հերթին հույս ունի իր օգտին ծառայեցնել գործադիր իշխանության և գեներալիտետի հակամարտության ալիքը։

ԵՐԵՎԱՆ, 4 մարտի — Sputnik. Գլխավոր շտաբի շուրջ իրավիճակը շարունակում է անորոշ մնալ։ Դժվար է կանխատեսել, թե ինչով կավարտվի կառավարության և ռազմական վերնախավի միջև փետրվարի 25-ին սկսված առճակատումը։ ՀՀ վարչապետ Նիկոլ Փաշինյանը չի ցանկանում հրաժարվել Գլխավոր շտաբի պետ Օնիկ Գասպարյանին պաշտոնանկ անելու գաղափարից, վերջինս էլ իր հերթին սպասում է Սահմանադրական դատարանի որոշմանը։

ՍԴ-ն պետք է քննի «Զինվորական ծառայության և զինծառայողի կարգավիճակի մասին» օրենքը, հենց այդ օրենքն է հնարավորություն տալիս վարչապետին «ազատվել» Գասպարյանից։ Եվ եթե ՍԴ-ն հակասահմանադրական ճանաչի այդ նորմատիվային ակտը, ապա Գասպարյանին պաշտոնանկ անելու մասին նախագահին ուղղված միջնորդությունը անվավեր կճանաչվի։

Իսկ մինչ այդ, ըստ օրենքի, Գասպարյանը մինչև մարտի 8-ը շարունակում է կատարել իր պարտականությունները որպես Գլխավոր շտաբի պետ։

Խորհրդարանի դիմաց վրանային ճամբար խփած և անժամկետ բողոքի ակցիաների անցած ընդդիմությունը հույս ունի, որ Փաշինյանի ու գեներալիտետի դիմակայության ալիքի վրա կկարողանա վճռական հարված հասցնել իշխանությանը: Փորձագետները թերահավատորեն են վերաբերվում ինչպես գեներալների, այնպես էլ Հայրենիքի փրկության շարժման հնարավորություններին։

Կովկասի ինստիտուտի փորձագետ Հրանտ Միքայելյանի խոսքով՝ եթե կառավարության ու Փաշինյանի նպատակները հասկանալի են՝ իշխանության պահպանում և ուժայինների նկատմամբ վերահսկողություն, ապա նույնն ասել չի կարելի ընդդիմության մասին:

«Հայրենիքի փրկության շարժման գլոբալ խնդիրը հասկանալի է՝ իշխանափոխություն և անցումային կառավարության ձևավորում։ Բայց ընդդիմության առանձին ուժերի մարտավարությունն ու ռազմավարությունն այնքան էլ պարզ չեն։ Նրանք հրապարակավ այդ նպատակների մասին չեն խոսում, և դրանից կասկածներ են ծնվում, որ նպատակներ պարզապես չկան», — Sputnik Արմենիային տված հարցազրույցում ասաց Միքայելյանը։

Մեր զրուցակիցն ասում է նաև, որ հստակ օրակարգի բացակայությունը բարդացնում է որևէ միջնաժամկետ կանխատեսում անելը։  

Ինչ վերաբերում է գեներալներին, ապա, փորձագետի կարծիքով, զինվորականները տեսականորեն կարող են դժգոհության խոսքերից անցնել պրակտիկ գործողությունների, ինչպես այսօր մամուլի ասուլիսի ժամանակ փաստացի կոչ արեց ՀՀ երկրորդ նախագահ Ռոբերտ Քոչարյանը, որը պաշտպանում է ընդդիմադիրներին: Վերջինս, մասնավորապես, հայտարարեց, որ գեներալներն իրենց չափազանց զուսպ են պահում։

Սակայն Միքայելյանի կարծիքով` գեներալների «ավելի ակտիվ վարվելու» հնարավորություններն այնքան էլ մեծ չեն, որքան թվում է շատերին։

Ովքեր են ԳՇ պետի հավանական թեկնածուները. ընտրությունն այնքան էլ հեշտ չէ. «Փաստ»

«Առանցքային հարցն այն է, թե ինչ պետք է անի բանակը կառավարության տապալումից հետո, և արդյո՞ք բանակը հետագա իրավիճակի տեսլականն ունի։ Այս պահին կարելի է պնդել, որ նման տեսլական չկա։ Բանակն իր անհամաձայնությունն է հայտնել տեղի ունեցող գործընթացներին՝ սահմանափակվելով բանավոր հայտարարությամբ։ Հասկանալի չէ՝ արդյոք այլընտրանքային նա ծրագիր ունի», — ավելացրեց Միքայելյանը։

Ի տարբերություն գեներալների և նրանց սատարող ընդդիմության՝ վարչապետը շատ ավելի արդյունավետ է օգտագործում իր ներքաղաքական գործիքները, նա ավելի մոտիվացված է։

Քաղտեխնոլոգ Արմեն Բադալյանի կարծիքով ևս ընդդիմության շարքերում ոչ այնքան հուսադրող իրավիճակ է։ Sputnik Արմենիայի հետ զրույցում փորձագետը նշեց, որ Հայրենիքի փրկության շարժումը որևէ արդյունավետ միջոց չի ձեռնարկում՝ սահմանափակվելով միայն Բաղրամյան պողոտայում տեղի ունեցող հանրահավաքներով։ Եվ նույնիսկ վարչապետի միասնական թեկնածու Վազգեն Մանուկյանի դեմ հարուցված քրեական գործը, որը Բադալյանը քաղաքական է համարում, ընդդիմությանը զսպելու առումով հազիվ թե իմաստ ուներ։

«Իշխանությունները կարիք չունեն ինչ-որ կերպ զսպել ընդդիմությանը` դրա առաջնորդ Վազգեն Մանուկյանի դեմ քրեական գործ հարուցելով. ընդդիմությունն ինքն իրեն այնքան լավ է զսպում, որ իշխանության զսպելու անհրաժեշտություն բոլորովին չի զգացվում», – ասաց Բադալյանը:

Նրա խոսքով՝ վարչապետը մինչև վերջ փորձելու է պահել իշխանությունը։ Ավելին, եթե Փաշինյանին հաջողվի համաձայնության գալ ընդդիմադիր խմբակցությունների ՝ «Բարգավաճ Հայաստանի» և «Լուսավոր Հայաստանի» հետ արտահերթ ընտրությունների վերաբերյալ, չի բացառվում, որ քաղաքական իրավիճակի կայունացումից հետո ընտրությունների թեման կրկին հետաձգվի։

Նախագահը ՍԴ չուղարկեց ԳՇ պետին ազատելու փաստաթուղթը, բայց դեռ կարող է միջամտել

«Վարչապետը մի անգամ արդեն խոսել է արտահերթ ընտրությունների մասին, հետո, ինչպես պարզվեց, դրանց կարիքը չկա։ Հիմա էլ երաշխիքներ չկան, որ կառավարության ղեկավարը, երկու խմբակցությունների հետ հուշագիր ստորագրելով, հետագայում չի մտափոխվի։ Ընտրությունները հետաձգելու պատրվակներ միշտ էլ կգտնվեն, պետք է օրենք ընդունել կուսակցությունների մասին, ապա Վենետիկի հանձնաժողովը պետք է հավանություն տա Ընտրական օրենսգրքի անխուսափելի փոփոխություններին», — ասում է մեր զրուցակիցը։

Հիշեցնենք՝ մարտի 1-ին Փաշինյանն իր հանրահավաքում հայտարարել էր, որ պատրաստ է քննարկել արտահերթ ընտրությունների տարբերակը, սակայն ԶՈւ գլխավոր շտաբի պետը պետք է հեռանա։ «Լուսավոր Հայաստանի» առաջնորդ Էդմոն Մարուքյանն առաջարկեց Օնիկ Գասպարյանին հանգիստ թողնել և ընդդիմության հետ արտահերթ ընտրությունների վերաբերյալ հուշագիր ստորագրել։ Փաշինյանն այդ առաջարկը մասամբ ընդունեց։

388
թեգերը:
Ընտրություններ, Իշխանություն, ընդդիմություն, Վազգեն Մանուկյան, Նիկոլ Փաշինյան, Հայրենիքի փրկության շարժում, Բանակ, Օնիկ Գասպարյան, Հայաստան
Ըստ թեմայի
Փողոցի ընդդիմությունը «պադստավկա» արեց ԳՇ-ին ու օգնեց Փաշինյանին․ Մարուքյան
Ավտոբուսներ եղել են, վարչական ռեսուրս` ոչ. Սիմոնյանը`մարդկանց հանրահավաքի բերելու մասին
Ոնց որ անեծք կա. Մարուքյանը կողմ է կիսանախագահականին, դեմ` հանրաքվեին

«Ուզում են գլխատել ԶՈւ–ն». ակցիայի մասնակիցները գնացին նախագահական

0
(Թարմացված է 14:49 06.03.2021)
ՊՆ–ի մոտ հավաքվածները նշեցին, որ իշխանությունը ձեռնոց է նետում ԶՈւ–ին։ Նրանք որոշել են ՀՀ նախագահից պահանջել կատարել իր սահմանադրական պարտականությունները։

ՀՀ պաշտպանության նախարարության մոտ ի պաշտպանություն ԶՈւ գլխավոր շտաբի պետ Օնիկ Գասպարյանի կազմակերպված ակցիայի մասնակիցներն ավտոերթով շարժվեցին դեպի Բաղրամյան 26` նախագահի նստավայր։

Եթե նախագահը հրաժարվի ընդունել նրանց, ապա Արմեն Սարգսյանի կեցավայր կգնան` նրանից պահանջելու կատարել իր սահմանադրական պարտականությունները։

«Առաջարկում եմ` դիմենք ՀՀ նախագահին ու պահանջենք, որ Օնիկ Գասպարյանին աշխատանքից ազատելու վարչապետի որոշումն ուղարկի ՍԴ։ Բացի այդ, առաջարկում եմ Բաղրամյան պողոտայում բողոքի ակցիա անողներին միանալ»,–ասաց պահեստազորի գեներալ–մայոր Հենրիկ Մուրադյանը։

Նա նշեց, որ այսօր ձեռնոց է նետված ՀՀ զինված ուժերին և քայլ առ քայլ փորձում են քանդել ԶՈւ–ն։

Պահեստազորի գնդապետ Հայկ Նահապետյանն իր հերթին ասաց, որ չնայած հիմա հակառակորդի համար առաջնային թիրախը Սյունիքն է, սակայն դրանով չեն բավարարվելու` անցնելու են Տավուշին, Վարդենիսին և Եղեգնաձորին։

«Օրվա իշխանությունն ուզում է գլխատել զինված ուժերին։ Մենք մարդիկ ենք, որ ընկերներ ենք կորցրել, հաղթանակ կերտել, ինչը հիմա փորձում են խլել մեզնից։ Մենք դա թույլ չենք տալու։ Օրվա իշխանությունները պետք է օր առաջ հեռանան»,–ասաց Նահապետյանը։

Նշենք, որ ՀՀ պաշտպանության նախարարության մոտ անցկացվող ակցիան` ի պաշտպանություն ԶՈւ գլխավոր շտաբի պետ Օնիկ Գասպարյանի, սկսվեց տերունական աղոթքով։

ՊՆ–ի մոտ էին հավաքվել ոչ միայն զինվորականներ, այլ նաև հոգևորականներ, տարբեր ոլորտների ներկայացուցիչներ և շարքային քաղաքացիներ։

Մինչև ելույթները սկսվելը մեկ րոպե լռությամբ հարգեցին արցախյան 44–օրյա պատերազմի զոհերի հիշատակը։

Հիշեցնենք` ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։

Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։

Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։

Գլխավոր շտաբը մարտի 1-ին նոր հայտարարություն տարածեց նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։

Մարտի 2-ին հայտնի դարձավ, որ նախագահը չի ստորագրել Օնիկ Գասպարյանին ԳՇ պետի պաշտոնից ազատելու հրամանագիրը, բայց ՍԴ դիմելու է ոչ թե Նիկոլ Փաշինյանի ներկայացրած հրամանագրի նախագծի սահմանադրականության հարցը պարզելու համար, այլ «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով:

0
թեգերը:
Օնիկ Գասպարյան, Բողոքի ակցիա, ՀՀ Պաշտպանության նախարարություն (ՊՆ)
Ըստ թեմայի
«Բանակի փեշերից են կախվել». Քոչարյանն ասաց` ինչպես է լուծվելու Օնիկ Գասպարյանի հարցը
Սերժ Սարգսյանը պատասխանել է հարցին՝ արդյոք Օնիկ Գասպարյանն իր դրդմամբ է գործում
«Օնիկ Գասպարյանն ինչ էլ անի` իր կողքին կանգնած ենք». զինվորականները ՊՆ–ի մոտ են