Հայրենական մեծ պատերազմ

Մասնագիտությունն ազատեց գնդակահարությունից, կամ փրկվեց պատերազմից և զոհվեց խաղաղ օրերում

329
(Թարմացված է 23:32 06.05.2020)
Հայրենական մեծ պատերազմի մասնակցիներից շատերի պատմություններն անհավանական են թվում։ Մեծ հաղթանակի 75-ամյակի առիթով Sputnik Արմենիան զրուցել է Հայաստանում ապրող հայտնի մարդկանց հետ, որոնք ներկայացնում են իրենց նախնիների՝ հայրերի, պապերի իրական, հերոսական պատմությունները։

Դմիտրի Պիսարենկո, Մարիաննա Փայտյան, Sputnik Արմենիա

ՀՀ նախկին վարչապետ Խոսրով Հարությունի հայրը հրաշքով է փրկվել, երգչուհի Աննա Խաչատրյանի պապը ոչ միայն փրկվել, այլև փրկել շատերին, այդ թվում նաև գերության մեջ գտնվող հրեաներին, հայաստանցի Եֆիմ Ուդալցովն անցել է պատերազմի բովով ու զոհվել խաղաղ պայմաններում։

Հայաստանի Հարավային ռազմական օկրուգի զինծառայողները ծառեր են տնկել «Հաղթանակի ծառուղում»

Հայրենական մեծ պատերազմին մասնակցած մարդկանց կյանքի պատմությունն էկրանավորելու համար սցենարական հատուկ հորինվածքներ պետք չեն սյուժեն ավելի հետաքրքիր կամ լարված դարձնելու համար. առանց այն էլ նրանց պատմությունները հաճախ կարող են անհավանական թվալ։ ՀՀ նախկին վարչապետ, Ազգային ժողովի նախկին նախագահ Խոսրով Հարությունյանը վերհիշում է հորից լսած պատմությունները։ Հոր մասին պատմությունը նա սկսում է մի քիչ ավելի հեռվից՝ Արևմտյան Հայաստանի Վան քաղաքից, որտեղ էլ 1910 թվականին ծնվել էր նրա հայրը։ Վանի հերոսական դիմադրությունից հետո նրանց ընտանիքը բռնում է գաղթի ճամփան. սկզբում հայտնվում Իրաքում, մի քանի տարի անց տեղափոխվում Հունաստան՝ այնտեղից Խորհրդային Հայաստան հասնելու նպատակով։ Երկար դեգերումներից հետո վերջապես 1920 թվականին Հարությունյանների ընտանիքն իր տուն գտնում է հայրենիքի փրկված հատվածում։ Նրանք հիմնավորվում եմ Արարատի մարզի Այգավան գյուղում։

1941 թվականին, երբ ֆաշիստական Գերմանիան հարձակվեց Խորհրդային Միության վրա 31-ամյա Մելիք Հարությունյանն իր նախնիների նման որոշեց զենքը ձեռքը վերցնել ու պաշտպանել ընտանիքը, տունը, հայրենիքը։ Հենց պատերազմի սկզբում՝1941-ին, նա կամավոր ռազմաճակատ մեկնեց. թիվ 205 սակրավորների հատուկ գումարտակում էր։ 1942 թվականին մասնակցում էր Կերչի շրջանում՝ Ղրիմում ընթացող թեժ մարտերին, որտեղ շատերը գերի ընկան։

«Հայրս վիրավոր վիճակում նույնպես գերի ընկավ։ Նա երկու անգամ փախուստի փորձ է արել, երկու անգամն էլ բռնվել է։ Ինձ պատմել էր, որ դրանից հետո նրան ոչ միայն ծեծի էին ենթարկում ու տանջում, այլև ատամներն էին պոկում, հանում... ։ Երրորդ անգամ նրան հաջողվել է փախչել»,- պատմում է Խոսրով Հարությունյանն ու ավելացնում, որ գերիների թվում եղել է սպա, կապիտան Բադալյանը, որը նույնպես փախչել է նրանց հետ։ Այն ժամանակ հոր մտքով չէր էլ անցնի, թե հետագայում Բադալյանն ինչ կարևոր դերակատարում է ունենալու իր՝ տուն վերադարձի համար։

Հաջողված փախուստից հետո Մելիք Հարությունյանը Հարավսլավիայով անցնում է Հունաստան ու միանում գերմանացիների դեմ պայքարող պարտիզանական խմբերին։

«Հայրս պատերազմն ավարտեց Սալոնիկում՝ 1945թ.-ին։ Նա նույնիսկ պարգևներ ունի ստացած՝ պարտիզանական խմբերի ղեկավարման համար։ Պատերազմից հետո եղան շատերը, որ մնացին Հունաստանում կամ մեկնեցին Ֆրանսիա, Միցայալ Նահանգներ, բայց հայրս որոշեց հայրենիք վերադառնալ»,- պատմում է Հարությունյանը։

Վերադարձի ճանապարհին՝ Սուխումում, նրանց բռնում են ու միանգամից Սիբիր աքսորում։ Այնտեղ երջանիկ պատահականությամբ հայրը հանդիպում է կապիտան Բադալյանին, որը Սիբիրում զինվորական ծառայության մեջ էր։ Բադալյանի վկայությունն այն մասին, որ Մելիք Հարությունյանը պարտիզանական խմբերի կազմում ֆաշիստների դեմ է կռվել, օգնում է նրան 1947թ.-ին ողջ և առողջ տուն վերադառնալ։ Դրանից մեկ տարի անց ծնվում է նրա որդին՝ Խոսրով Հարությունյանը։

Տարածաշրջանի երկրների շարքում Հայաստանը ԽՍՀՄ հերոսների թվով առաջատարն է։ Հայ ժողովուրդը 106 ԽՍՀՄ հերոս է տվել, ևս 11-ը՝ Հայաստանում ծնված այլազգիներ են։ Նրանցից հինգը ծագումով ռուսներ են, նրանց թվում Լոռու մարզի Լերմոնտովո գյուղի բնակիչ Եֆիմ Գրիգոր Ուդալցովն է։ ԽՍՀՄ հերոսի կյանքի ոդիսականը ներկայացնում ՀՀ Ազգային ժողովի պատգամավոր Ալեքսեյ Սանդիկովը, որի նախաձեռնությամբ  ու Լոռու մարզպետի որոշմամբ Հայրենական մեծ պատերազմի 75-ամյակի առիթով Լերմոնտովո գյուղի միջնակարգ դպրոցը անվանակոչվեց ԽՍՀՄ հերոս Եֆիմ Ուդալցովի պատվին։ Ո՞վ էր նա և ինչպե՞ս կարողացավ ահ ու սարսափ տարածել ֆաշիստական օդուժում։

Սովետա-իրանական ճակատ. քչերը գիտեն, որ նրանք զոհվեցին Հայաստանում. տեսանյութ

Ուդալցովը ծնվել է 1922 թվականին, 1941թ.-ին նա արդեն ռազմաճակատում էր։ Այդ ընթացքում նաև հասցնում է ավարտել ուսումը Յեյսկի ավիացիոն ուսումնարանում ու կրտսեր լեյտենանտի կոչումով 1943թ.-ից ակտիվորեն միանում մղվող օդային մարտերին։

«Նա ծառայում էր ԽՍՀՄ կրկնակի հերոս, մեծն օդաչու Նելսոն Ստեփանյանի հետ։ Ուդալցովի ամենահիշարժան մարտերից մեկն այն է, երբ նա միայնակ օդային մարտի դուրս եկավ գերմանական ութ «Ֆոկկե-Վուլֆերի» դեմ ու կարողացավ կործանել դրանցից երեքը»,- պատմում է Սանդիկովը։

1944 թվականի հոկտեմբերի 6-ին Ուդալցովի հրամանատարությամբ կործանիչների խումբը թշնամու նավերի ոչնչացման հատուկ գործողություն էր իրականացնում։ Գործողությունը հաջողությամբ իրականացվեց, սակայն դրանից հետո Ուդալցովի ինքնաթիռը կործանվեց հակառակորդի կողմից արձակված զենիթային կրակից։ Ուդալցովը ողջ մնաց, բայց գերի ընկավ։ Նրան տարան Ֆրանսիա, որտեղ գերության մեջ մնաց մինչև ամերիկյան զորքերի կողմից երկրի ազատագրումը։

Ցուցաբերած խիզախության համար 1945 մարտի 6-ին ավագ լեյտենանտ Եֆիմ Ուդալցովին շնորհվեց Խորհրդային Միության հերոսի կոչում։

Ուդալցովն իրականացրել է 105 մարտական թռիչք, կործանել ռազմական նավեր, ինքնաթիռներ և այլն։ Հայրենական մեծ պատերազմից հետո նա ծառայության է անցել քաղաքացիական ավիացիայում։ Ցավոք, հերոսի պատմությունը ողբերգական ավարտ ունեցավ։ Պատերազմի թեժ մարտերում ու գերության մեջ ողջ մնացած հերոսը զոհվեց խաղաղ պայմաններում։ 1973 հոկտեմբերի 7-ին նա Քութաիսի-Մոսկվա չվերթն իրականացնող ՏՈւ-104 ինքնաթիռի հրամանատարն էր։ Դոմոդեդովո օդանավակայանում վայրէջք կատարելիս օդանավը կործանվեց. Ուդալցովը զոհվեց։

Երգչուհի Աննա Խաչատրյանի պապիկի պատմությունը սկսվեց Հայաստանում ու հասավ մինչև Իսրայել։ Հարություն Ռոբերտի Խաչատրյանը ծնվել է 1915 թվականի ապրիլի 5-ին։ Երևանի պետական բժշկական համալսարանն ավարտելուց հետո 1939 թվականին նա բանակ է զորակոչվում և մասնակցում Ֆիննական պատերազմին։ Հայրենական մեծ պատերազմի սկզբում նա որպես բժիշկ ծառայում էր Վելիկիե Լուկի քաղաքի հոսպիտալում։

Պատերազմի մասին բանաստեղծություններ կարդացեք․ ՌԴ խորհրդի խոսնակը` Մեծ հաղթանակի օրվա մասին

«Պապիկս կոնտուզիայի ենթարկվեց և 1942 թվականի օգոստոսի 22-ին գերի ընկավ գերմանացիներին։ Նրան համակենտրոնացման ճամբար ուղարկեցին։ Ցավոք, բոլոր ռազմագերիներին դատապարտեցին գնդակահարության։ Քանի որ պապիկիս գրպանում բժշկական ֆանենդասկոպ գտան, նրան չգնդակահարեցին, այլ ուղարկեցին ռազմագերիներին բուժելու»,- սերնդեսերունդ փոխանցվող պապիկի կյանքի պատմությունը վերհիշում է երգչուհին։

Այսպիսով, բժշկի մասնագիտությունը ոչ միայն փրկում է Հարություն Խաչատրյանի կյանքը, այլև ինքն էլ գերության տարիներին բազմաթիվ կյանքեր է փրկում, այդ թվում՝  ազգությամբ հրեաների։

«Պապիկիս շնորհիվ փրկված մարդիկ միշտ պատմել են նրա մասին»,- հպարտությամբ ասում է երգչուհին։ 

2013 թվականին Հարություն Խաչատրյանին ճանաչեցին Աշխարհի արդարակյաց (պատվավոր կոչում, որ իսրայելական «Աղետի մասին օրենքի» (1951) համաձայն՝ շնորհվում է Եվրոպայում նացիստական օկուպացիայի,  Հոլոքոստի ժամանակ հրեաներ փրկած և դրանով իրենց կյանքը վտանգած ոչ հրեաներին) և նրա անունը բազմաթիվ այլ անունների հետ միասին տեղ գտավ Երուսաղեմի «Յադ Վաշեմի» Արդարակյացների այգու հուշարձանի վրա։

329
թեգերը:
հերոս, պապիկ, Եֆիմ Գրիգոր Ուդալցով, Աննա Խաչատրյան, Խոսրով Հարությունյան, Հայրենական մեծ պատերազմի վետերան, Հայրենական մեծ պատերազմ
թեմա:
Հայրենական մեծ պատերազմի հաղթանակի 75–ամյակը (40)
Ըստ թեմայի
RT–ն Հայրենական մեծ պատերազմին նվիրված նախագիծ է գործարկում. տեսանյութեր
Կենտրոնական բանկը Հայրենական մեծ պատերազմի հաղթանակի 75-ամյակի առթիվ հուշադրամ է թողարկել
Լոռիում բնակվող Հայրենական մեծ պատերազմի վետերաններին հոբելյանական մեդալներ են հանձնել
Վերջին զանգ

Գոնե խոսենք ավարտական երեկոյից զրկված մեր խեղճ շրջանավարտների մասին

118
(Թարմացված է 22:16 26.05.2020)
Եկեք անկեղծ լինենք: Այս տարվա շրջանավարտների բախտը, մեղմ ասած, չի բերել։ Ոչ միայն ավարտական երեկո չունեն դպրոցն ավարտողները, այլև կարծես մոռացել ենք նրանց մասին, չենք էլ խոսում։ Եկեք խոսենք։
Գոնե խոսենք ավարտական երեկոյից զրկված մեր խեղճ շրջանավարտների մասին

Խոստովանեմ՝ երբեք չեմ սիրել դպրոցը: Ու բոլորովին ոչ այն պատճառով, որ իմ դպրոցը վատն է եղել: Այնպես է ստացվել, որ մեր մայրաքաղաքի երկու դպրոցում եմ սովորել, երկուսն էլ Երևանի առաջատար դպրոցներից էին: Դասատուներն էլ շատ լավն էին։ Տարիներ հետո ուսուցիչներիս մեկը նույնիսկ Փարիզում ինձ իր տուն հրավիրեց: Դասարանից էլ չեմ կարող բողոքել. համադասարանցիներիցս մեկը ոչ միայն Հայաստանի վարչապետ, այլև նախագահ դարձավ:

Այս նոր սերունդը ընդհանուր առմամբ շատ վատն է՝ միայն իր օգուտի մասին է մտածում: Քանի դեռ չեք բարկացել, շտապեմ ճշտել, որ սա ես չեմ ասել: Շատ դարեր առաջ հույն փիլիսոփա Սոկրատեսն է ասել. «Այս սերունդը վատն է ու անդաստիարակ, մեծերի հանդեպ հարգանք ընդհանրապես չունի»: Հազարամյակներ շարունակ Սոկրատեսի այս պնդումը կրկնվում է, վատ ու անդաստիարակ սերունդը դառնում է ավագ սերունդ ու նույն բանն է ասում նոր սերնդի մասին՝ մենք շատ լավն էինք, դուք վատն եք:

Անկեղծ ասեմ, իմ կարծիքով, հիմիկվա նոր սերունդը մեր սերնդից առանձնապես ոչնչով էլ չի տարբերվում: Համենայնդեպս ավելի վատը չէ. դա` հաստատ:

Ու չեմ էլ կարող ասել, թե սեփական փորձից ելնելով շատ արժեքավոր խորհուրդ կարող եմ տալ այն տղաներին ու աղջիկներին, որոնք հիմա երևի ինձ չեն էլ լսում՝ շատ էլ ճիշտ են անում: Ուղղակի եթե հարցնեին՝ ինչ դառնանք, չէի կարող պատասխանել: Մի անգամ շատ հաճելի հանդիպում ունեցա լրագրող դառնալ ցանկացող դպրոցականների հետ: Փորձեցի ներկայացնել լրագրող դառնալու անհերքելի առավելությունները: Եթե ուզում եք, հենց հիմա էլ առնվազն մի 10 գայթակղիչ հանգամանք մատնանշեմ: Բայց նաև խոստովանեմ՝ ժամանակին, երբ տղաս ավարտեց դպրոցն ու ասաց՝ պապ, երբեք չէի ուզենա լրագրող դառնալ, շատ ուրախացա, որ տղաս ամենևին չի ցանկանում գնալ իմ ճանապարհով:

Բայց եթե այնուամենայնիվ հիմա հարցնեք՝ բա ի՞նչ դառնանք, կդժվարանամ պատասխանել: Ով գիտի, թե ապագայում որ մասնագիտությունն է լինելու շահեկան: Մեր ժամանակ, երբ ես էի դպրոցն ավարտում, այսպիսի բան էր ընդունված՝ շարադրություն էինք գրում ամենատափակ թեմայով՝ դպրոցն ավարտելուց հետո ինչ ես ուզում դառնալ:

Պատկերացրեք, որ այն ժամանակ՝ 70 թվականին, երբ ավարտեցի դպրոցը, ավարտական այդ շարադրությունում գրեի՝ «ուզում եմ դառնալ ծրագրավորող», դասատուն կարող էր ինֆարկտ ստանալ: Ի՞նչ ծրագրավորող: Ի՞նչն ես պատրաստվում ծրագրավորել: Որովհետև հիմա ծրագրավորողը ամենահեռանկարային ու շահեկան մասնագիտությունն է ողջ աշխարհում՝ Ամերիկայից մինչև Հնդկաստան, իսկ այն ժամանակ՝ 70-ականներին, երբ ես էի ավարտում դպրոցը, ծրագրավորող հասկացությունը Հայաստանում ընդհանրապես գոյություն չուներ: Բա ես հիմա ձեզ ինչպես խորհուրդ տամ, թե որ մասնագիտությունն է քսան տարի հետո շահեկան լինելու:

Հենց որ տեսնես՝ Facebook եմ մտնում, մի լավ ապտակ հասցրու ինձ

Ընդհանրապես եկեք մի հարց վերջնականապես ճշտենք։ Դուք, որ այսօր ավարտում եք դպրոցը, ինչի՞ եք ձգտում: Գիտեմ, որ ամեն ինչի: Այսինքն ուզում եք, որ լինի մեկը երեքում՝ լավ փող, լիքը հետաքրքրություն ու նաև հասարակական ճանաչում ու գնահատում: Լինում է, բայց շատ հազվադեպ: Օրինակ՝ եթե պատգամավոր դառնաք, միջինից առնվազն երկու անգամ ավելի բարձր աշխատավարձ կունենաք հաստատ՝ պարգևավճարն էլ հետը: Չգիտեմ, թե օրենսդրական աշխատանքի նկատմամբ ձեր հետաքրքրությունն ինչպիսին կլինի, բայց ձեր նկատմամբ հետաքրքրությունը առնվազն մի հինգ տարի շարունակ չի մարի։

Գիտեմ, որ շատ վիճահարույց խորհուրդներ եմ տալիս ձեզ, մեր այսօրվա սիրելի շրջանավարտներ: Դուք ինձ մի լսեք: Լսեք բրիտանացի Ռեդյարդ Քիպլինգին, որի հանրահայտ բանաստեղծությունը, հաստատ համոզված եմ, հենց ձեզ է ուղղված. «Եթե կյանքով լցնես կյանքիդ ամեն վայրկյանը ու լիարժեք ապրես օրերդ հիասքանչ, ուրեմն տեր ես աշխարհի ժառանգությանը: Եվ ավելին՝ դու Մարդ ես, մանչ»։

Բոլոր հիմարությունները դեմքի խելոք արտահայտությամբ են արվում, կամ Մյունխհաուզենի սինդրոմը

118
թեգերը:
շրջանավարտ, մասնագիտություն, դպրոց, Հայաստան
թեմա:
5 րոպե Դուլյանի հետ
Ըստ թեմայի
Պատրաստեք ձեր երեխաներին բարդ կյանքին
Պատմությունը շատ լուրջ բան է, մի՛ վստահեք այն պատմաբաններին 
Առաջնորդը միշտ անսխալական է, իսկ առանձին անհատը ճշմարտության կրող չի կարող լինել
Անհավանական, բայց իրական. տուգանվել է, պատիժ կրել, բայց տղամարդ է` ասել է ու արել
Համակարգիչ

Բարի գալուստ ապագա. նստել եմ թախտին, սպասում եմ առաքմանը, նրանք ինձ հաց ու ջուր են բերում

287
(Թարմացված է 18:06 26.05.2020)
Աշխարհի տարբեր երկրներում գտնվող մեր հայրենակիցներն այս օրերին շատերիս բարի նախանձով էին նայում. նույնիսկ գնում կատարելու համար տանից դուրս չգալն ու անհրաժեշտ ամեն ինչի համար առաքում պատվիրելն արտասահմանում ճոխություն է, մեզ մոտ առօրյա դարձավ։

Կորոնավիրուսը շատերիս կյանքն ու սովորությունները փոխեց, ու խոսքը միայն անվտանգության կանոններին հետևելու և սոցիալական հեռավորություն պահպանելու մասին չէ։ Այս իրավիճակը ստիպեց նոր հմտություններ ձեռք բերել՝ մեր առօրյայում ավելի մեծ տեղ հատկացնելով առցանց ծառայություններին։ Ես ու ինձ նման շատերը բացահայտեցինք, որ առօրյա օգտագործման, առաջին անհրաժեշտության պարագաների, սննդամթերքի գնումներն առցանց անելն իսկապես հեշտացնում է կյանքը։ Կորոնավիրուսից առաջ առցանց գնման միայն մեկ անհաջող փորձ էի ունեցել՝ տաբատ էի պատվիրել, որն ինձ բացարձակ չէր սազում և անհասկանալի կարճ էր. ասեմ, որ նման բան ինձ հետ հինգերորդ դասարանից հետո չէր եղել, հակառակը՝ տաբատները միշտ երկար են լինում, որովհետև ես, մեղմ ասած, բարձրահասակ չեմ։

Արտակարգ դրության առաջին օրն իսկ ամբողջ ընտանիքով փակվեցինք տանը. հացը որոշեցինք ինքներս թխել երկու օրը մեկ անգամ, իսկ անհրաժեշտ ամեն ինչը՝ պատվիրել։ Այդպես երկու ամիսների ընթացքում ես փորձարկեցի մրգի, բանջարեղենի, սննդամթերքի առաքմամբ զբաղվող բազմաթիվ ընկերություններ։ Անշուշտ, առաջին օրերին եղան հիասթափություններ, նյարդային իրավիճակներ, որովհետև պարզվեց՝ իրավիճակը նոր էր ոչ միայն ինձ ու ինձ նման օնլայն գնումներ նախկինում չկատարած մարդկանց համար, այլև հենց այդ ընկերությունների. որովհետև ես և ինձ նմանները միանգամից մի գիշերում շատացանք։

«Gazar.am» ընկերությունը հիմնադրվել է մոտ երկուսուկես տարի առաջ։ Առաջին իսկ օրերից ծառայությունը հետաքրքրություն առաջացրեց, որովհետև շուկայում նորություն էր՝ մրգի և բանջարեղենի առաջին մասնագիտացված առցանց խանութն էր։ Պատվերների մեծ թիվ սկզբում չկար, քանի որ գրանցումը բացառապես առցանց էր արվում։ Հասկացան, որ ոչ բոլորն են կարողանում օգտվել համակարգչից, իսկ եթե օգտվում էլ են, հատկապես մեծերի մոտ մտավախություն կա, թե առցանց պատվեր գրանցելիս մի բան սխալ կանեն։ Որոշեցին նաև հեռախոսով պատվերներ գրանցել, այդպես այս տարիների ընթացքում ձեռք բերեցին հավատարիմ հաճախորդներ, իսկ արտակարգ դրությունը իսկապես փորձություն դարձավ ընկերության ամբողջ թիմի համար։ Հիմնադիր տնօրեն Էլեն Թադևոսյանն ասում է՝ պատվերների թիվն այնքան կտրուկ ավելացավ կարանտինի օրերին, որ իր ամբողջ ընտանիքը կամավոր միացավ աշխատանքին. հենց՝ ինքը, տնօրենը սկսեց նաև հեռախոսազանգերի պատասխանել, առաքվող փաթեթների հավաքմանը մասնակցել և այլն։

Առցանց առևտուր ու բժշկություն. ինչ է փոխել կորոնավիրուսը Հայաստանի աշխատաշուկայում

«Մեր պատվերները բառի բուն իմաստով մեկ օրվա մեջ քսանապատկվեցին, հիսունապատկվեցին։ Օր է եղել՝ ամբողջ թիմը ջուր էլ չի խմել»,- պատմում է Էլենն ու անկեղծորեն ասում՝ թերություններ լինում էին՝ կապված նաև այդ օրերին խափանումներով աշխատող ինտերնետի հետ, բայց իր գնահատականով՝ մոտ իննսուն տոկոսով աշխատանքի որակը պահվել է։ Նրա խոսքով՝ ավելացավ ոչ միայն պատվերների թիվը, այլև պատվերը՝ հաճախորդին հասցնելու եղանակները։

«Շատ հետաքրքիր դեպքեր էին լինում, որովհետև նաև պատվերներ էինք հասցնում ինքնամեկուսացած, մեկուսացած մեր հայրենակիցներին։ Դուռը ծեծում էին, պատվերը թողնում դռան առջև, պատշգամբից թել էին կախում, կապում էին առաքիչները, այդպես էին բարձրացնում»։

Ծավալն այնքան մեծ էր, որ մարզերը չկարողացան էլ ներառել աշխատանքում, թեպետ տնօրենի խոսքով` բացառություններ արվում էին հատկապես տարեց պատվիրատուների դեպքում։

«Քանի որ սահմաններն էլ փակ էին, լինում էր, որ առաքիչները հասցնում էին մարզային սահմանահատված, այնտեղից գալիս, վերցնում էին»։

Ինքնամեկուսացած պատվիրատուների համար Էլենը հետաքրքիր անակնկալներ էլ մտածեց. ծաղկեփնջերի նման կանաչիներ էր փնջում և պատվերի հետ ճանապարհ դնում՝ փորձելով բարձրացնել տանը փակված կանանց տրամադրությունը

Էլենի խոսքով՝ թեպետ «պիկն» անցել է, բայց իրենց հաճախորդների թիվն ավելացել է, որովհետև այս ընթացքում շատերն իմացան իրենց մասին, փորձեցին ու համալրեցին հավատարիմների շարքերը։ Բացի այդ, առցանց գնումներ կատարելը նաև սովորության հարց է, իսկ այս ընթացքում մարդկանց սովորություններն էլ փոխվեցին։ Հիմա արդեն, երբ վիճակը քիչ թե շատ խաղաղվել է, մտածում են օնլայն հարթակ ստեղծել նաև հայ ֆերմերների հետ, որպեսզի գյուղացու ապրանքն ուղիղ ու առանց բազմաթիվ միջնորդների ու արհեստական գնաբարձրացման գնորդին հասնի։

Առհասարակ, մեկուսացման օրերին ամենատարածված ու ամենաշատ գովազդվող օնլայն հարթակներն առաջարկում էին անմիջապես գյուղից առաքվող ապրանքներ։ Այդպես միանգամից մի քանի հարթակներ ստեղծվեցին։

IrindNatural.am-ը դրանցից ամենաառաջինն է, որովհետև դեռ կորոնավիրուսից մոտ մեկ տարի առաջ է հիմնվել։ Ընկերությունն առաջարկում է Թալինի շրջանի Իրինդ գյուղի արտադրանքը։ Պատվերները գրանցում են երեք եղանակով՝ զանգով, Facbook-ի էջով և առցանց հարթակով։ Մեկ տարեկան դառնալը նոր էին նշել, երբ երկրում արտակարգ դրություն հայտարարվեց։ Որոշեցին իրավիճակից չօգտվել ու գնի արհեստական բարձրացում չանել, դրա կողքին էլ հայտարարեցին՝ առաքումներն անվճար են արվելու։ Ի՞նչ եղավ։ Պատվերների այնպիսի մեծ թիվ «թափվեց» ընկերության գլխին, որ մտքներով անցնել էլ չէր կարող։ Արդյունքում ինչ-որ առումով վիճակը հենց իրենց դեմ շրջվեց։

«Մի գիշերում պատվերների թիվը քառասուն, հիսուն, հետո մինչև հարյուր անգամ ավելացավ»,- այդ օրերը սարսափով հիշելով՝ պատմում է հիմնադիր տնօրեն Գագիկ Կարապետյանը։ Դա բազմակի խնդիրներ բերեց, մի կողմից՝ թիմի պակաս, մյուս կողմից՝ ինտերնետային խնդիրներ ի հայտ եկան. համակարգում կարող էր նույն պատվերը մի քանի անգամ գրանցվել, իսկ ֆորսմաժորային վիճակում ամեն ինչ ստուգելու հնարավորություն չկար։

«Իրականում ֆինանսական կորուստներ ունեցանք, որովհետև լինում էին դեպքեր, որ ապրանքը փչանում էր, մեքենաների հետ էին խնդիրներ լինում»,- պատմում է նա ու ավելացնում, որ ապրիլից իրավիճակը սկսեց կարգավորվել, նաև ռազմավարությունը փոխեցին։ Նոր մոտեցումն ու երկրում փոխված իրավիճակը պատվերների քանակը հավասարակշռեցին։ Գագիկն ասում ՝ «պիկն իջել է», բայց լավն այն է, որ նոր հաճախորդներ էլ ունեցան՝ մարդիկ, որոնք նախկինում չէին օգտվել, որովհետև դրա կարիքը չէր եղել, իրենք էին խանութ գնում, իսկ հիմա փորձեցին այս տարբերակն ու հաճախորդ դարձան։

Sputnik Արմենիայի հետ զրույցում Բարձր տեխնոլոգիաների արդյունաբերության փոխնախարար Ստեփան Ծատուրյանը նշեց, որ էլեկտրոնային առևտուրը պետության թվայնացման գործում կարևոր հարցերից է, այն չափանիշներից մեկը, որով կարող ենք արձանագրել, թե որքանով է մեր հասարակությունն օգտվում էլեկտրոնային համակարգերից և տիրապետում թվային հմտություններին։

«Թվերն օրեցօր փոփոխվում են, բայց շատ մոտավոր մոտ երեք անգամ ծավալի մեծացում ունենք»,- ասում է փոխնախարարն ու մեկնաբանում, որ էլեկտրոնային առևտուր ասելով՝ հասկանում ենք էլեկտրոնային վճարումը՝ մի դեպքում, երբ քաղաքացին այցելեց էլեկտրոնային կայք, ընտրեց համապատասխան ապրանքը, կատարեց վճարում, նշեց հասցեն և ստացավ ապրանքը։ Մյուս տարբերակը՝ քաղաքացին այցելեց խանութ, էլեկտրոնային քարտով վճարում կատարեց և վերցրեց իր ապրանքը։ Այսինքն՝ եթե առցանց հարթակով ապրանք ես պատվիրում, բայց դրա համար վճարում ես կանխիկ, ապա ստացվում է, ըստ էության, առաքման պատվեր, այլ ոչ թե էլեկտրոնային գնում։

Փոխնախարարը վստահ է՝ էլեկտրոնային գնում կատարելու համար պետք է նման սովորություն ու վստահություն ձևավորել գործարքի հանդեպ։ Այդ նպատակով առաջիկայում նախարարությունը կընդունի կիբեռանվտանգության ստանդարտներ, որոնք կլինեն ուղեցույց նման համակարգերը ստեղծելիս՝ դրանք պարտադիր պետք է բավարարեն նվազագույն պահանջները՝ ռիսկերը նվազեցնելով։

Մեր երկրում էլեկտրոնային առևտրի զարգացման համար նախարարությունը տնտեսվարողների գործընկեր է դիտարկում «Հայփոստին»։ Համաշխարհային մեծ ընկերությունները՝ Amazon, eBay և մյուսները, կարողանում են ապրանքը հասցնել գրեթե ցանկացած կետում գտնվող պատվիրատուին, որովհետև համագործակցում են մեծ ընկերությունների հետ։ Հայաստանում էլ «Հայփոստը» կարող է դառնալ այն գործընկերը, որը ծառայությունների մատուցման աշխարհագրությունը մեծացնելու հնարավորություն կտա տնտեսվարողներին։

287
թեգերը:
մթերք, առցանց վաճառք, Հայաստան
Ըստ թեմայի
«Կորոնավիրուսնիկի» առօրյան` 43 օր մեկուսացում, կամ ինչու է Մարինեն շնորհակալ Covid-19-ից
«Ես դիմակաֆոբ եմ»․ ինչպես են քաղաքացիներն ու մասնագետները վերաբերվում դիմակ կրելուն
Առաջին դասարանցիների ընդունելության առցանց ստուգման փուլը սկսվել է. ի՞նչն է փոխվել
Մանեկեններ

Վրաստանում գործող հագուստի խանութների հանդերձարանները կփակվեն

29
(Թարմացված է 00:16 27.05.2020)
Ընկերության ներկայացուցիչները քայլեր են ձեռնարկում, որպեսզի կանխեն կորոնավիրուսի տարածումը։

ԵՐԵՎԱՆ, 27 մայիսի – Sputnik. Վրաստանի մի շարք խանութների հաճախորդները չեն կարողանա գնումներ կատարելուց առաջ փորձել հագուստը։ Retail Group Georgia ընկերության տնօրեն Ռեզո Մագալաշվիլին «Բիզնեսպրեսնյուսի» հետ զրույցում ասել է, որ խանութների հանդերձարանները կփակվեն։

Խոսքը վերաբերում է Zara, Massimo Duti, Oisho, Bershka, Stradivarius և Վրաստանում ներկայացված մի շարք ապրանքանիշներին։ Որոշման պատճառը կորոնավիրուսի համավարակն է։ Արգելքն ուժի մեջ կմտնի, երբ սահմանափակումները կչեղարկվեն ու առևտրի կենտրոնները կբացվեն։

«Մեծ ռիսկ կա, որ վարակը կարող է տարածվել նաև հագուստի միջոցով, այդ պատճառով էլ կանխարգելիչ միջոցներ կկիրառվեն», - ասել է Մագալաշվիլին։

Նա նշել է նաև, որ հագուստը վերադարձնելու դեպքում այն անպայման կախտահանվի։

Հիշեցնենք` Վրաստանը մայիսի 23-ին որոշեց չերկարաձգել արտակարգ դրության ռեժիմը, սակայն մի շարք սահմանափակումներ կգործեն մինչև հուլիսի 15-ը։ Օրինակ` հագուստի և կոշիկի խանութներն այժմ կարող են միայն առցանց աշխատել։

Մայիսի 26-ի դրությամբ՝ Վրաստանում 732 մարդ է վարակվել կորոնավիրուսով։

Բարի գալուստ ապագա. նստել եմ թախտին, սպասում եմ առաքմանը, նրանք ինձ հաց ու ջուր են բերում

29
թեգերը:
կորոնավիրուս, խանութ, Վրաստանի Հանրապետություն
թեմա:
Կորոնավիրուսը Չինաստանում և աշխարհում
Ըստ թեմայի
Բալիի փոխարեն «Զում», կամ հայաստանյան առցանց հարսանիքն արտակարգ դրության պայմաններում
Կորոնավիրուսը բոլորի տուն «կմտնի», կամ վարակը ստիպում է հիշել «տալոնով» հացը
Սերիալներ, շաուրմա, կարկանդակներ․ ինչ են որոնել և պատվիրել հայերը արտակարգ դրության օրերին
Առցանց առևտուր ու բժշկություն. ինչ է փոխել կորոնավիրուսը Հայաստանի աշխատաշուկայում