Դավիթ Գյուլամիրյան

Հայ պատանիներն իրենց հավակնոտ ծրագրերով Մարս կհասնեն, իսկ առայժմ մեդալներ են շահում

778
(Թարմացված է 00:07 24.02.2020)
Միջազգային օլիմպիադաներում հայաստանցի դպրոցականներն արդեն քանի տարի է՝ տպավորիչ հաղթանակներ են գրանցում: Վերջին հաղթանակը հունվարին էր. հայ դպրոցականները Ղազախստանի Ալմաթի քաղաքից վերադարձան 18 մեդալով։

1 ոսկե, 7 արծաթե և 10 բրոնզե մեդալ. այսպիսի  նվաճումով հունվարին Ղազախստանի Ալմաթի քաղաքում անցկացված 16-րդ միջազգային Ժաուտիկովյան օլիմպիադայից վերադարձան հայ դպրոցականները: Sputnik Արմենիան պատմում է նրանցից մի քանիսի` «Քվանտ» վարժարանի սաների հավակնոտ ծրագրերի, երազանքների ու պատանեկան «զոհաբերությունների» մասին:

Կարևորը` վերադառնամ Հայաստան

11-րդ դասարանցի Ալեքսանդր Աբելյանը Ժաուտիկովյան օլիմպիադայի հայաստանյան պատվիրակության չեմպիոնների չեմպիոնը դարձավ՝ թիմին բերելով միակ ոսկե մեդալը: Լուսանկարվելու համար Ալեքսը համեստությամբ սև, սովորական դպրոցական ուսապարկից մեդալների մի ամբողջ խուրձ է դուրս բերում:

Ученик 11 класса гимназии Квант Александр Абелян
© Sputnik / Andranik Ghazaryan
Ալեքսանդր Աբելյանը

Մի քիչ շփոթվելով պատմում է, թե ինչպես տարվեց ինֆորմատիկայով: Դպրոցում մաթեմատիկան բոլոր առարկաներից ավելի հեշտ էր տրվում: Հայրը ծրագրավորող է, ինքն էլ մանկուց հետաքրքրված էր ծրագրավորմամբ, բայց և վստահ էր, որ մաթեմատիկայով է իր ուղին շարունակելու: Հետո սկսեց օլիմպիական խմբակների մասնակցել, ու ինֆորմատիկան գերեց նրան:

«Առաջին անգամ միջազգային օլիմպիադայի գնացի 2017թ.-ին՝ Եվրոպայի պատանեկան օլիմպիադան էր, արդյունքները լավը չէին, բայց դա ինձ համար փորձ էր: Հենց հաջորդ տարի ոսկե մեդալ նվաճեցի»,- պատմում է Ալեքսը:

Ученик 11 класса гимназии Квант Александр Абелян
© Sputnik / Andranik Ghazaryan
Ալեքսանդր Աբելյանը

Նրա խոսքով՝ Հայաստանում ինֆորմատիկայով լուրջ զբաղվողները շատ չեն, այնպես որ բոլորն իրար գիտեն: Օլիմպիական համայնքի պես մի բան է ձևավորվել նաև միջազգային մակարդակով: Ալեքսն արդեն փորձառու օլիմպիական է, այնպես որ տարբեր երկրների հնարավորություններին արդեն ծանոթ է:

Նրա խոսքով՝ մեր հարևաններից ամենաուժեղն Իրանն է, Վրաստանը վերջին տարիներին  լավ ցուցանիշներ է ունի, իսկ Ադրբեջանից մենք բավականին առաջ ենք: Որքան էլ այս վերջինն ասելիս Ալեքսի խոսքում ազգային հպարտություն կա, բայց և ընդգծում է՝ օլիմպիադային մասնակցելիս երբևէ չի մտածում այս կամ այն երկրի մասնակցից առաջ անցնելու մասին: Իր նպատակը հաղթանակն է:

Ալեքսն այնքան զբաղված է, որ դեռ չի հասցրել մտածել` ինչ է ուզում դառնալ: Ազատ ժամանակ, եթե ունենում է՝ կիթառ է նվագում, խորացված անգլերեն է սովորում: Հեռանկարում՝ աշխարհի թոփ համալսարաններից մեկում սովորելն է։

«Քեմբրիջ, Օքսֆորդ, MIT` որը կստացվի։ Դրանից հետո անպայման հետ կգամ, այստեղ  կհասկանամ, թե ինչ եմ ուզում անել: Ինձ համար կարևոր է, որ վերադառնամ Հայաստան»,- ասում է Ալեքսն ու նշում, որ կապ չունի, թե որտեղ ես ծնվել՝ մեծ, թե փոքր երկրում, կարևոր է ձգտումը, ամեն տեղ էլ հնարավոր է հաջողել: Վստահ է, որ այս պահին Հայաստանում ամենաշատը կրթության վրա է պետք ուշադրություն դարձնել, միայն կրթությամբ կկարողանանք օգնել մեր երկրին:

Ամենահետաքրքիրը տիեզերքն է

Դավիթ Գյուլամիրյանին միշտ հետաքրքրել է, թե ինչպես է այս կամ այն բանն աշխատում։ Նա այս անգամ հայաստանյան թիմին բրոնզե մեդալ է բերել ֆիզիկա առարկայից:

Ученик 11 класса гимназии Квант Давид Гюламирян
© Sputnik / Andranik Ghazaryan
Դավիթ Գյուլամիրյանը

Իրեն լուսանկարելու համար օգնում է մեզ դասավորել ֆիզիկայի լաբորատոր սարքերն ու առիթը բաց չի թողնում առավելագույն հանրամատչելի և համբերությամբ բացատրել, թե որն ինչի համար է: «Ամեն ինչ հասկանալի է հայացքով նայում եմ, գլուխս էլ խելացի «տմբտմբացնում». թեպետ Դավիթի համար պարզից էլ պարզ է, որ ինձ համար ոչինչ էլ հասկանալի չէ, բայց իսկական ուսուցչի նման նա շարունակում է հույսը չկորցնել ու մեծ սիրով, կասեի` կրքով պատմել ֆիզիկայի մասին: Հատկապես ոգևորությամբ ներկայացնում է իր հետազոտական նախագիծը, որը հաջողությամբ ավարտելու դեպքում ԱՄՆ կմեկնի:

«Փոքր ժամանակ սիրում էի լեգոներից ռոբոտներ հավաքել. ծնողներիս ցույց էի տալիս, հետո էլ հյուրասենյակում մի լավ տեղ դնում ու ամեն անգամ անցնելիս հպարտանում էի, որ կարողացել եմ նման բան ստեղծել: Իսկ երբ մայրս կամ հայրս ինձ դպրոցից տուն էին բերում, ամբողջ ճանապարհին խնդրում էի, որ ինձ խնդիրներ ասեին, սիրում էի դրանք լուծելով տուն գալ»,-իր մանկական հետաքրքրությունների մասին է հիշում Դավիթը: Արդեն դպրոցում սկսեց տարբեր խմբակների հաճախել՝ մաթեմատիկա, ինֆորմատիկա, ֆիզիկա: Հետո հասկացավ, որ բոլորը չի հասցնում, ինֆորմատիկայից հրաժարվեց, 10-րդ դասարանում նաև մաթեմատիկան մի կողմ թողեց՝ իր ամբողջ ուշադրությունը ֆիզիկայի վրա կենտրոնացնելով:

Այս տարի առաջին անգամ մեկնեց միջազգային օլիմպիադայի. մի քիչ տխուր է, որ բրոնզ բերեց, բայց գիտի՝ հաջորդին ավելի լավ է ներկայանալու: 

Ապագայում իրեն տեսնում է հրթիռներ կամ տիեզերք ուղարկվող ինչ-որ սարքավորումներ կառուցող ինժեներ: Ամենամեծ երազանքն ուսումնասիրությունների համար ինչ-որ մոլորակ թռչելն է: Հայտնի Space X-ի հիմնադիր Իլոն Մասկն, օրինակ, առաքելություն ունի առաջիկայում Մարս մեկնելու: Դավիթը դեմ չէ նրան միանալ այդ ճամփորդության ընթացքում:

«Ինձ համար ամենահետաքրքիր բանը տիեզերքն է, որովհետև մենք այնքան քիչ բան գիտենք։ Արբանյակ ենք ուղարկում կամ հեռադիտակով նայում ենք երկինք, բայց դա այնքան քիչ է»,- նշում է Դավիթը:

Մինչև այլ մոլորակ մեկնելը Դավիթն այլ նպատակ ունի՝ կրթություն ստանալ արտերկրում ու անպայման Հայաստան վերադառնալ: Ասում է՝ իսկ ինչու Space X-ի նման մի բան էլ Հայաստանում չհիմնել:

Ученик 11 класса гимназии Квант Давид Гюламирян
© Sputnik / Andranik Ghazaryan
Դավիթ Գյուլամիրյանը

«Շատ կուզեմ մեր երկրում գիտության, կրթության ոլորտում փոփոխություններ անել: Ինձ թվում է, որ մենք շատ դանդաղ ենք առաջ գնում կրթության ոլորտում: Բոլորը բողոքում են, բայց ոչ ոք ոչինչ չի անում»,- ասում է Դավիթն ու ավելացնում, որ ամեն մեկը պետք է հասկանա՝ երկիրը փոխելու, ավելի լավը դարձնելու պատասխանատվությունը ոչ թե ինչ-որ մեկինն է, այլ հենց իրենը: 

Ինձ շատ են օգնել, ես էլ պետք է օգնեմ ուրիշներին

Ղազախստանն ու ղազախներին չի հավանել, օլիմպիադայի կազմակերպվածությունից գոհ չէ, բայց այս օլիմպիադային մասնակցելն իր կյանքում Կարեն Մոսոյանը հետաքրքիր փորձառություն է համարում: Նա էլ ֆիզիկա առարկայից արծաթ է Հայաստան բերել:

Ученик 11 класса гимназии Квант Карен Мосоян
© Sputnik / Andranik Ghazaryan
Կարեն Մոսոյանը

Մայրը բժիշկ է, հայրը՝ ծրագրավորող։ «Ինչից է ինչը». Կարենը վաղ մանկությունից է փորձել սա հասկանալ: Խոստովանում է, որ խաղալիքները կոտրում էր միայն նրա համար, որ տեսներ՝ ներսում ինչ կա, ինչպես է աշխատում: Ֆիզիկայի հանդեպ սերն էլ շատ խոր արմատներ ունի՝ ֆիզիկոս պապիկից է փոխանցվել։

8-րդ դասարանից սկսած հանրապետական օլիմպիադաներում փայլուն հանդես է գալիս՝ ամեն անգամ կարգ նվաճելով: Ժաուտիկովյան օլիմպիադան առաջին միջազգային փորձն էր ու հենց միանգամից լավ արդյունք ստացվեց:

«Մեր չեմպիոնները պետք է դեր ունենան քրեական մշակույթի դեմ պայքարի գործում». Նիկոլ Փաշինյան

«Կանխատեսելի էր, բայց շատ ուրախ էի»,- ինքնավստահ ու անկեղծ ասում է նա:

Օլիմպիադաներին մասնակցելու, մեդալներ նվաճելու գլխավոր մոտիվացիան աշխարհի թոփ համալսարաններից մեկում ուսանելն է: Ուզում է սովորել ծրագրավորում կամ ինժեներիա, հետաքրքրված է արհեստական բանականությամբ: Կրթություն ստանալուց հետո ծրագրում է վերադառնալ Հայաստան ու այստեղ ընկերների հետ ընկերություն հիմնել, գիտությունը զարգացնել, գյուտեր արտոնագրել:

Ученик 11 класса гимназии Квант Карен Мосоян
© Sputnik / Andranik Ghazaryan
Կարեն Մոսոյանը

Ուզում է հայերի պատիվը բարձր պահել: Ասում է՝ նույնիսկ արտերկրում լինելով՝ հայի հայացքը դեպի Հայաստան պետք է լինի:

«Կարող է այնպիսի երեխա լինել, որի ֆինանսական վիճակն այնքան էլ լավ չէ, բայց հետաքրքիր մտածելակերպ ու խելք ունի»,- ասում է Կարենն ու բացատրում, որ ինքը պարտք ու պատասխանատվություն ունի. իրեն շատ են օգնել հաջողելու համար, ինքն էլ ապագայում անպայման մեկ ուրիշին պետք է օգնի։

Կանայք ճշգրիտ գիտություններից թույլ չեն, պարզապես հետաքրքրություններն են այլ

Ժաուտիկովյան օլիմպիադային հայաստանյան թիմի կազմում նաև 3 աղջիկներ էին մասնակցում. նրանցից մեկը Լորետտա Արզումանյանն էր: Ոսկուն շատ մոտ էր, բայց արդեն երկրորդ անգամ միջազգային օլիմպիադայից արծաթով վերադարձավ: «Պապիկս ինժեներ էր, հայրիկս ծրագրավորող է, նաև հաշվապահ է աշխատել, մայրս օլիմպիադաների է մասնակցել, ֆիզիկայից հանրապետական առաջին կարգ ունի: Այնպես որ չգիտեմ, թե կոնկրետ որ մեկից է ինձ ընդունակություններս փոխանցվել»,- ասում է Լորետտան:

Ученица 11 класса гимназии Квант Лоретта Арзуманян
© Sputnik / Andranik Ghazaryan
Լորետտա Արզումանյան

Ֆիզմաթ առարկաներից բացի նշում է, որ շատ լավ կարողանում է պատմության փաստերը հիշել, իսկ թվականների հարցում փայլում է, որովհետև թվերի միջև հետաքրքիր օրինաչափություններ է կարողանում գտնել ու մտապահել:

Ասում է` թյուր կարծիք կա իբրև թե աղջիկների մոտ ճշգրիտ գիտությունները լավ չեն ստացվում: Այդպես չէ, պարզապես աղջիկներից շատերին դրանք չեն հետաքրքրում, ոչ թե չի ստացվում:

Գերզբաղված պարապում է թոփ 10 համալսարաններից մեկն ընդունվելու համար: Որոշել է, որ բակալավրիատը մաթեմատիկայով է սովորելու, հետագայում չի բացառում, որ մաթեմատիկան այլ ոլորտում կօգտագործի, օրինակ՝ ինժեներիայում:

«Տեսնեմ այնտեղ լավ է, էլ հետ չեմ գա»,- ծիծաղում է Լորետտան՝ խոսելով սովորելուց հետո Հայաստան վերադառնալու մասին: Հետո բացատրում է՝ դա չի նշանակում ընդմիշտ արտերկրում մնալ: Նշանակում է՝ մի նոր բան հիմնել, հունի մեջ գցել, որպեսզի վերադարձն էլ իմաստավորված ու օգտակար լինի: 

Դասերից բացի այլ բաներով զբաղվել Լորետտան իրեն թույլ չի տալիս: Ասում է՝ նախկինում ինքն իրեն ստիպում էր դաս անել, բայց հիմա մոտիվացիան այնքան ուժեղ է, որ այլ զբաղմունքի համար «հավես էլ չունի», միակ բացառությունն օպերաներն են: Այս հարցում Լորետտան ինքն իրեն երես է տալիս, ճանապարհին էլ միշտ ականջակալներում Մոցարտն է հնչում: Մոցարտից հետո Լորետտայի կյանքում մյուս համաշխարհային դեմքը Դոստոևսկին է, իսկ մնացյալ ժամանակն անցկացնում է թվերի աշխարհում: Անկեղծանում է՝ բանաձևերն այնքան մեծ տեղ ունեն իր կյանքում, որ անգամ մայրիկի հետ կատակելիս բանաձևեր է օգտագործում:

Ученица 11 класса гимназии Квант Лоретта Арзуманян
© Sputnik / Andranik Ghazaryan
Լորետտա Արզումանյան

Հ.Գ. Լորետտան բանաձևային կատակներ ինձ հետ անել չի համարձակվում. Դավիթից ավելի ռեալիստ է: Գիտի, որ չեմ հասկանալու։

778
թեգերը:
մեդալ, Մարս, Կրթության, գիտության, մշակույթի և սպորտի նախարարություն (ԿԳՄՍ), Աշակերտ, դպրոց, հայ, օլիմպիադա
Ըստ թեմայի
Օլիմպիադաներում բարձր արդյունքի հասած աշակերտները 2020 թ–ից անվանական կրթաթոշակ կստանան
«Մեր հերոսները» մրցույթը. աշակերտները գրել են Ազնավուրի, Սպիտակի և վետերան ուսուցչի մասին
Դպրոցական դասագրքերը կփոխվեն. առաջինը նոր գրքերով կսովորեն Տավուշի աշակերտները
Հայկ Ղազարյանը

«Ռուսական մաֆիան» հայկական դեմքով, կամ ինչպես Ղազարյանը փրկեց Սան Դիեգոյի իր ռեստորանը

231
Հին խորհրդային դպրոցներում աշակերտին, որն ասում էր «չգիտեմ», ուսուցիչները սովորաբար պատասխանում էին. «Բա Պուշկի՞նը գիտի»։ ԱՄՆ-ի Կալիֆոռնիա նահանգի Սան Դիեգո քաղաքում քչերը գիտեին, թե ինչպես պաշտպանվել ողջ Ամերիկան ընդգրկած ջարդերից ու բռնությունից։ Պուշկինը գիտեր։

«Պուշկինը» ռեստորան է Սան Դիեգոյում, այդպիսի հաստատություններն Ամերիկայում շատ-շատ են, բայց դրանցից քչերի սեփականատերերի մտքով է անցել կոչել այն մեծագույն ռուս պոետի անունով։ Ազգությամբ հայ Հայկ Ղազարյանն այդ քչերից մեկն է։ Դժվար է կռահել, թե ինչու Պուշկին և ոչ թե, օրինակ, Սայաթ Նովա, ինչպես Չիկագոյի ռեստորաններից մեկի դեպքում է, որի տերը նույնպես հայ է։

Беспорядки в Сан-Диего у ресторана Пушкин
«Պուշկին» ռեստորանը Սան Դիեգոյում

 

Գուցե Հայկ Ղազարյանը սովորել է Երևանի Պուշկինի անվան դպրոցում և շատ է սիրել դպրոցը։ Բացառված չէ, որ մինչև ԱՄՆ տեղափոխվելը մեր հայրենակիցը Մոսկվայում է ապրել, հաճախ է այցելել Տվերսկայա փողոցի «Պուշկին» ռեստորանը, որտեղ ամեն ինչ բարձրագույն դասի է, և ցանկացել է նույնը կրկնել Կալիֆոռնիայում։ Չի կարելի բացառել նաև ամենապարզ տարբերակը՝ Հայկ Ղազարյանը սիրում է Պուշկինի բանաստեղծությունները։

ԱՄՆ-ում հետզհետե ազգային աղետի վերաճող անկարգությունները սկսվել են սպիտակամորթ ոստիկան Դերեք Շովինի ոչ պրոֆեսիոնալ գործողություններից։ Մահացել է սևամորթ ամերիկացի Ջորջ Ֆլոյդը։ Ոչ պրոֆեսիոնալ, քանի որ ծնկով սեղմելով գետնին պառկած Ֆլոյդի պարանոցը, ոստիկանը փակել է նրա շնչառությունը և բառացիորեն «գործն ավարտին հասցրել»։

Սա ամենևին էլ առաջին դեպքը չէ, երբ մաշկի տարբեր գույն ունեցող մարդկանց հակասություններով լցված վառոդի տակառը պայթում է։ Եվ Ամերիկան միակ երկիրը չէ, որտեղ արտահայտվում են այդ հակասությունները։ Բայց այն, ինչ այսօր տեղի է ունենում Նահանգներում, որոնք արդեն դժվար է «միացյալ» անվանել, գերազանցում է ամենավատ սպասելիքներն ու ավելի շատ պատերազմ է հիշեցնում, որտեղ հաղթողի դերում են կատաղած ամբոխներն ու կողոպտիչները։

Եվ անհնազանդության ալիքը`սեփական անպատժելիությունից և ոստիկանության անզորությունից էլ ավելի ոգևորված, վերածվեց ցունամիի, հասավ Կալիֆոռնիա, մտավ Սան Դիեգո, մոտեցավ «Պուշկին» ռեստորանին. իսկ նրանց ձեռքերին  քարեր, Մոլոտովի կոկտեյլներ ու մետաղական ձողեր էին (Երևանի հայտնի դեպքերից մեզ ծանոթ պատկեր)։ Իսկ ի՞նչ տեղի ունեցավ հետո։

Հայկ Ղազարյանը հասկացավ, որ ուր-որ է՝ իր ռեստորանը ջարդուփշուր կանեն, որ ինքը մենակ հաստատ  գլուխ չի հանի, առաջին պահին կարծեց` որևէ բան հնարավոր չէ անել։ Պարզվեց՝ հնարավոր է։

Հատված հայ ռեստորանատիրոջ՝ ամերիկյան հեռուստաընկերությանը տված հարցազրույցից․

«Ես հասկացա, որ պետք է ինչ-որ բան ձեռնարկել։ Իմ ընկերները` այստեղի հրեաները, հայերը, ռուսները, ուկրաինացիները, ադրբեջանցիները` բոլորը միավորվեցին։ Դե, բոլորը զենքի արտոնագրեր ունեն։ Մոտ տասը մարդ հավաքվեց՝ իմ ընկերները, ռեստորանի հյուրերը, որոնց հետ մենք միշտ ժամանակ ենք անցկացնում, որոնց այս ռեստորանն ամենից շատ է դուր գալիս։ Բոլորն իրենց հետ զենք էին վերցրել»,-պատմում է ռեստորանատերը։

Այնուհետև Ղազարյանն իր ընկերների հետ դուրս է գալիս և կանգնում հաստատության դռների մոտ։ Իրավիճակը լիակատար վերահսկելու համար ներսում որսորդական հրացաններով զինված երկու մարդ են թողնում։ Այսպես նրանք ուզում էին ցուցարարներին հասկացնել իրենց մտադրությունների լրջությունը։ Արդյունքում կատաղած ամբոխն ուղղակի անցնում է ռեստորանի կողքով, «Պուշկինին» ոչ ոք չի համարձակվում ձեռք տալ։

Այժմ ամենակարևորի մասին, որին մեր ընթերցողը գուցե և ուշադրություն չդարձրեց։ Ընդհանուր դժբախտությունից պաշտպանվելու համար միավորվեցին հայերը, հրեաները, ադրբեջանցիները, ռուսները, ուկրաինացիները...։ Վեցը մեկում։ Միևնույն գործում։

Մեզ համար այստեղ առանցքային բառը «ադրբեջանցին» է։ Ադրբեջանցին զենքը ձեռքին ելել է հայի ունեցվածքը պաշտպանելու՝ անհավանական երևույթ, բայց և ակնհայտ փաստ։ Չէ՞ որ այդ մասին անվստահելի մեկը չի պատմել, այլ Հայկ Ղազարյանը. սա այն դեպքն է, որ չի կարելի չհավատալ։ Այլ հարց է`ուզու՞մ ենք արդյոք հավատալ։ Ես ուզում եմ։

Մենք բոլորս Ջորջ Ֆլոյդ ենք․ԱՄՆ-ի բողոքի ակցիաները տարածվել են աշխարհով մեկ

...Երկու խոսք ակնհայտի մասին։ Հրկիզում ու ջարդուփշուր են անում ոչ միայն Սան Դիեգոյում, և տարբեր ազգությունների ամրակազմ տղամարդիկ բնակվում են ոչ միայն Սան Դիեգոյում, ու ամբոխի կամայականությունների դեմ վրդովվում ու բողոքում է ոչ միայն Սան Դիեգոն։ Բայց ամերիկացիների ինքնապաշտպանության մասին` զենքով կամ առանց զենքի, լուրեր չկան։ Ոստիկանությունը միայն տպավորություն է ստեղծում, թե ակտիվ է, իսկ ջարդարարները սոսկալի եռանդով իրենց գործն են անում։ Եվ ի՞նչ։

Ամերիկան պետք է ընտրություն անի ռասիզմի և անարխիայի միջև

Հարևաններից մեկը ռեստորանի մոտ կանգնած տղամարդկանց լուսանկարել է, և տեղադրել սոցիալական ցանցերում ու գրել. «Ռուսական մաֆիան է՝ մինչև ատամները զինված»։ ՌԻԱ Նովոստիի թղթակցին տված հարցազրույցում Ղազարյանն այդ մեղադրանքը կատակի վերածեց․«Ամերիկայում սիրում են այդ արտահայտությունը։ Պարզապես հավաքված մարդկանց մաֆիա են անվանում»։ Նրա խոսքով՝ չի պատրաստվում  հարևանին հակառակը համոզել՝ Աստված նրա հետ։ Կեցցե՛ս, Ղազարյան, Պուշկինը հավանություն կտար։

231
թեգերը:
ռուս, հրեա, ադրբեջանցի, Ռեստորան, հայ, սևամորթ, Բողոքի ակցիա, ԱՄՆ
Ըստ թեմայի
Կորոնավիրուսն ու ռուսական հետքը. ո՞ւմ են ձեռնտու ամերիկյան խռովությունները
«Հազիվ թե դատարանն իրեն լավ դրսևորի»․ Սիմոնյանը՝ ԱՄՆ-ում լրագրողների վրա հարձակման մասին
Մխիթարյանը միացել է Ջորջ Ֆլոյդին նվիրված նախաձեռնությանը. լուսանկար
Երևան. արխիվային լուսանկար

Տարօրինակ աշխարհ, կամ խելոք հավերի, թռչող թագավորների և փոխխոսնակ դարձած տաքսիստների մասին

287
(Թարմացված է 21:11 04.06.2020)
​Եկեք անկեղծ լինենք ու, շեղվելով կորոնավիրուսի մշտական դարձած թեմայից, խոստովանենք, որ աշխարհը գնալով ավելի ու ավելի տարօրինակ է դառնում։
Խելոք հավերի, թռչող թագավորների եւ խորհրդարանի փոխնախագահ դարձած տաքսիստների մասին

Կամ էլ աշխարհը նույնն է մնում, ուղղակի մենք ենք նոր բաներ իմանում աշխարհի մասին և գիտակցում, որ մեր նախկին պատկերացումները թերի էին և ոչ ամբողջական։ Թույլ տվեք այսօր մի քանի օրինակ բերել։

Շատերի նման ես էլ էի միշտ համոզված, որ հավը բավական անխելք թռչուն է։ Բա հո իզուր չի ժողովուրդն ասում՝ հավի խելք։ Այնինչ  ԲիԲիՍի-ի ինտերնետային կայքում կարդացի, որ իտալացի գիտնականները պարզել են՝  հավն ամենևին էլ այնքան պարզունակ էակ չէ, որքան մենք ենք պատկերացնում ու կարող է նույնիսկ բացահայտել աքլորի սուտը։ Աքլորները սովորություն ունեն ուտելիք գտնելիս, այսպես ասենք՝ պարային շարժումներ անել և հատուկ ձայներ արձակել, փորձելով գրավել հավերի ուշադրությունը։

Բայց երբեմն այդ ինքնասիրահարված աքլորներն այնքան են ձգտում դուր գալ հավերին, որ սկսում են պարել ու ձայներ արձակել նույնիսկ երբ ոչ մի ուտելիք էլ չեն գտնում։ Եվ պատկերացրեք՝ հավերը, ըստ հետազոտողների, շատ արագ հասկանում են դա ու լիովին կորցնում են հետաքրքրությունը այդ սուտասան և ինքնահավան աքլորների հանդեպ։ Իսկ դուք ասում եք՝ հավի խելք։

Ինձ թվում է, գոնե այս հարցում հավերը մեզանից ավելի խելոք են, որովհետև մենք շատ ավելի դյուրահավատ ենք ու պատրաստ ենք անընդհատ հավատալ այն մարդկանց, որոնք մեզ գայթակղիչ խոստումներ են տալիս, թեև վաղուց արդեն համոզվել ենք, որ նրանք հերթական ընտրություններից առաջ պարում ու ուրախ ձայներ են արձակում նույնիսկ այն ժամանակ, երբ դրա համար ոչ մի առիթ բացարձակապես չկա։

​Կամ վերցրեք թագավորներին։ Ինչպես ենք մենք սովորաբար պատկերացնում թագավորի կյանքը՝ երևի հայտնի երգի բառերով՝ կեր, խմի, քեֆ արա շարունակ։ Իսկ գիտեք արդյոք, թե վերջին քսան տարվա ընթացքում ինչով է զբաղվել Հոլանդիայի թագավոր Վիլեմ Ալեքսարդրը։ Մի անգամ նա գաղտնազերծել է. շաբաթը մոտ երկու անգամ ինքնաթիռ է վարել, իհարկե, մինչև այս կորոնավիրուսային սահմանափակումները։

Մարդկության պատմության մեջ առաջին անգամ տիեզերագնացներին ուղեծիր կհասցնի մասնավոր հրթիռը

Ու խոսքը բոլորովին էլ փոքրիկ անձնական ինքնաթիռի մասին չէ, թագավորը որպես երկրորդ օդաչու պարբերաբար նստել է նախկինում ազգային ուղևորափոխադրող համարվող Քեյէլէմ ավիաընկերության մեծ ինքնաթիռների ղեկին ու չվերթեր իրականացրել դեպի եվրոպական քաղաքներ։ Բա հո իզուր չէ, որ այդ ընկերությունը կոչվում է «Հոլանդական թագավորական ավիաուղիներ»։ Այսինքն՝ այդ մարդը որպես օդաչուների անձնակազմի անդամ պարբերաբար այցելել է տարբեր երկրներ, բայց այդ պետությունների իշխանությունները տեղյակ էլ չեն եղել, որ իրենց մոտ թագավոր է ժամանել։

​Ավելի անսովոր դեպք պատմեմ։ Երևանցի տաքսիստների հավերժական պատմությունները հո լսել եք. «Էդ հիմա է, որ ստիպված տաքսի եմ քշում, Մոսկվայից նոր եմ վերադարձել, էնտեղ կյանքն ուրիշ էր՝ ռեստորան ունեի Տվերսկոյի վրա, ով ասես գալիս էր՝ Ժիրինովսկի, Պուգաչովա, Ջիգարխանյան… Մի անգամ Պուտինը եկավ, ասացի Վլադիմիր Վլադիմիրիչ, ադրբեջանցիները նեղում են, մեզ մի երկու հատ «Իսկանդեր» է հարկավոր, ասաց՝ հարց չկա»… և այլն, և այլն։ Իսկ արդյոք պատկերացնում եք հակառակը՝ որ մարդ արտագաղթի, հեռավոր ինչ-որ երկրում տաքսի վարի, հետո վերադառնա հայրենիք ու միանգամից դառնա խորհրդարանի փոխխոսնակ։

Չեք հավատո՞ւմ։ Ուրեմն տեղյակ չեք Սոմալիի բնակիչ Մովլիդ Հուսեյն Գուհադի պատմությանը։ Տարիներ առաջ այդ մարդը մեր հազարավոր հայրենակիցների նման գնացել էր օտար ափերում բախտ որոնելու, հաստատվել էր Ֆինլանդիայում, որտեղ աշխատում էր որպես հասարակ տաքսու վարորդ։ 2016 տարվա ամռանը որոշել էր մի երկու շաբաթով գալ հայրենիք՝ հարազատներին տեսնելու։ Եկավ ու պարզվեց, որ Սոմիլիում խորհրդարանական ընտրություններ են սպասվում։ Մերձավորները սկսեցին համոզել Մովլիդին՝ թեկնածությունդ առաջադրիր, դու աշխարհ տեսած մարդ ես, եվրոպաներում ես ապրել։

«Ինչո՞ւ Խրուշչովը թույլատրեց զենք կիրառել բանվորների վրա». Անաստաս Միկոյան

Տաքսու վարորդը համաձայնեց ու ոչ միայն պատգամավոր դարձավ իշխող կուսակցության ցուցակով, այլև ընտրվեց Սոմալիի պառլամենտի փոխխոսնակ։ Ինչ կապ ունի՝ նախկինում օրենսդրական աշխատանքով ես զբաղվել, թե տաքսի վարելով՝ համաձայնեք՝ գլխավորը ճիշտ ժամանակին ճիշտ կուսակցության ցուցակում և ճիշտ տեղում հայտնվելն է։

287
թեգերը:
հավ, Սոմալի, փոխխոսնակ, տաքսի
թեմա:
5 րոպե Դուլյանի հետ
Ըստ թեմայի
Անհավանական, բայց իրական. տուգանվել է, պատիժ կրել, բայց տղամարդ է` ասել է ու արել
Աշխատելու համար թողեց դպրոցը, հետո դատապարտվեց պորտաբուծության համար. Բրոդսկին ու կյանքը
Գոնե խոսենք ավարտական երեկոյից զրկված մեր խեղճ շրջանավարտների մասին
Նիկոլ Փաշինյան

Փաշինյանի եթերը հուզել է վրացիներին. 18–ամյա Սանդրոն կոչ է արել օգնել Հայաստանին

386
(Թարմացված է 00:18 05.06.2020)
SARS-CoV-2 –ի հետ կապված` Հայաստանի վարչապետ Նիկոլ Փաշինյանի կոչը Թբիլիսի է հասել։

ԵՐԵՎԱՆ, 4 հունիսի –Sputnik. UWC Dilijan միջազգային քոլեջի շրջանավարտ Սանդրո Չումաշվիլին արձագանքել է երկրում կորոնավիրուսային վարակի հետ կապված տագնապալի իրավիճակի մասին` ՀՀ վարչապետ Նիկոլ Փաշինյանի խոսքին։ Sputnik Արմենիայի թղթակցի հետ զրույցում տղան պատմել է, որ հարևանների վիճակը թեթևացնելու համար ստորագրահավաք է կազմակերպել` կոչ անելով Վրաստանի կառավարությանը օգնել բարեկամական երկրին։ 

ՀՀ վարչապետ Նիկոլ Փաշինյանն այսօր առավոտյան կորոնավիրուսային վարակի հետ կապված իրավիճակը մտահոգիչ էր անվանել։ Երկրում անցած մեկ օրվա ընթացքում ռեկորդային թվով վարակվածներ են բացահայտվել։

«Այսօր լսել եմ ՀՀ վարչապետ Նիկոլ Փաշինյանի ուղերձն այն մասին, որ Հայաստանում անցած մեկ օրվա ընթացքում SARS-CoV-2 կորոնավիրուսային վարակի շուրջ 700 նոր դեպք է գրանցվել։ Վրաստանում կորոնավիրուսի հետ կապված իրավիճակն ավելի լավ է»,–ասել է Սանդրոն։

Նրա խոսքով` դա է առիթ դարձել, որ ինքը ստորագրահավաք կազմակերպի։ Սանդրոն նշել է, որ Վրաստանը կարող է և ինչ–որ առումով` պետք է օգնի եղբայրական Հայաստանին։

Կորոնավիրուսի տարածման դինամիկան Հայաստանում

Սանդրոն 18 տարեկան է, ծնվել և մեծացել է Թբիլիսիում։ Հայաստանը նրան հոգեհարազատ է, քանի որ վերջին երկու տարին սովորել է UWC Dilijan միջազգային քոլեջում։ Այդ քոլեջը նա համարում է տարածաշրջանում լավագույնը։ Սանդրոն այն ավարտել է 2020 թվականի մայիսին և արդեն ընդունվել ԱՄՆ–ի բուհերից մեկի տնտեսագիտության ֆակուլտետը։

«Դրանք իմ կյանքի լավագույն տարիներն էին։ Ես եղել եմ Տաթևում, շատ ընկերներ ունեմ Վանաձորից, ինչպես նաև բազմաթիվ ընկերներ եմ ձեռք բերել աշխարհի տարբեր երկրներից», – պատմել է Սանդրոն։

Այս տարիների ընթացքում բազմաթիվ իրադարձություններ են եղել, սակայն տղայի համար ամենահիշվողը Երևանում Ֆրանկոֆոնիայի գագաթնաժողովին նվիրված համերգն է եղել։

Ավելի վաղ Վրաստանի ԱԳՆ–ն հայտարարել էր կորոնավիրուսի դեմ պայքարում Հայաստանին օգնելու պատրաստակամության մասին։ Նշվում էր, որ համավարակի շրջանում Վրաստանի իշխանությունները մշտական կապի մեջ են հայկական կողմի հետ։

«Մի քանի օր առաջ հեռախոսազրույց է տեղի ունեցել երկու երկրների վարչապետների միջև։ Շփումները շարունակվում են նաև առանձին նախարարների մակարդակով։ Այսօր Վրաստանի և Հայաստանի արտգործնախարարները (Դավիթ Զալկալիանին և Զոհրաբ Մնացականյանը, – խմբ.) տեղեկություն են փոխանակել երկրում տիրող իրավիճակի մասին», – գրված է Վրաստանի ԱԳՆ–ի հայտարարության մեջ։

Մասնավորապես, Զալկալիանին համերաշխություն է հայտնել հայկական կողմին և Վրաստանի իշխանությունների անունից ևս մեկ անգամ պատրաստակամութուն հայտնել աջակցելու COVID-19–ի դեմ պայքարում։

Նշենք, որ հունիսի 4-ի դրությամբ Հայաստանում SARS-CoV-2 կորոնավիրուսի նոր տիպի 11221 դեպք է բացահայտվել, Վրաստանում` 801։

Հայաստանում կորոնավիրուսով վարակվածների թիվը մեկ օրում ավելացել է 515-ով և հասել 10524–ի

386
թեգերը:
Վրաստանի Հանրապետություն, կորոնավիրուս, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
Փաշինյանը զայրացել է. մի քանի տատիկ, պապիկ կմահանան միջոցառման պատճառով
Ինչ պետք է անի Փաշինյանը, որ հասարակությունը նորից հավատա իրեն
Օրվա կադր. Փաշինյանը ցույց է տվել` ինչպես է վարակակիրների թիվը ռեկորդային դառնում
Հայաստանում ևս 12 մարդ է մահացել կորոնավիրուսից
Համաճարակն ու Հայաստանը․ կորոնավիրուսը արագացնո՞ւմ է քաղաքական գործընթացները