Գոհար Նավասարդյանը

Խենթի պես սիրել կյանքը և չհանձնվել. ինչպես անվասայլակով աղջիկն աշխարհը մատչելի դարձրեց

1527
(Թարմացված է 19:33 03.10.2019)
Գեղեցկության և սպորտային մրցույթներում հաղթանակներ գրանցած անվասայլակով գեղեցկուհին` Գոհար Նավասարդյանը, չի դադարում պայքարել և վայելել կյանքը։ Իր վայրէջքների ու վերելքների մասին աղջիկը պատմել է Sputnik Արմենիային։

Կյանքը հիասքանչ է, կապ չունի՝ դու այն կանգնած, պառկած, թե նստած ես ապրում. վստահ է 29-ամյա Գոհար Նավասարդյանը, որն արդեն գրեթե 16 տարի է՝ տեղաշարժվում է անվասայլակի օգնությամբ։ Գոհարի ամեն օրը սկսվում է ժպիտով. նստում է ավտոմեքենան, շտապում ԱԻՆ աշխատանքի, ազատ ժամերին կամ մարզասրահում է, կամ կամավորական որևէ աշխատանք է կատարում... Հասցնում է սովորել, զբաղվել պարով, մասնակցել տարբեր միջոցառումների, բեմականացումների, մրցույթների։ Մի խոսքով, օրվա 24 ժամերից յուրաքանչյուրն իր առաքելությունն ունի։ 

Гоар Навасардян
© Sputnik / Asatur Yesayants
Գոհար Նավասարդյանը մարզվելիս

Վստահ է՝ կենսասիրության գաղտնիքը ոչ թե արտաքին աշխարհում է, այլ հենց մարդու մեջ։ Եթե կա խնդիր` կյանքն անիծելու փոխարեն կա’մ փորձիր այն լուծել, կա’մ քո դիրքորոշումը փոխիր։ Հենց այդպես Գոհարը սկսեց ավտոմեքենա վարել. արդեն հոգնել էր տաքսիստների անառողջ վերաբերմունքից, երբ, անվասայլակը տեսնելով, կարող էին պարզապես հրաժարվել իրեն ինչ-որ տեղ տանել, կամ ավելի գումար պահանջել միայն այն պատճառով, որ ուղևորը հաշմանդամություն ունի։

Գոհարը հաշմանդամություն է ձեռքբերել 14 տարեկանում՝ մենինգիտի հետևանքով: Բժշկական սխալի պատճառով նա այլևս չքայլեց։ Աղջկա պատանեկան ակտիվ առօրյան՝ վազելը, ընկերների հետ բակում խաղալը, արդեն միայն հիշողություն էին։ Ծանր էր, դժվար, անտանելի... Գլխին փուլ եկած աշխարհը Գոհարը սկսեց նորից փշուր-փշուր հավաքել։ Կյանքն այնքան կարճ է, պետք է կարողանալ պարզապես ապրել, յուրաքանչյուր իրավիճակ դիտարկել ոչ թե որպես դատավճիռ կամ խնդիր, այլ որպես հնարավորություն։

Առաջին կարևոր գործերից մեկը կրթություն ստանալն էր։ Ընդունվեց ԵՊՀ հոգեբանության ֆակուլտետ։ Խոստովանում է՝ ավարտական աշխատանքի պաշտպանությունն այնպիսի սթրես էր, որ ինքն իրեն խոստացել էր՝ էլ երբեք չի սովորելու։ Ամիսներ անց հասկացավ, որ կրթություն ստանալու ցանկությունը նորից է գլուխ բարձրացրել, այս անգամ էլ դիմեց Պետական կառավարման ակադեմիայի քաղաքագիտություն և քաղաքական կառավարում բաժնի մագիստրատուրա։

«Հիմա մտածում եմ, որ կարելի էր ինձ ավելի հոգեհարազատ մասնագիտություն ընտրել, որովհետև երբեք էլ չէի ցանկանա քաղաքականությամբ զբաղվել։ Բայց գոնե կառավարման հմտություններ ձեռք կբերեմ»,- ծիծաղելով պատմում է Գոհարն ու ավելացնում, որ զուգահեռաբար մեդիա դպրոցում սպորտային մեկնաբանի մասնագիտությունն է յուրացնում, որովհետև իր մեծ երազանքն է սպորտային իրադարձություններ մեկնաբանելը։Նման փորձ արդեն ունեցել է` մեկնաբանել է հաշմանդամ մարզիկների մրցույթներ։

«Մասնագիտությամբ սպորտային հոգեբան եմ, այն, ինչ կապված է սպորտի, մարդու հոգեբանության հետ, ինձ հարազատ է։ Ֆուտբոլիստների հոգեբանությունն եմ մի քիչ դժվարանում հասկանալ, երևի ֆուտբոլ չեմ խաղացել (միայն փոքր տարիքում դարպասապահ է եղել), այդ է պատճառը։ Բայց, հատկապես, երբ հաշմանդամ մարզիկներն են որևէ սպորտային մրցման մասնակցում, ես իրենց շատ լավ եմ հասկանում՝ նրանց հոգեվիճակը, պատրաստվածությունը»։

Гоар Навасардян
© Sputnik / Asatur Yesayants
Գոհար Նավասարդյանը մարզվելիս

Գոհարը հավատում է իր ուժերին, գիտի, որ այս հարցում էլ հաջողության կհասնի։ Նաև միշտ երազել է «Ռեալ Մադրիդում» սպորտային հոգեբան աշխատել, հիմա ավելի իրատեսական երազանք ունի՝ պարզապես որևէ սպորտային ակումբում աշխատել։

Գոհարն ինքն էլ է զբաղվում տարբեր մարզաձևերով, մասնակցում է բազմաթիվ մրցումների ու հաճախ հաղթանակով տուն վերադառնում։ Հոկտեմբերին պատրաստվում է մասնակցել Պաուերլիֆթինգի Հայաստանի առաջնությանը, հույս ունի պահպանելու իր չեմպիոնական տիտղոսը։

Հաշմանդամություն ունեցող հայուհու ձեռքբերումը պետք է վարակիչ լինի բոլորի համար. Թաթոյան

Նա ակտիվ է սպորտի հետ առնչվող բոլոր ոլորտներում։ Օրինակ` Պորտուգալիայում  հաշմանդամություն ունեցող լիդերների վերապատրաստման դասընթացից հետո հիմնեց Ֆուտբոլի՝ հաշմանդամություն ունեցող երկրպագուների ակումբ, որը ՀՖՖ–ի հետ համագործակցության արդյունքում ֆուտբոլային բոլոր հանդիպումներին հաշմանդամություն ունեցող երկրպագուներին մարզադաշտից հետևելու հնարավորություն է ընձեռում։

Սպորտից բացի Գոհարը նաև գեղեցկության մրցույթներն աչքաթող չի անում։ Օրինակ` վերջերս Չելյաբինսկում կայացած «Ծնվել եմ հաղթելու համար» գեղեցկության մրցույթում նա ճանաչվեց «Սպորտի թագուհի»։ Իսկ 2016 թվականին Հայաստանում անցկացվող Հաշմանդամ կանանց գեղեցկության մրցույթում արդեն հասցրել էր շահել «Հանդիսատեսի համակրանք» տիտղոսը։

Гоар Навасардян
© Sputnik / Asatur Yesayants
Գոհար Նավասարդյանը

«Ես կյանքը շատ եմ սիրում, անիմաստ է նվնվալ, բողոքել ինչ-որ բաներից։ Պետք է անել այն, ինչը քեզ հաճույք է պատճառում, արդյունքում՝ մոտիվացիայի աղբյուր դառնալ ոչ միայն նրանց համար, ովքեր ունեն քո խնդիրը, այլև ոչ հաշմանդամների»,- ասում է Գոհարը։

Զրույցի վերջում անկեղծանում է, որ բնականաբար յուրաքանչյուր կնոջ համար ամենամեծ երազանքն ընտանիք կազմելն է, մայր դառնալը։ Կարծում է՝ որ իր հաղթող տեսակն այս հարցում էլ չի թերանա։

1527
թեգերը:
սպորտ, հաղթանակ, Գեղեցկության մրցույթ, Գոհար Նավասարդյան, մարզիկը անվասայլակում, հաշմանդամ, Հայաստան
Ըստ թեմայի
Նիկոլ Փաշինյանը խոսեց հաշմանդամություն ունեցող մարդկանց խնդիրներից
Հեծանիվ չեն հորինել, բայց... Հայաստանում սկսել են հաշմանդամների սայլակներ արտադրել
«Կառավարության եզրակացությունը հակասում է հաշմանդամ երեխաների լավագույն շահին». Էդուարդ Իսրայելյան
29-ամյա հայուհին սայլակ օգտագործող հաշմանդամ կանանց գեղեցկության մրցույթի եզրափակիչում է
Նոր Մարաղա

«Տունն այնտեղ է, որտեղ մենք ենք, մնում է, որ մենք լինենք». Նոր Մարաղա, օր վերջին

407
(Թարմացված է 10:54 27.11.2020)
Sputnik Արմենիայի սյունակագիր Կարեն Ավետիսյանը պատմում է, թե ինչպես են Նոր Մարաղայի բնակիչները լքում իրենց հայրենի գյուղը։ Շատերը 30 տարվա ընթացքում արդեն երկրորդ անգամ են կորցնում իրենց տները։

Երբ թվում էր, թե պատերազմի բոլոր հարվածները հասցված են, բոլոր արցունքները` թափված, իսկ քարտեզը պատրաստ է վերագծման, հայտարարվեց, որ Մարտակերտի շրջանի ևս 7 գյուղ պետք է անցնեն Ադրբեջանի վերահսկողության տակ, իսկ գյուղերի բնակիչներն այդ մասին տեղեկացան լավագույն դեպքում վերջնաժամկետից 24 ժամ առաջ։

...Ճանապարհին հանդիպեցինք դեպի մեզ սլացող մի մեքենա, որի թափքին բառի ամենաբուն իմաստով տուն էր բարձած. ի՞նչը կարող է լինել ավելի տպավորիչ, բայց և ավելի ահարկու խորհրդանիշ Մարտակերտ հասնելուն ընդառաջ։

Грузовик перевозит каркас дома по трассе между Мартакертским и Аскеранским районами (18 ноября 2020). Карабах
© Sputnik / Karen Avetisyan
Տուն տեղափոխող մեքենան

«Բավական է պարզապես լսել գյուղերի անունները, որպեսզի պատկերացնեք ամբողջ ցավը` Նոր Մարաղա, Նոր Այգեստան, Նոր Սեյսուլան, Նոր Կարմիրավան, Նոր Հայկաջուր, Նոր Ջրաբերդ։ Մի քանի ժամվա ընթացքում այդ «նորը» կդառնա «հին», «մերը»` «օտար»»,- արձանագրեց վարորդն ու արգելակեց՝ ճամփեզրին տեսնելով վիրավոր կովին:

Жители деревень Мартакертского района умертвили домашний скот перед сдачей территорий азербайджанской стороне (18 ноября 2020). Карабах
© Sputnik / Karen Avetisyan
Ճանապարհին ընկած կովը

– Տղերք, ի՞նչ եք անում, – հարցրեց վարորդը ճանապարհի մեջտեղում դաշույնը կովի վզին պահած կասկածելի տղամարդկանց։

– Կովի միսը հասցնենք զինվորներին, սոված են։

Հենց որ միսը տեղափոխեցին թափք, մեքենան սլացավ սահմանի հակառակ ուղղությամբ` հաստատելով այն կասկածը, որ դժվար թե սառնամանիքին փողոցի մեջտեղում կով մորթեին զինվորների համար։

«Ասում են` պատերազմի ժամանակ ամենաակտիվը զինվորներն են, իսկ պատերազմից հետո՝ փրկարարներն ու թալանչիները: Փրկարարներին ինչ–որ չեմ տեսնում», - ճանապարհը քմծիծաղով շարունակեց սրամիտ վարորդը։

Նոր Մարաղա դեռ չէինք հասել, երբ գյուղից լսվեց խոզերի սրտապատառ ճղճղոցները։

– Ի՞նչ եք անում։

– Մորթում ենք խոզերին, որովհետև կենդանի վիճակում չենք կարողանա տանել, ընդամենը մի «Գազել» ենք վարձել, 100 հազար դրամ ա ուզում մեկ երթուղու համար, հազիվ կարողանանք տեղավորել մորթած միսը, որպեսզի կիլոն 1000 դրամով մի կերպ վաճառենք, «Գազելի» փողը հանենք։

Նմանատիպ մի «Գազել» էլ կողքի տան դիմաց էր կանգնած։ Այդ տանն ապրող կինը անասուն չէր պահում, ուստի թափքի մեջ դոշակներ էին, սպիտակեղեն ու կահ–կարասի, որի ընդհանուր արժեքը հազիվ թե գերազանցեր «Գազելի» վարձակալության 100 000–ը։

Жители села Нор Марага Мартакертского района Карабаха покидают свои дома перед сдачей территорий азербайджанской стороне (19 ноября 2020). Карабах
© Sputnik / Karen Avetisyan
Նոր Մարաղա

«Ի՞նչ տարօրինակ բան ա ճակատագիրը. Հին Մարաղայի ջարդից հետո հայրս տեղափոխվեց Նոր Մարաղա` տուն կառուցելու ... զրոյից: Նա Թումանյանի պես ասաց մեզ. «Ապրե՛ք, բայց մեզ պես չապրեք»: Բառեր, որոնցով հիմա ինքս եմ ստիպված դիմել երեխաներիս», - մտորեց գյուղի ալեհերներից մեկը։

«Ավրորան» միջազգային դրամահավաք է հայտարարում Արցախի բնակչության համար

Շատերի ցասումն ու բարկությունը կրկնապատիկ էր, քանի որ հաշված օրեր առաջ հրաժեշտ էին տվել սեփական տներին՝ իմանալով, որ սկսվել է լայնամասշտաբ պատերազմ, որի կիզակետում էր նաև Մարտակերտի շրջանը։ Թեպետ պարտությունից կոտրված ու դժբախտ, բայց շատերը հրադադարից հետո վերադարձել էին հայրենի գյուղ, նորից տեղավորվել` ապրեցնելով թեկուզ տխուր, բայց նոր կյանքի վերջին հույսը։ Ու հիմա օրեր անց ամենը տեղավորելուց հետո մի նոր տագնապ ու մի նոր գույժ, որը սպանում է ոչ միայն այն` վերջին մնացած «նոր կյանքի հույսը», այլև շատերի մոտ` երբևէ Արցախ վերադառնալու հեռանկարը։

- Լավ, հաղթանակը չստացվեց, բայց գոնե պարտությունը կարելի էր մարդավարի կազմակերպել, – ասաց տեղի բնակիչներից մեկն ու նեղսրտեց` գյուղի հանձնման լուրը ստանալուց մի քանի ժամ առաջ հույս ունեին, որ գոնե այդ գործընթացը պատշաճ կերպով կկազմակերպվեր:

Жители села Нор Марага Мартакертского района Карабаха покидают свои дома перед сдачей территорий азербайджанской стороне (19 ноября 2020). Карабах
© Sputnik / Karen Avetisyan
Նոր Մարաղա

- Օրինակ՝ ի՞նչ մասնագիտություն ունեք:

- Լրագրող եմ։

- Այսինքն` եթե ձեր տունը խլեն ձեզանից, դուք դեռ կկարողանաք անել ձեր գործը, իսկ մեր պարագայում դա պարզապես «հանձնած հող» չէ, այլ մեր ամբողջ եղած–չեղածը, մեր ամբողջ աղքատ հարստությունը, մեր ամբողջ կյանքը՝ դաշտեր, այգիներ, անասուններ, չիրականացած երազանքներ ու չփակած վարկեր:

Մեկ այլ տան շեմին խառնաշփոթի մեջ շվարած կանգնած էր մի տղա։ Պատմեց, որ չի կարողանում կենտրոնանալ և հասկանալ` այդ մնացած ժամերի ընթացքում ինչ անի` հավաքի ամբողջ համեստ ունեցվածքը, թե փորի գերեզմանն ու ծնողների աճյունները հանի։

– Մորս գերեզմանին երդում էի տվել, որ հարսանիքս սկսելու եմ շիրմաքարերի մոտից` ստանալով իր օրհնությունը։ Նույնիսկ այդ վերջին խոստումս կատարելու հնարավորություն չտվեցին...

Հերթական մորթված անասունի հառաչը մեզ ուղղորդեց դեպի գյուղի վերջին տներից մեկը, որտեղ տանտերերը` հայր և որդի, մեզ հրավիրեցին ներս, խնդրեցին օգնել, որ դատարկեն նկուղը, գոմը, քաղեն այգիներում մնացած նուռն ու խուրման։

Жители села Нор Марага Мартакертского района Карабаха покидают свои дома перед сдачей территорий азербайджанской стороне (19 ноября 2020). Карабах
© Sputnik / Karen Avetisyan
Նոր Մարաղա

– Պապ, բա՞ տունը չենք վառելու, – հարցրեց որդին։

– Ես չեմ կարողանա, ես եմ սարքել իմ ձեռքերով։ Էդ վառելու փոխարեն եկեք բոլորով մի վերջին անգամ խմենք, – պատասխանեց հայրն ու նկուղից հանեց իր այգու խաղողից թորած օղու վերջին կես լիտրը, տան մուտքի մոտ վառեց մի փոքր խարույկ, վրան տաքացրեց 3 հատ զինվորական պահածո ու բարձրացրեց բաժակը մի վերջին կենացով.

– Տունն այնտեղ է, որտեղ մենք ենք, մնում է, որ մենք լինենք։

Կենացն ընդհատեց սահմանի մյուս կողմից օդ արձակված զարկը։

– «Հրանոթային զարթուցիչն» ա, թուրքերն են, զգուշացնում են, որ արագացնենք, – ասաց հայրը` շտապելով վերջին ուղեբեռը լցնել մեքենայի բեռնախցիկ։

– Դու գնա, ես գալիս եմ, – հետևից բղավեց որդին` բենզինը լցնելով անվադողին և խարույկի վերցրած ծխացող մի փայտը ձեռքին այն գլորելով տան շեմից ներս։

1992 թվականի ապրիլի 10-ին ադրբեջանական միլիցիայի հատուկ նշանակության ջոկատը հրկիզել է Մարաղա գյուղը և կոտորել բնակչությանը։ Մարաղան մինչև հիմա շարունակում է մնալ Ադրբեջանի հսկողության տակ։ Մարաղայի ողբերգական դեպքերի ընթացքում 80-100 հայ է սպանվել, ավելի քան 40–ը` վիրավորվել, 63-ը՝ գերի վերցվել։ Սպանդը շարունակվել է ապրիլի 22-23-ին, երբ ողջ մնացած մարաղացիները վերադարձել են մահացածներին հողին հանձնելու։

1995 թվականին Արցախի Հանրապետության Մարտակերտի շրջանում կառուցվեց և վերաբնակեցվեց մի նոր գյուղ, որն անվանվեց Նոր Մարաղա՝ որպես կյանքի շարունակության նշան:

Որոնք են Ադրբեջանի վերահսկողության տակ անցած արցախյան 121 հայաբնակ համայնքները

407
թեգերը:
Արցախ, Ադրբեջան, Նոր Մարաղա
Ըստ թեմայի
Փոխանցվու՞մ է Ադրբեջանին, թե՞ ոչ․ Բերձորում խառը իրավիճակ է
Մենք չենք պատրաստվում փախչել որևէ տեղ. Նիկոլ Փաշինյան
Ադրբեջանցի զինծառայողները Սոթքի ոսկու հանքի մատույցներում են. տեսանյութ
Դոնալդ Թրամփ, Իվանկա Թրամփ, Ջարեդ Քուշներ

ԱՄՆ-ում իշխանափոխություն է սկսվել

97
(Թարմացված է 22:50 26.11.2020)
​Եկեք անկեղծ լինենք։ Դոնալդ Թրամփի ժամանակաշրջանն ավարտվեց ու թեև Ամերիկայի նախագահը առաջվա պես պնդում է, թե վիճարկելու է Ջո Բայդենի հաղթանակը համապատասխան մարմիններում, այնուհանդերձ նաև հրահանգ է տվել սկսելու իշխանության փոխանցումը իր մրցակցին։
Ամերիկայում նախագահության փոխանցման գործընթացը վերջապես սկսվեց. ինչ սպասել

Բայդենն էլ, իր հերթին, ներկայացրել է իր թիմի անդամներին և արդեն պարզ է, որ առաջիկա տարիներին Միացյալ Նահանգների քաղաքականությունը փոխվելու է մի շարք բնագավառներում, ընդ որում արմատապես է փոխվելու։ Բայց նախ այն մասին, թե ինչ է սպասում Դոնալդ Թրամփին և նրա ընտանիքին, որի անդամներից շատերը անմիջականորեն ներգրավված էին վերջին չորս տարիների քաղաքական և տնտեսական քաղաքական գործընթացներին։ Արևմտյան որոշ լրատվամիջոցներ համոզված են, որ Թրամփի ընտանիքի անդամներին ոչ մի լավ բան չի սպասվում։

​Թրամփի դեպքում սա բավական նուրբ թեմա է։ Տեսեք։ Եթե մարդը մեծահարուստ է և գալիս է իշխանության՝ նախագահ կամ վարչապետ է դառնում արդար ընտրությունների արդյունքում, էդտեղ, համաձայնեք, որևէ արգահատելի բան չկա, ամեն ինչ նորմալ է՝ իսկ ինչու պիտի մեծահարուստը պետության առաջնորդ չդառնա։ Նման օրինակները ողջ աշխարհում բազմաթիվ են։ Միշտ վկայակոչել եմ հենց Ամերիկայի Միացյալ Նահանգների առաջին նախագահի օրինակը՝ ախր Ջորջ Վաշինգտոնը շատ հարուստ էր, որոշ հաշվարկներով այն ժամանակ այնքան փող և ունեցվածք ուներ, որ կարող է համարվել Ամերիկայի ամենահարուստ նախագահը։

«Մենք պատրաստվում էինք հաղթելու, և, անկեղծ ասած, մենք հաղթել ենք»․ Դոնալդ Թրամփ

Բայց եթե մարդը ղեկավար է դարձել ոչինչ չունենալով և իշխանությունն օգտագործել է հարստություն դիզելու նպատակով, դա վատ է, շատ վատ, ամենաբացասական երևույթներից մեկն է ողջ աշխարհում։ Որովհետև ես որպես շարքային քաղաքացի այդ մարդուն ընտրել եմ իմ շահերը պաշտպանելու համար, իսկ նա իմ քվեն ստանալուց հետո առաջնային է համարել ոչ թե իմ, այլ իր սեփական շահերը։ Շատ լավ գիտեք, որ նման մեղադրանքներ են ներկայացվում նաև Հայաստանի որոշ նախկին ղեկավարների։ Չեմ ուզում խորանալ, որովհետև պարզապես հավաստի տեղեկություններ չունեմ։ 

​Ինչու եմ ասում, որ Թրամփի դեպքում հարցը շատ նուրբ է։ Ախր այդ մարդը մինչև նախագահ ընտրվելը հսկայական կարողություն ուներ, բայց հիմա նրա ընտանիքի անդամներին մեղադրում են, որ չարաշահել են իշխանությունը։ Մասնավորապես, «Ֆոկուս» գերմանական պարբերականը մի հոդված է զետեղել, որը վերնագրված է. «Արդյոք Թրամփի կլանը կհայտնվի ճաղերի հետևում։ Իվանկան և Ջարեդ Քուշները անսպասելիորեն սկսել են նյարդայնանալ»։ Գիտեք, իհարկե, որ Իվանկան Թրամփի աղջիկն է, իսկ Ջարեդն Իվանկայի ամուսինն է։

​Որոշ աղբյուրներ այդ զույգին մեղադրում են այն բանում, որ մեծ ֆինանսական եկամուտներ են ստացել միայն այն հանգամանքի շնորհիվ, որ Ամերիկայի նախագահը Դոնալդ Թրամփն է եղել։ Ավելին, կան մեկնաբաններ, որոնք ասում են՝ ինչու է Թրամփը այդքան կառչած մնում նախագահական աթոռից, միայն մի պատճառ կա՝ զրկվելով այդ աթոռից, նա կարող է զրկվել կամ ազատությունից, կամ հարստությունից, կարծիք է հայտնում լրագրող Սանդրա Ուորդը։

​Բայց ապագային նայենք։ Ինչպես կփոխվի Ամերիկայի քաղաքականությունը նոր նախագահի՝ Ջո Բայդենի օրոք։ Նախ, ներքին քաղաքականության մասին, որը նաև մեր հայրենակիցներին է հետաքրքրում։ Եթե Թրամփը պատ էր կառուցում Մեքսիկայի սահմանին և ուզում էր վերջնականապես հրաժարվել այսպես կոչված «գրին քարտի» ամենամյա վիճակահանությունից, նոր կառավարության քաղաքականությունն այս բնագավառում կարող է ճիշտ հակառակը լինել։ Արդեն հայտնի է, որ Ջո Բայդենն արտգործնախարար է նշանակելու իր երկարամյա մերձավոր Էնթոնի Բլինքենին, իսկ այդ մարդը միշտ ասել է՝ մենք ոչ թե պիտի պատեր կառուցենք, այլ ամեն ինչ անենք, որպեսզի այլ երկրներում մարդիկ բարեկեցիկ կյանքով ապրեն և չձգտեն ամեն գնով հայտնվել Միացյալ Նահանգներում։

Զարմանալի ընտրություններ, կամ ԱՄՆ նախագահ դարձավ Ջո Բայդենը, բայց վերընտրվեց Դոնալդ Թրամփը

​Ամերիկայի նոր վարչակազմը, ամենայն հավանականությամբ, նաև կվերականգնի հարաբերությունները Առողջապահության համաշխարհային կազմակերպության հետ։ Բայց մեզ համար ամենակարևորը՝ իրական նախադրյալներ կան, որ Ջո Բայդենի կառավարությունը կվերականգնի բնականոն հարաբերությունները մեր հարևան Իրանի հետ։ Համենայնդեպս, շատ որոշակի հույսեր կան։

 

97
թեգերը:
Ջո Բայդեն, Դոնալդ Թրամփ, ԱՄՆ
թեմա:
5 րոպե Դուլյանի հետ
Ըստ թեմայի
ԱՄՆ–ն 5 միլիոն դոլար օգնություն կտրամադրի Հայաստանին ու Ադրբեջանին
Սպիտակ տանը մեկ նախագահի տեղ կա. տարօրինակ իրավիճակ ԱՄՆ-ում՝ ընտրություններից հետո
ԱՄՆ–ն հետաքննություն է սկսել Հայաստանից ներկրվող փայլաթիթեղի գործով
Վարչապետը հանդիպել է «Յունիքոմփ» ընկերության գլխավոր տնօրեն Արմեն Բալդրյանի հետ

Վարչապետը կրկին հանդիպել է որոշ գործարարների հետ

0
(Թարմացված է 17:36 27.11.2020)
Քննարկվել են կառավարություն-գործարար միջավայր կապի ամրապնդմանը, տնտեսական լավատեսության վերականգնմանը վերաբերող հարցեր։

ԵՐԵՎԱՆ, 27 նոյեմբերի - Sputnik. ՀՀ վարչապետ Նիկոլ Փաշինյանը շարունակում է հանդիպումները գործարար դաշտի ներկայացուցիչների հետ՝ Հայաստանի տնտեսական ակտիվության, ներդրումային միջավայրի վերականգնման հարցեր քննարկելու նպատակով: Տեղեկությունը հայտնել է ՀՀ կառավարության մամուլի ծառայությունը։

Երկու քայլ այն կողմ թուրքերն են. ի՞նչ կարող են ակնկալել արցախյան գործարարները

Այսօր վարչապետը հանդիպել է «Յունիքոմփ» ընկերության գլխավոր տնօրեն Արմեն Բալդրյանի և «Գրանդ Թորնթոն Հայաստանի» խորհրդի նախագահ Գագիկ Գյուլբուդաղյանի հետ:

«Այսօրվա հանդիպումների ընթացքում ևս քննարկվել են կառավարություն-գործարար միջավայր կապի ամրապնդմանը, ներդրումային ծրագրերի շարունակականության ապահովմանը, տնտեսական լավատեսության վերականգնմանը վերաբերող հարցեր»,–ասված է հաղորդագրության մեջ:

Премьер-министр Никол Пашинян встретился с председателем правления компании Гранд Торнтон Айастан Гагиком Гюлбудагяном (27 ноября 2020). Еревaн
© Photo / official site of the Prime minister of RA
Վարչապետը ընդունել է ««Գրանդ Թորնթոն Հայաստանի» խորհրդի նախագահ Գագիկ Գյուլբուդաղյանին

Տեղեկացվում է, որ գործարար համայնքի ներկայացուցիչների հետ հանդիպումները կրում են շարունակական բնույթ:

Ավելի վաղ վարչապետը հանդիպել էր Արդյունաբերողների և գործարարների միության նախագահ Արսեն Ղազարյանի, «ՍԻԼ կոնցեռն» ընկերության հիմնադիր Խաչատուր Սուքիասյանի, «Ալեքս հոլդինգ» ընկերության հիմնադիր Սամվել Ալեքսանյանի, «Սովրանո» ընկերության սեփականատեր Արման Սահակյանի, «Սպայկա» ընկերության սեփականատեր Դավիթ Ղազարյանի, «Մենյու էյէմ» ընկերության հիմնադիր Վահան Քերոբյանի հետ։

Նոյեմբերի 25–ին էլ ՀՀ վարչապետը ընդունել էր «Հայաստանի էլեկտրական ցանցեր» ընկերության գլխավոր տնօրեն Կարեն Հարությունյանին, «Գազպրոմ Արմենիա» ՓԲԸ վարչության նախագահ-գլխավոր տնօրեն Հրանտ Թադևոսյանին, «ՌԵՆՇԻՆ» շինարարական-ներդրումային ընկերության գլխավոր տնօրեն Էդուարդ Մարությանին, «Նուշիկյան ասոցիացիա» ընկերության հիմնադիր նախագահ Գարեգին Նուշիկյանին:

0
թեգերը:
Հայաստան, գործարար, Վարչապետ, Նիկոլ Փաշինյան
Ըստ թեմայի
«Վերադարձրեք մեր էրեխեքին». ժամկետային զինծառայողների ծնողները մեծ ակցիա կիրականացնեն
Սպառողների համար խմելու ջրի սակագինը կմնա անփոփոխ
Սա ավելի շատ գլխացավանք է բերում, քան օգուտ. Անի Սամսոնյանը` ռազմական դրության մասին