Արարատ-73

«Խելահեղ» Ֆալյանը. մարզիչ, որը ստեղծեց ոսկե «Արարատի» հիմքը

201
(Թարմացված է 20:17 24.09.2019)
Կոշտ և պահանջկոտ Ֆալյանը ոչ մեկի խորհուրդները չի ընդունել կազմը ձևավորելիս. նա վերցրել է այն խաղացողներին, որոնց արժանի է համարել:

1970–ականների սկզբին «Արարատ» ֆուտբոլային ակումբի հաջողությունները կապում են Նիկիտա Սիմոնյանի անվան հետ, և դա արդարացի է, բայց ոչ լիովին։ Հաղթանակների հիմքերը դրվել են մեկ տասնամյակ առաջ՝ Արտեմ Ֆալյանի կողմից, ինչը, ի դեպ, միշտ նշում է Սիմոնյանը։ Տաքարյուն և պահանջկոտ Ֆալյանը կարողացել է ընտրել և դաստիարակել խաղացողների. նրան ոչ բոլորն են սիրել, բայց հարգել են բոլորը։

Երբ 1967թ-ին ԽՍՀՄ-ում նշվել է հոկտեմբերյան հեղափոխության կեսդարյա հոբելյանը, հիմնական հանդիսությունները, իհարկե, կայացել են Լենինգրադում։ Բայց տոները, նույնիսկ գաղափարապես ամենահաջող, ևս մեկ առիթ են՝ հիշելու բաների մասին, որոնք, թվում է՝ ոչ մի կապ չունեն գաղափարախոսության հետ։

Օրինակ, ֆուտբոլի մասին։ Բանն այն է, որ Լենինգրադի «Զենիթը» հեռավոր նոյեմբերին անհուսալիորեն եզրափակել է միութենական առաջնության մրցաշարային աղյուսակը, և Ռուսաստանի հյուսիսային մայրաքաղաքի հայրերն օգտագործել են հեղափոխական հոբելյանը, որպեսզի լուծեն հարցը վերին ուժերի միջամտությամբ։ Վերին ուժերն առանց երկար մտածելու հրամայել են հաջորդ տարի ավելացնել թիմերի քանակը բարձրագույն լիգայում` «Զենիթը» թողնելով ֆուտբոլային վերնախավում։

Բայց խաղի հետ պետք էր ինչ–որ բան անել, և 1968թ.–ին ակումբը գլխավորել է Արտյոմ Ֆալյանը, որն այդ ժամանակ լքել է «Արարատը»։ Նոր մարզիչը կարճ ժամանակում աութսայդերին միջակ թիմ է դարձրել, և լենինգրադցիները մոռացել են աղյուսակում վերջին հորիզոնականների մասին։

Երբ Ֆալյանը հեռացել է «Արարատից»՝ այսպիսի արտահայտություն է արել. «Այդ տղաները մի քանի տարի անց կդառնան երկրի չեմպիոններ»։ Նրան այդ ժամանակ լուրջ չեն ընդունել և հերթական անգամ սխալվել են, չէ՞ որ նա «Արարատ» է գնացել 1965թ.–ին` այն առաջին լիգայից վերադարձնելով բարձրագույն։ Բոլորը մտածում էին, որ ոչ երկար ժամանակով, բայց պարզվեց` ընդմիշտ։

Կոշտ և պահանջկոտ Ֆալյանը ոչ մեկի խորհուրդները չի ընդունել կազմը ձևավորելիս. նա վերցրել է այն խաղացողներին, որոնց արժանի է համարել, իսկ հետո գործադրել բոլոր ջանքերը թե՛ նրանց, թե՛ իր, որպեսզի նրանց իսկական ֆուտբոլիստ դարձնի։ Նրանք, ովքեր չեն դիմացել, հեռացել են, մնացողները խաղացել են նոր մակարդակով։

«Արարատի» հետ Ֆալյանն անցկացրել է քրտնաջան, երբեմն տանջալից աշխատանքի երեք տարի։ Նա իր հետ բերել է միայն Դավիթ Պայիսին, որը Երևանում երկու լավ խաղաշրջան է անցկացրել: Մնացած խաղացողներին` ապագա չեմպիոններին, մեծամասամբ հավաքել է տարբեր տեղերից։

Օրինակ, Ֆալյանը չի ընդունել «միոտանի» ֆուտբոլիստներին` նրանց, ովքեր խաղում են միայն մեկ ոտքով։ Նրա համար կարևոր է եղել երկու ոտքով հարվածին տիրապետելը, և եթե ինչ–որ մեկը հիանալի խաղում էր աջով, բայց ձախով` ոչ, ստիպում էր մարզվել միայն ձախ մարզակոշիկով. ուզած–չուզած՝ կսովորեին այդ ոտքով հարվածել։

Ֆալյանը տանել չէր կարողանում, երբ ֆուտբոլիստը խաղում էր` աչքերը հառած գնդակին. նա նման խաղացողների պարանոցին հաստ շարֆ էր կապում, որպեսզի չկարողանան ներքև նայել։ Արկադի Անդրեասյանը նման խաղաոճը հասցրել էր վիրտուոզության. ցանկացած մարզադաշտ քարանում էր հիացմունքից, երբ նման բացառիկ ֆուտբոլիստի խաղ էր տեսնում: Ամեն ինչից զատ, դա նաև խիստ նյարդայնացնում էր մրցակցին։

«Խելահեղ, անզուսպ և անզիջում» Ֆալյանը, ինչպես նրան անվանել է Նիկիտա Սիմոնյանը, դրել է երևանյան ակումբի ապագա հաղթանակների հիմքը։ Նա երբեք չի մարզել առաջատար խորհրդային թիմերը, նրանց հետ գավաթներ ու մեդալներ չի նվաճել, բայց ցանկացած ակումբի հետ նրա աշխատանքից հետո այդ կոլեկտիվը վստահություն է ձեռք բերել. եթե անգամ եղել են ձախողումներ, ուրեմն եղել են հաջորդների մեղքով։ «Արարատի» դեպքում ամեն ինչ հիանալի է ստացվել. թե՛ Պոնոմարյովը, թե՛ Գլեբովը, թե՛ Սիմոնյանը պահպանել են Ֆալյանի սկսածը և ավելացրել իրենցը, դրա համար էլ ստացվել է։

Իսկ Ֆալյանը գնացել է ուրիշ թիմեր, որոնք պետք էր ոտքի կանգնեցնել` «Զենիթ», «Շախտյոր», «Կայրատ»… Այս տարին հոբելյանական է մարզչի համար` նա ծնվել է ուղիղ մեկ դար առաջ։

Ափսոս, նա վաղաժամ հեռացել է կյանքից Լենինգրադում 1977թ.–ի սեպտեմբերի 24–ին։ Մարզիչը, որը դեռ չէր դարձել 58 տարեկան, այդ ժամանակ աշխատում էր Նուկուսի «Ամուդարյա» երկրորդ լիգայի թիմում` երազելով հասնել առաջին։ Բայց այդ անգամ չի ստացվել։

201
Ըստ թեմայի
Անվախ դարպասապահը. ինչպես Ալյոշա անունը դարձավ հայկական ֆուտբոլի խորհրդանիշը
Ֆուտբոլ` առանց մրցակիցների. ինչո՞ւ Անդրեասյանին թույլ չտվեցին խաղալ Չիլիում
Ինչպես Լենինը դարձավ ութերորդ համարի խաղացող. Լևոն Իշտոյանի հոկտեմբերը
Վերցրել են իմ միտքն ու խեղաթյուրել այն. քանդակագործը` «Արարատ–73» արձանախմբի մասին
Ալֆրեդ Տեր–Մկրտչյանն Օլիմպիական խաղերում

Շվեյցարիայի հավաքականի հայ մարզիչը. որ խորհուրդներն են առաջնորդել Ալֆրեդ Տեր-Մկրտչյանին

114
(Թարմացված է 09:04 29.05.2020)
Անվանի ըմբշամարտիկ, աշխարհի ու Եվրոպայի չեմպիոն, ԽՍՀՄ-ի և Գերմանիայի դրոշների ներքո հանդես եկած Ալֆրեդ Տեր-Մկրտչյանը Sputnik Արմենիայի հետ զրուցում պատմել է ամենահիշվող մրցաշարի, օլիմպիական խաղերի եզրափակիչում ձախողման պատճառի մասին, հիշել զավեշտալի մի դեպք։

Խաչիկ Չախոյան, Sputnik Արմենիա

90-ականների սկզբին հունահռոմեական ոճի ըմբշամարտիկ Ալֆրեդ Տեր-Մկրտչյանը համաշխարհային մակարդակի յուրաքանչյուր մրցաշարում հաղթողի հիմնական հավակնորդներից մեկն էր: Իսկ 1992 թվականի օլիմպիական եզրափակիչը կարող էր լրիվ այլ ազդեցություն ունենալ հետագայում բազմաթիվ տիտղոսներ նվաճած ըմբշամարտիկի համար:

Չմոռացվող գոտեմարտը

1992 թվականի Բարսելոնայի օլիմպիական խաղերում Ալֆրեդ Տեր-Մկրտչյանը շատ մոտ էր բաղձալի երազանքին՝ օլիմպիական ոսկե մեդալին: Եզրափակչում նորվեգացի Յոն Ռյոնիգենի հետ մրցելիս` հայ ըմբիշը որոշեց չգրոհել, ռիսկի չդիմել և վերջին վայրկյանին բաց թողեց մրցակցի գրոհն ու պարտվեց։

Выступающий за Германию борец Альфред Тер-Мкртчян (в красном) и кореец Квон-Хо Сим во время греко-римской борьбы (54кг) на Олимпийских играх (25 сентября 2000). Сидней
© AFP 2020 / KIM JAE-HWAN
Ալֆրեդ Տեր–Մկրտչյանը Եվրոպայի առաջնությունում

«Ոչ մի ըմբիշի չեմ ցանկանա` այնպիսի զգացումներ ունենա, ինչպիսին ես ունեցա եզրափակիչ գոտեմարտից հետո: Համոզված եմ, որ նման զգացում ունեցել է լեգենդար ըմբիշ Ալեքսանդր Կարելինը, որը պարտվել է Սիդնեյի օլիմպիական խաղերի եզրափակչում»,- ասում է Ալֆրեդը:

Ճիշտ է, դա Կարելինի 4–րդ ոսկե մեդալը կլիներ օլիմպիադաներում, բայց մարզիկը կարծում է, որ այդ պարտությունը ևս մեծ ցավ պատճառել նրան։

Սթրես, վթարներ ու վերադարձ

Օլիմպիադայի եզրափակիչում ցավալի պարտությունը շատ ծանր հետևանքներ ունեցավ Ալֆրեդ Տեր- Մկրտչյանի համար։ «Որոշել էի ավարտել մարզական կարիերաս: Գոտեմարտի վերջին վայրկյանը միշտ աչքիս առաջ էր: Երկու անգամ, մտքերով տարված, լուրջ ավտովթարի ենթարկվեցի: Կարելի է ասել, որ խաչ էի քաշել ըմբշամարտի վրա»,–պատմում է Ալֆրեդը:

Բայց Գերմանիայում ապրող նրա ծանոթները առաջարկում են մասնակցել տեղի ակումբային մրցաշարերին: Ու երբ մեկնում է Գերմանիա, նոր միջավայրը տրամադրում է կրկին մարզվելու, գորգը կրկին ձգում է, և նա վերադառնում է սիրած մարզաձևին։

Որոշիչ խորհուրդներ

Իր մարզական կարիերայում Ալֆրեդ Տեր-Մկրտչյանը մարզվել ու շփվել է շատ մարդկանց հետ, բայց, ինչպես ինքն է ասում` երբեք չի մոռանում որոշ խորհուրդներ, որոնք իրեն օգնեցինք ըմբշամարտում հաջողություններ հասնելու գործում։

Պատանեկան տարիքում մարզիչ Հրաչ Դադոյանն ասել է, որ առաջնայինը կարգապահությունն է, և պետք է գորգի վրա  հավասար պայմաններում բաց գոտեմարտել, այդ դեպքում արդյունքի հասնել հնարավոր է:

Հունահռոմեական ոճի ըմբշամարտի Հայաստանի հավաքականի նախկին գլխավոր մարզիչ Արամ Սարգսյանն էլ միշտ խորհուրդ է տվել չառանձնացնել ոչ մի մրցաշար, այլ յուրաքանչյուր գոտեմարտի դուրս գալ որպես սովորական մրցման:

«Եվ վերջապես հավաքների ժամանակ ես նույն սենյակում էի օլիմպիական չեմպիոն Մնացական Իսկանդարյանի հետ: Մի անգամ մարզումից հետո հոգնած եկա սենյակ, հագուստս ու պայուսակս գցեցի ու գնացի լողափ: Երբ հետ եկա, տեսա, որ Մնացականը իմ շորերը հանել է պայուսակից ու կախել, որպեսզի չորանան: Իմ մոտ անմիջապես փոխվեց վերաբերմունքը ամեն ինչի նկատմամբ», - ասում է Ալֆրեդը:

«Դավաճան» վերելակը

1992 թվականի Եվրոպայի առաջնության եզրափակիչ գոտեմարտերից առաջ որոշ ըմբշամարտիկներ կարող է և չներկայանային մրցումներին, որովհետև անհարմար վիճակի մեջ էին հայտնվել, որը հետո որպես զավեշտալի դեպք պետք է հիշեին։

Անփոխարինելի մարզիչը, կամ զգացողություն, որը հայ ըմբշամարտիկից «խլեց» օլիմպիական ոսկին

«Մենք 5-6 ըմբիշներով նստեցինք վերելակ, ընդ որում`մեզանից չորսը պետք է եզրափակչին մասնակցեին, ու վերելակը կանգնեց: Մոտ կես ժամ սպասում էինք, թե ո՞վ մեզ կօգնի դուրս գալ: Երբ վերջապես դուրս եկանք վերելակից, Միխայիլ Մամիաշվիլին գոռում էր բոլորիս վրա։ Բայց բարեբախտաբար հաջողվեց այլ երկրի հավաքականի ավտոբուսով հասանել մարզադահլիճ»,- հիշում է Տեր-Մկրտչյանը: Հենց այս մրցաշարում, եզրափակիչում հայ ըմբիշը, հաղթանակի հասնելով բուլղարացի Բրատան Ցենովի նկատմամբ, դարձավ Եվրոպայի չեմպիոն:

Շվեյցարիայի հավաքականի հայ մարզիչը

2017 թվականի հունվարից 3 ամիս գլխավորելով Շվեյցարիայի հունահռոմեական ոճի ըմբշամարտի հավաքականը` Ալֆրեդ Տեր-Մկրտչյանը պայմանագիր ստորագրեց շվեյցարացիների հետ ու մինչև օրս այդ երկրի հավաքականի գլխավոր մարզիչն է։

«2018 թվականի Եվրոպայի երիտասարդական առաջնությունում շվեյցացարցի երեք ըմբիշ գոտեմարտեցին բրոնզե մեդալի համար: Նման նախադեպ Շվեյցարիայում չէր եղել: Մեկ ամիս անց երիտասարդների աշխարհի առաջնությունում ունեցանք փոխչեմպիոն»,- ասում է Տեր- Մկրտչյանը և հավելում, որ փորձում է փոխել շվեյցարացիների հոգեկերտվածքը ըմբշամարտի հետ կապված:

Հայկական ըմբշամարտի ձեռագիրը

Այսօր աշխարհում հայտնի են հայ ըմբիշներից շատերը, գնահատված է հայկական ըմբշաարտի յուրահատուկ ձեռագիրը: Արմեն Նազարյանը Բուլղարիայի ազգային հավաքականի գլխավոր մարզիչն է, Ալֆրեդ Տեր- Մկրտչյանն էլ` Շվեյցարիայի: Ու, ընդ որում, այս երկու երկրների հավաքականները հաճախակի հավաքներ են անցկացնում Հայաստանի ընտրանու հետ։

«Ըմբշամարտի հայկական դպրոցի ձեռագիրը հայտնի է բոլորին: Մենք ունենք նաև յուրահատուկ ոճ, որը մեր ըմբիշներից շատերին ապահովել է հաղթանակ տարբեր կարգի մրցումներում: Դրա համար հայ ըմբիշների հետ մարզվելը միայն օգուտ է տալիս բոլորին»,–ասում է Տեր–Մկրտչյանը:

Հայաստանի միակ տիտղոսակիր եռացատկորդը. Մարտիրոսյանն օլիմպիադայում կանգնեց ուժեղների կողքին

Աշխարհի ու Եվրոպայի չեմպիոն, բազմակի մրցանակակիր, օլիմպիական արծաթե մեդալակիր Ալֆրեդ Տեր- Մկրտչյանի անցած ճանապարհը ըմբշամարտում ուսուցողական է շատ ըմբիշների համար: Նա ասում է` շատ կարևոր է, որ մարզիչը կարողանա հոգեբանորեն տրամադրել իր մարզիկին անել ավելին: Նրա խոսքով` մարզիչը նաև ուժեղ հոգեբան պետք է լինի: Կարճ ասած`եթե շվեյցարացի որևէ ըմբիշ ցանկանում է հասնել մեծ արդյունքների, ընդամենը պետք է լսի հավաքականի ազգությամբ հայ գլխավոր մարզչին:

114
թեգերը:
Շվեյցարիա, Օլիմպիական խաղեր, Եվրոպայի ըմբշամարտի առաջնության, Ըմբշամարտի աշխարհի առաջնություն, ըմբշամարտիկ, Ալֆրեդ Տեր-Մկրտչյան
Ըստ թեմայի
Մրցավարներն առնվազն 5 մեդալ են «խլել» հայ ըմբիշից, կամ ինչպես գորգին հայտնվեցին 3 մարզիկ
Հայաստանի հավաքականի առաջին գոլը պաշտոնական խաղերում. ինչ «ավանդույթ» ուներ մեր ընտրանին
«Ռուսական հայ» Պոդշիվալովի արկածները Երևանում, կամ ինչու հեռացրին մարզիչ Անդրեասյանին
Եթովպիա

Այբուբենների նմանություն, Կոմիտասի ազդեցություն, հոգևոր կապեր. հայկական հետքը Եթովպիայում

251
(Թարմացված է 00:04 29.05.2020)
Եթովպիայի հայությունն աներևակայելի հարուստ պատմություն ունի։ Բազմաթիվ պատումներ կան պալատական հայերի և եթովպական մշակույթի վրա նրանց ունեցած ազդեցության մասին։ Sputnik Արմենիան ի մի է բերել դրանք։

Հայաստանի և Եթովպիայի լեռների միջև հեռավորությունը 3466 կմ է՝ ուղիղ գծով գնալու և Կարմիր ծովը կտրելու դեպքում։ Իհարկե, խելագար միտք է, բայց այդ երկրում հայկական հետք ունեցող բազմազան պատմությունները հետաքրքրություն են առաջ բերում և դրդում են ճամփորդել, ճիշտ է՝ հիմա միայն համացանցի սահմաններում։ Ի դեպ, երկու երկրների ժողովուրդների միջև անհավատալի նմանություններ կգտնեք, կան նաև մի շարք առասպելներ, որոնց մասին էլ այսօր կպատմենք։

Պետական տոները

Հայաստանում մայիսի 28-ին պետական տոն են նշում։ Դարեր շարունակ առանց պետականության մնացած հայ ժողովուրդը 102 տարի առաջ այս օրը հռչակեց Հայաստանի առաջին հանրապետությունը։ Համայն աշխարհի հայերը հիշում են Սարդարապատի, Բաշ-Ապարանի, Ղարաքիլիսայի ճակատամարտերի հերոսներին։ Այդ մարտերը կենաց ու մահու կռիվ էին։

Аддис Абеба
Ադիս Աբեբան

Իսկ Եթովպիայում մայիսի 28-ը համարվում է 1991 թվականի քաղաքացիական պատերազմի ավարտի օր և դեմոկրատական հանրապետության հաստատումը նշանավորող Ազգային տոն։

Երկու երկրների փոխհարաբերությունները

Եթովպիայի հայերի մասին հիշատակումներ կարելի է գտնել Մովսես Խորենացու աշխատություններում։ «Հայոց պատմության» մեջ նրա գրում է, որ դեռևս մ․թ․ա․ 12-րդ դարում Եթովպիայում առնվազն մեկ հայ էր ապրում՝ Զարմայր Նահապետը, որը Տրոյական պատերազմում եթովպական զորքերի հրամանատարն էր։ Այդ ժամանակներից էլ երկու երկրների միջև սերտ համագործակցություն է սկսվել, հատկապես առևտրի ոլորտում։ Ասում են նույնիսկ, որ հենց հայերն են առաջին անգամ արտահանել եթովպական սուրճը և տարածել Եվրոպայում։

Կրոնն ու եկեղեցական կապերը

Ավանդաբար երկու երկրների եկեղեցիները սերտորեն փոխկապակցված են, քանի որ երկուսն էլ հին արևելյան եկեղեցիների թվին են պատկանում և երկուսն էլ ստիպված են եղել պայքարել օսմանյան նվաճողների դեմ։ 15-րդ դարում հայոց սրբի՝ Գրիգոր Լուսավորչի և նահատակներ սուրբ Հռիփսիմեի և սուրբ Գայանեի վարքագրությունները թարգմանվել են հին եթովպական գեեզ լեզվով։ Եթովպական եկեղեցին տարին երեք անգամ նշում է Սուրբ Գրիգորի տոնը, մեկ անգամ էլ՝ Հռիփսիմեի և Գայանեի տոնը։

Կորուսյալ քաղաքի գանձերը. ինչ են հայտնաբերել Եթովպիայում

Էջմիածնում 14-15-րդ դարերի եթովպական ձեռագրերի հատվածներ են պահվում։ Հայաստանում ժամանակին հաճախ կարելի էր հանդիպել եթովպացի հոգևորականների։ 1867թ․-ին Եթովպիայում բացվեց հայկական կրոնական առաքելությունը։ Այդ ժամանակից ի վեր եկեղեցական կապերն ավելի աշխուժացան։ 1935 թ․-ին Ադիս Աբեբայի հայկական ժամատան տեղում հիմնադրվեց Սուրբ Գևորգ եկեղեցին։

Կոմիտասը և եթովպական երաժշտությունը

Տարբեր աղբյուրներ վկայում են, որ հայերը Եթովպիայում խոշոր առևտրականներ, զորահրամանատարներ, քաղաքական գործիչներ, դիվանագետներ, անգամ արտաքին գործերի, ֆինանսների և առևտրի նախարարներ են եղել։

Բայց առանձնահատուկ է հայերի ներդրումն այդ երկրի երաժշտական ժառանգության մեջ։ 20-րդ դարասկզբին Կոմիտասի աշակերտ Գևորգ Նալբանդյանն ապագա կայսեր՝ ռաս (իշխան) Թեֆերի Մաքոննենի հանձնարարությամբ գրում է երկրի օրհներգը, որը գործող հիմնն էր մինչև այնտեղ միապետական կարգի տապալումը։  

Оркестр армянских сирот в Эфиопии
official site of the Genocide museum institute
Հայ որբերից կազմված երգչախումբ Եթովպիայում

Նալբանդյանի հիմնած «Արբա Լիջոչ» («Քառասուն մանկունք») նվագախումբը Եթովպիայի փոփ-երաժշտության ստեղծագործությունների գրեթե կեսի հիմքն է դրել և աֆրիկյան երաժշտությանը կոմիտասյան տարրեր է միահյուսել։ Իսկ նրա եղբորորդին՝ Ներսես Նալբանդյանը, Ադիս Աբեբայում մանկավարժական գործունեություն էր ծավալում։ Արդյունքում ամենատարբեր՝ ֆոլկից մինչև էթնո-ջազ ժանրերում ստեղծագործող երաժիշտների մի ողջ սերունդ է դաստիարակվել մարդկանց կողմից, որոնք հայկական երաժշտության տեսություն էին սովորել անձամբ Կոմիտասի մոտ։

Кеворк Налбандян
© Photo :
Գևորգ Նալբանդյանը

Ազգային այբուբենները

Հայկական և եթովպական այբուբենների նմանության մասին տեղեկություններ կարելի է գտնել տարբեր աղբյուրներում։ Տեսքից դատելով` 8 տառի արտաքին համընկնում կարելի է հայտնաբերել՝ մի քանի տասնյակից։

Մասնագետները պնդում են, որ եթովպական նշանները նման են հայկական տառերին։ Սակայն այնտեղ ամեն նշանը մի վանկ է, մինչդեռ հայերենում յուրաքանչյուր տառը հստակ հնչյունի գրավոր նիշն է։ Ստացվում է, որ նմանություն որպես այդպիսին չկա։

Ինչպես Գևորգ Նալբանդյանը Եթովպիայի առաջին օրհներգը ստեղծեց ու կապիտան դարձավ

Բայց դա երկու երկրներին չի խանգարում շարունակել զարգացնել հարաբերությունները։ Ավելին՝ Հայաստանի իշխանությունները մտադիր են Եթովպիայում դիվանագիտական ներկայացուցչություն բացել, ինչի շնորհիվ բազմադարյա հարաբերությունները նոր շունչ կստանան։

251
թեգերը:
Եթովպիա, Հայաստան, Կոմիտաս
Ըստ թեմայի
Հայ լուսանկարիչների գերդաստանը, կամ ինչու հայերը փախան Եթովպիայից
Ինչպես 40 հայ որբեր Եթովպիայում կազմեցին կայսերական փողային նվագախումբը
Խաղաղության Նոբելյան մրցանակը շնորհվել է Եթովպիայի վարչապետին
«Սուրբ Աստվածամայր» ԲԿ

Արմավիրի կամրջից նետված 14-ամյա աղջկան վիրահատել են

0
(Թարմացված է 13:29 29.05.2020)
Բժշկական կենտրոնից Sputnik Արմենիային տեղեկություններ հայտնեցին անչափահաս աղջկա առողջական վիճակի մասին։

ԵՐԵՎԱՆ, 29 մայիսի — Sputnik. Արմավիրի «կարմիր» կոչվող կամրջից երեկ նետված 14-ամյա աղջկան «Սուրբ Աստվածամայր» ԲԿ-ում վիրահատել են և տեղափոխել դիմածնոտային բաժանմունք։ Տեղեկությունը Sputnik Արմենիային հայտնեց ԲԿ–ի խոսնակ Գևորգ Դերձյանը։

«Երեկ վիրահատվել է, վիրահատությունը լավ է անցել։ Աղջկա վիճակն այս պահին կայուն է»,–ասաց նա։

Հիշեցնենք` երեկ` մայիսի 28–ին, կեսգիշերին մոտ Արմավիրի մարզի բնակիչ, 14-ամյա Մարիամ Մ.-ն Արմավիր քաղաքի` ժողովրդին հայտնի «կարմիր կամրջից» ցած էր նետվել:

Ահազանգով դեպքի վայր գնացած Փրկարար ծառայության Արմավիրի մարզային փրկարարական վարչության հրշեջ-փրկարարները անելիք չեն ունեցել, քանի որ ամեն ինչ տեղի է ունեցել րոպեների ընթացքում:

Սկզբում նա հոսպիտալացվել է Արմավիրի ԲԿ-ում, այնուհետև տեղափոխվել Երևան` «Սուրբ Աստվածամայր» ԲԿ:

0
թեգերը:
հիվանդանոց, վիրահատություն, աղջիկ, կամուրջ, Արմավիր
Ըստ թեմայի
«Սա հսկայական դժբախտություն է». Արմեն Սարգսյանը` կորոնավիրուսի մասին
Ռուբեն Հայրապետյանի որդին կամավոր ներկայացել է. դատարանը մերժել է կալանքի միջնորդությունը
Նոր հետաքննություն. Guardian–ը՝ ՀՀ-ում Covid-19–ի վերաբերյալ ապատեղեկատվության մասին