Նիկոլ Փաշինյան

«Դուխով», «նյուխով», «սլուխով» բիզնեսմեննե՛ր, էստի՛ համեցեք

353
(Թարմացված է 17:55 25.02.2019)
Անընդհատ շեշտվող «տնտեսական հեղափոխություն» արտահայտությունը չի նպաստում մեր երկրի ներդրումային գրավչությանը: Բիզնեսմենները, որքան էլ «դուխով» ու «նյուխով» լինեն, հեղափոխությունների մեծ սիրահար չեն։

Վարչապետ Նիկոլ Փաշինյանը դուխով գործարարների մասին խոսեց «Իմ քայլը հանուն Լոռու մարզի» ներդրումային բիզնես համաժողով-ցուցահանդեսում անցած շաբաթ օրը Վանաձորում ունեցած ելույթում: Հետաքրքիր շեշտադրումներով ելույթ էր՝ ցանկացած պարագայում:

Ինչ վերաբերում է «դուխով գործարարներին», ապա նրանք են լինելու հռչակված «տնտեսական հեղափոխության» շարժիչ ուժը, կամ այդ հեղափոխության պատասխանատվությունը, ինչպես նկատեց Նիկոլ Փաշինյանը, կարող են իսկապես կրել «դուխով մարդիկ, դուխով գործարարները, որոնք վստահ են իրենց ստեղծարար տաղանդի, աշխատասիրության, ազնվության և սկզբունքայնության վրա և գիտեն, որ տեսակով հաղթող են»:

Առհասարակ, գործարարության մեջ «դուխ» ասվածը ռիսկն է: Կա թևավոր արտահայտություն, որ ով ռիսկի չի դիմում, նա շամպայն չի ըմպում: Բայց տնտեսական գործունեության, գործարարության դեպքում նաև ռիսկերն են հաշվարկում: Ավելի ճիշտ, ոչ թե նաև հաշվարկում են, այլ որևէ գործ բռնելու դեպքում առաջինը դրանք են դիտարկում: Այնպես որ, միայն «դուխը», եթե կուզեք՝ համարձակությունը քիչ է: «Նյուխ» էլ է պետք, այսինքն՝ բիզնես-հոտառություն, եթե կուզեք՝ քթածակ:

Ինչ վերաբերում է «սլուխին», ապա այս դեպքում, իհարկե, երաժշտական լսողությունը նկատի չունենք, այլ ընթացիկ լուրերը, տեղեկությունները, խոսակցությունները: Բայց դրա մասին` քիչ անց:

Վերադառնանք վարչապետի շաբաթօրյա ելույթին: Նա, իհարկե, դեռ ժամանակ կունենա

ավելի ու ավելի մանրամասնել իր ասած «տնտեսական հեղափոխության» կողմնորոշիչները, հայեցակարգը, «դուխով գործարարի» իր պատկերացումը, նման սահմանմանը համապատասխանելու չափորոշիչները: Ժամանակ ու հնարավորություն կունենա, քանզի նախատեսված է, որ այս տարվա ընթացքում Հայաստանի մյուս մարզերում էլ նմանօրինակ համաժողովներ անցկացվեն, ընդհանուր առմամբ՝ 8 համաժողով: Այսինքն, վարչապետ Նիկոլ Փաշինյանն այս թեման ու իր պատկերացումներն ավելի ու ավելի բացելու ևս 8 հարմար առիթ կունենա, չհաշված արդեն կառավարության նիստերը, եռամսյակը մեկ հրավիրվող հանրահավաքները կամ նման առիթները, խորհրդարանում հարցուպատասխանները և այդպես շարունակ:

Գործող կառավարության հիմնական մոտեցումներից մեկը, ինչպես դա կարելի է բխեցնել վարչապետ Նիկոլ Փաշինյանի կոնկրետ վանաձորյան ելույթից, մարդուն քաջալերելն է, որ նա ստեղծի այն, ինչը իր հնարավորությունների տիրույթում է: Ինչպե՞ս են քաջալերելու: Նաև խոսքով, ինչպես ընդգծեց ելույթ ունեցողը:

Խոսքը, ինչ խոսք, կարևոր քաջալերանք ու խթան է: Բայց դա, իհարկե, քիչ է, մանավանդ՝ տնտեսական տեղաշարժի հասնելու համար, էլ չենք ասում՝ հեղափոխության:

Թերևս նաև դա նկատի ունենալով` վարչապետը նույն ելույթում ընդգծեց մինչ այս տարբեր առիթներով արդեն շեշտած հանգամանքներ, մասնավորապես՝

իրական տնտեսական գործունեության հնարավորություններ ստեղծելը, մենաշնորհների, կոռուպցիայի բացառումը, օրենսդրության բարեփոխումներն ու կատարելագործումը: Այս կամ այն գործարարին կամ ճյուղին ապօրինի երաշխիքներ չտալը, այլ հակառակը՝ բոլորի համար հավասար երաշխիքների սկզբունքը պահպանելը:

Գործիքակազմը, պետք է նկատել, առանձնապես նոր չէ: Ու անհայտ էլ չէ: Բայց ինչ վերաբերում է խոսքին, խոսքերին ու «սլուխներին», ապա այստեղ հարցեր կան: Իշխանության եկած ուժը, Նիկոլ Փաշինյանի գլխավորած դաշինքի ամենևին էլ ոչ շարքային ներկայացուցիչները, մեկ՝ «անցումային արդարադատություն» կիրառելու մասին են խոսում, մեկ՝ մեծահարուստների ունեցվածքի էքսպրոպրիացիայի, այսինքն՝ ունեցվածքի 70 տոկոսը պետության օգտին առգրավելու մասին, եթե չկարողանան բացատրել, թե որտեղի՞ց: Այլ նմուշներ էլ կարելի է վերհիշել:

Բայց հիմնականն այն է, որ բոլոր այդ կարգի խոսակցությունները ոչ մի լավ բան չեն կարող հուշել պոտենցիալ ներդրողներին:

Եթե բանկային գաղտնիքը այնքան էլ գաղտնի չէ, եթե ցանկացած օր մեկը կարող է արթնանալ ու որոշել, որ վե՛րջ, վաղվանից էդ հարուստներին պետք է կուլակաթափ անել, ըստ որում` լրիվ օրենքով (օրենքն ի՞նչ է, որ ԱԺ մեծամասնությունը ձեռաց կամ կոճակսեղմած չընդունի) ու էլի «եթե»-ներ, ապա ներդրումային գրավչությունը կսկսի գոլորշիանալ, որքան էլ օրումեջ հավաստիացնես, թե կոռուպցիա չկա, մենաշնորհ չկա, իսկ օլիգարխներն էլ հնազանդ խոշոր սեփականատերեր են դարձել:

Տնտեսությանը պետք են ներդրումներ, հասարակությանը պետք են աշխատատեղեր, պետք է տնտեսության իրական հատվածի աճ, մարդկանց եկամուտների աճ, կանխատեսելի ու վերահսկելի գնաճ և այլն, և այլն: Ներդրողների ու ներդրումների համար պետք է, որ հարկային կայունություն լինի, առհասարակ կայունություն, կանխատեսելիություն, որպեսզի կարողանան հաշվարկել իրենց ներդնելիքն ու հնարավոր ստանալիքը:

Բազմաթիվ նման «պետք է»-ներ կան, ի վերջո, սկսած իրացման շուկաների հասանելիությունից, վերջացրած իրավապահ ու դատական մարմինների գործունեությամբ:

Ի լրումն ամենի, անընդհատ շեշտվող «տնտեսական հեղափոխություն» արտահայտությունը, առնվազն մեր համեստ կարծիքով, չի նպաստում մեր երկրի ներդրումային գրավչությանը: Բիզնեսմենները, որքան էլ «դուխով» ու «նյուխով» լինեն, հեղափոխությունների մեծ սիրահար չեն: Նույնիսկ բուրժուադեմոկրատական հեղափոխությունների դեպքում ու դրանցից հետո:

Հեղափոխություն ասվածը ենթադրում է վերափոխումներ, ցնցումներ, անկայունության որոշակի ժամանակահատված: Իսկ մեր դեպքում, դատելով իշխանության նկատելի մի շարք ներկայացուցիչների ելույթներից, պարբերաբար կարող են նորություններ ու նոր մոտեցումներ հրամցվել: Այսինքն, դեռ ժամանակ կպահանջվի ինչ-որ կայունության, տվյալ պարագայում տնտեսական կյանքում կայունացման գալու համար:

Ի դեպ, էլի խոսքերի մասին: Մեկ ՏՏ ոլորտն է տնտեսական հրաշքի արարիչ դիտվում, մեկ ոչխարապահությունը կամ գառնաբուծությունն է որպես բնակչության բարեկեցության ապահովման հնարավորություն ներկայացվում: Որպես ճառ ու ելույթ, հնարավոր է, գեղեցիկ ու տպավորիչ են հնչում: Բայց չի կարող ամբողջ երկիրը «համակարգիչ վարել» կամ «բարձր տեխնոլոգիաներով» զբաղվել, ինչպես երկրի ողջ բնակչությունը չի կարող գառնարած դառնալ:

Այդպես մեկ էլ անկախության վերականգման արշալույսին գեղեցիկ փաթեթավորված ելույթներ էին հնչում կոնյակով ու հանքային ջրով ամբողջ Հայաստանը պահելու մասին: Բավականին «դուխով» ելույթներ էին, եթե հիշողներ կան:

Շատ հետաքրքիր էր նաև, թե վարչապետն ինչպես արձագանքեց Ստեփանավանի «Անահիտ» հանգստյան տան սեփականատեր ներկայացած գործարարի հարցին: Հարցն ընդհանուր առմամբ վերաբերում էր առևտրային բանկերի վարկային մոտեցումներին, որ ըստ նշված սեփականատիրոջ՝ վաշխառուական մոտեցմամբ են: Նա նաև բերեց իր օրինակը` հպանցիկ նշելով, թե ինչ պրոբլեմի մեջ է ընկել, ինչպես է վարկի գումարը տուգանքներով աճել` գրեթե հնգապատկվելով: Հա, հարց տվողը պարզորոշ ակնարկեց, որ դատական ատյաններին էլ է դիմել, ինքն էլ իրավաբան է:

Այնպես չէ, որ պատասխանելու ընթացքում վարչապետ Նիկոլ Փաշինյանը չանդրադարձավ վարկային խնդիրներին կամ չնշեց, որ որդեգրվել է վարկային տոկոսադրույքներն իջեցնելու քաղաքականություն: Ասաց: Սակայն տպավորվեց այն, որ ակտիվ հակադարձման տոնայնությամբ Նիկոլ Փաշինյանն ասաց այդ ամենը ու հատկապես այն, որ հարց տվողը հին տնտեսական համակարգի ներկայացուցիչ է, որը տնտեսական գործունեություն անելու համար պետք է հովանավոր ունենա, «կռիշա» ունենա: «Բա վարկը վերցրել եք, ստորագրել եք ու այդ պահին վերլուծե՞լ եք, թե ձեզ համար այդ վարկը տանելի է, թե ոչ: Էսօր, գիտեք, ինչքան մարդ է գյուղվարկ վերցնում, գնում «Նիվա» առնում, հետո խմում ու տանում, խփում պատին, հաջորդ պահին ասում՝ բա կառավարություն, մեզ համար բան չես անո՞ւմ: Ի՞նչ անի կառավարությունը էդ մարդկանց համար»,- ոգևորված արձագանքեց Նիկոլ Փաշինյանը՝ ստանալով դահլիճում գտնվողների խրախուսական ծափահարությունները:

Բայց մի՞թե հանգստյան տան տնօրենը դրա մասին էր հարցնում: Մի՞թե նա նման էր խմած «Նիվա» վարողի: Մեզ վրա նման տպավորության այդ անձնավորությունը, կներեք, չթողեց: Եվ հետո, եթե նա ուզենար «տանիք», նույն ինքը՝ «կռիշ» ունենալ, ապա կունենար, չէ՞, ու վարկային թնջուկի մեջ և դատական ատյանների դռներին չէր հայտնվի: Ի վերջո, մարդը հո հենց այնպե՞ս չասաց, որ իրավաբան է: Բայց ո՞ւմ են նման հարցերն ու կոնկրետիկան հետաքրքրում: Կարևորը՝ «դուխով գործարարների» ի հայտ գալն է, որպես տնտեսական նոր համակարգի ներկայացուցիչներ:

Աչքներս տեսնի, ինչպես սիրում են ասել կյանքի փորձ կուտակածները:

353
Грусть

Ինչպես հայերը պատրաստվեն COVID-19–ի երկրորդ ալիքին. փորձառու մարդկանց խորհուրդներ

145
(Թարմացված է 00:45 10.07.2020)
Sputnik Արմենիայի սյունակագիրը մտորում է կորոնավիրուսի համավարակի երկրորդ ալիքի, կարանտինի և ինքնամեկուսացման դժվարությունների մասին, ինչպես նաև ներկայացնում այն մարդկանց խորհուրդները, որոնք գիտեն` ինչպես է մարդը գոյատևում, երբ մնում է ինքն իր հետ։

Կորոնավիրուսի, այսպես կոչված, «երկրորդ ալիքը» կլինի՞, թե՞ բախտներս կժպտա։ Կարծես թե առաջին տարբերակն է լինելու։ Այդ մասին են վկայում բազմաթիվ վարակաբանները, փորձագետներն ու նույնիսկ հասարակ դիտորդները։ Ի՞նչ են ասում նրանք։

Լսում ենք. Պետդումայի պատգամավոր, Ռուսաստանի նախկին գլխավոր սանիտարական բժիշկ Գենադի Օնիշչենկո. «Կորոնավիրուսը կվերադառնա աշնանը»։

WMA բժիշկների համաշխարհային արհմիության նախկին ղեկավար, պրոֆեսոր Լեոնիդ Էյդելման. «Սուր շնչառական վիրուսային վարակի սեզոնային դրսևորմամբ սրված նոր տիպի կորոնավիրուսային վարակի երկրորդ ալիքի բռնկմանը պետք է սպասել նոյեմբեր–դեկտեմբերին»։

Բժշկական գիտությունների թեկնածու, պրոֆեսոր Վիկտոր Զուև. «Երբ համավարակի անկում նկատվի, COVID-19–ի վարակիչ հատկությունը մի փոքր կնվազի, իսկ երկրորդ ալիքը կսկսվի հոկտեմբերից»։

Ստացվում է, որ թուլանալը դեռ վա՞ղ է։ Այո՛։ Այնտեղ, որտեղ շտապել են կարանտինը չեղարկել, կորոնավիրուսն արդեն վերադարձել է` չսպասելով աշնանը, և ստիպված են դարձյալ խիստ միջոցներ ձեռնարկել։ Նախկինից էլ խիստ։

Սինգապուրցի գիտնականը կանխատեսում է, որ առաջիկայում նոր կորոնավիրուսի բռնկում է լինելու

Իտալական Վենետոյում (Վենետիկ) կորոնավիրուսով վարակված, սակայն ստացիոնար բուժումից հրաժարված բնակիչներին ազատազրկում է սպառնում։

COVID-19–ի հետ կապված իրավիճակի բարդացման պատճառով Սերբիայի նախագահը խոստանում է Բելգրադում պարետային ժամ սահմանել։ Այդ պատճառով բողոքի ակցիաները չեն դադարում։

Եվ այսպես շարունակ։ Ասածս ի՞նչ է։ «Կորոնայի» առաջին ալիքն ամբողջությամբ չմարելով` աշնանը կամ սպասվող ձմռան սկզբին կարող ենք հայտնվել երկրորդի հարվածի տակ, և այդ ժամանակ ինքնամեկուսացման կամ հարկադիր մեկուսացման խստացումներն ավելի սարսափելի պատկեր կստանան։ Խիստ կարանտինը կվերադառնա, և դա որևէ լավ բան չի խոստանում։

Այդ «պատժամիջոցը»՝ մեկուսացումը, ինչպես արդեն գիտենք, ամենաբարդն է մեզ համար․ բակերը, ընկերները, հարևանները, նարդին, սուրճը, մանղալը, գրկախառնություններ-համբույրները և խիստ հայկական «ջիգյարի» այլ արտահայտումները՝ ամեն բան գրողի ծոցն է գնում և վճռական հակասության մեջ է մտնում չորս պատերի մեջ փակված մնալու հեռանկարի հետ։ Դե, սովոր չենք, չենք կարողանում, չենք ցանկանում․․․

Իսկ այժմ՝ նրանց մասին, ովքեր կարողանում են, գիտեն և անգամ հաճույք են ստանում դրանից։ Օգտակար կլինի իմանալ հնարավոր տհաճություններից առաջ։

Աշխարհում բազմաթիվ մասնագիտություններ և սիրողական զբաղմունքներ կան, որոնք տևական ժամանակ հասարակությունից հեռու ապրելու ունակություն են ենթադրում՝ երկրաբաններ, տիեզերագնացներ, միայնակ ճանապարհորդներ, սուզանավերի նավաստիներ, էլ չասենք նրանց մասին, ովքեր նստած են ճաղերի հետևում։

Կորոնավիրուսից հետո խանգարումնե՞ր են ի հայտ գալիս. գիտնականների նոր բացահայտումը

Օրինակ` գործարար Վարդա Ա․-ն, որը տնտեսական հոդվածով անազատության մեջ էր հայտնվել։ Բանտախցում նստած է եղել գրեթե մեկ տարի, այն էլ` մենախցում։ Վարդան Ա․-ն չի հասկանում նրանց, ովքեր չեն կարողանում իրենք իրենց հետ մենակ մնալ․ միայնության մեջ ավելի լավ ես մտածում, ավելի արագ ես լուծումներ գտնում, կոնֆլիկտների ավելի քիչ առիթներ կան։ Թեև բանտը, իհարկե, քաղցր բան չէ, ավելին` առանձնանալու վատագույն վայրն է։

Կարող ես մենակության զգացողությունը «վայելել» ոչ միայն բանտախցում, այլև տիեզերքում։ Քանի որ մենք սեփական տիեզերագնացներ դեռ չունենք, հիշենք ռուս տիեզերագնացներին։ Տիեզերագնաց-փորձարկող Ալեքսանդր Միսուրկինի խոհերից․ «Փոքրիկ, փակ տարածքում երկար ժամանակ միևնույն մարդկանց հետ ծանր է ապրել, բայց պետք է հասկանալ, որ կայանի ներսում անվտանգ է, իսկ եթե դուրս գաս, կմեռնես, չէ՞ որ դրսում վակուում է»։

COVID-19-ի հետ համեմատությունը ակամա է ծնվում․ ինքնամեկուսացումը չարիք չէ, այլ բարիք, իսկ համաճարակաբանորեն ոչ բարենպաստ տարածություն դուրս գալը վտանգավոր է յուրաքանչյուրիս և մեր մտերիմների համար։ Տիեզերագնացը նաև նշում է, որ փակ տարածության մեջ շատ կարևոր են մարդկանց միջև հարգալից և փոխվստահելի հարաբերությունները։

Բնակարանի չորս պատերի մեջ երկար ժամանակ մենակ մնացած մարդկանց մասին․ այստեղ տեղին է հիշել հայտնի ճանապարհորդ Ֆյոդոր Կոնյուխովի խորհուրդները։ Առավելագույն ժամանակը, որ նա անցկացրել է ինքն իր հետ, 222 օր է՝ զբոսանավով շուրջերկրյա ճամփորդություն կատարելու ընթացքում, առանց նավահանգիստներ մտնելու և առանց բջջային հեռախոսների. 1990թ․-ին դրանք դեռ չկային։

Հայտնի ճանապարհորդը հաստատում է գործարար-բանտարկյալի կարծիքը․ «Մենակությունը շուրջդ դիտելու, ինքդ քո մեջ նայելու հնարավորություն է տալիս»։

Բայց նույն այդ Կոնյուխովը Esquire ամսագրին տված հարցազրույցում խոստովանում է․ «Գիտարշավների ժամանակ ձանձրանալու, տաղտուկին տրվելու ժամանակ չկա, պետք է աշխատես, դու ունես նպատակ, դրան հասնելու միջոցներ, հեռանկարները հստակ են և հասկանալի։ Այդ առումով, իհարկե, օվկիանոսում ավելի հեշտ է, քան Մոսկվայում ինքնամեկուսացման մեջ»։

Կոնյուխովը, իհարկե, չգիտի, որ Երևանում շատ ավելի դժվար է ինքնամեկուսացած լինել, փոխարենը մենք գիտենք։ Եվ երևի սկսում ենք գիտակցել, որ փորձությունների շրջանում ամենավատ բանը մենակությունը չէ․ ամենավատը ձեռքերը ծալած նստելն է։

Իսկ մինչ այդ կորոնավիրուսի երկրորդ ալիքը թափ է առնում։ Իսպանիայի հյուսիս-արևմուտքում՝ Լուգո գավառում, դրա պատճառով կրկին կարանտին են հայտարարել։ Լուգոն արդեն երկրորդ մարզն է Իսպանիայում, որտեղ կրկնակի կարանտին է։ Հուլիսի 4-ին նույնը տեղի ունեցավ ավելի քան 200 հազար բնակչություն ունեցող Սեգրիայում (կատալոնական Լյեյդա գավառ)։

Հայաստանում կորոնավիրուսի առաջին ալիքն անգամ դեռ չի ավարտվել։ Պատրաստվել է պետք։

145
թեգերը:
քաղբանտարկյալ, տիեզերագնաց, վարակ, կորոնավիրուս, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
Գիտնականներին հաջողվել է գտնել կորոնավիրուսի թույլ կողմերը
Կորոնավիրուսի կարող է վտանգավոր լինել սրտի համար. ռուս գիտնական
Գիտնականները կանխատեսո՞ւմ էին համավարակի բռնկումը
Մոսկվա

«Մահափորձեր» մահվանից հետո. Լենինին նաև դամբարանում էին ուզում «սպանել»

135
(Թարմացված է 23:26 09.07.2020)
Եկեք անկեղծ լինենք։ Բոլորը գիտեն, որ ժամանակին համաշխարհային պրոլետարիատի առաջնորդ Վլադիմիր Լենինի դեմ մահափորձ է կատարվել, բայց ոչ բոլորը գիտեն, որ այդ մարդու մահից հետո էլ ահաբեկիչները նրան հանգիստ չեն թողել։
Վլադիմիր Լենին. «մահափորձեր» մահվանից հետո

Վերջին դեպքը տեղի է ունեցել 1973 թվականի սեպտեմբերի 1-ին։ Հիմա աշնան առաջին օրը երեխաներն ուր են գնում՝ դպրոց։ Իսկ այն ժամանակ` Սովետի օրոք,  Մոսկվայի դպրոցներում սովորող երեխաներին ոչ միայն դպրոց էին տանում, այլ նաև Լենինի դամբարան։ Էդպիսի ավանդույթ կար։

Երբ դպրոցներից մեկի աշակերտներն այդ օրը մտնում էին դամբարան, նրանց հետևից ներս մտավ նաև մի տղամարդ։ Բոլորը կարծեցին, թե ուսուցիչն է, այնինչ այդ մարդը բոլորովին այլ մտադրություն ուներ. նա հագուստի տակ պահել էր պայթուցիկ սարքը։ Երբ մոտեցավ սարկոֆագին, որտեղ գտնվում էր Լենինի մարմինը, իրար միացրեց երկու լարերը ու պայթյուն որոտաց։ Ինքը կտոր-կտոր եղավ, զոհվեց։ Նրա հետեւից քայլող զույգը, որը Աստրախան քաղաքից էր եկել, երեխաներից չորսը ծանր վնասվածքներ ստացան։

​Իսկ Լենինի մարմինը չտուժեց։ Որովհետև սարկոֆագը պատված էր զրահապատ ապակիով։ Ինչու էր զրահապատ։ Որովհետև նման դեպք նախկինում էլի էր եղել։ Մոտ հիսունհինգ տարի առաջ՝ էլի սեպտեմբերի սկզբին, Լիտվայի Կաունաս քաղաքի բնակիչ ոմն Կրիսանովը էլի պայթուցիկ սարք էր գործի դրել դամբարանի ներսում, պայթյունն ավելի թույլ էր, բայց ինքը նույնպես զոհվել էր։

​Սակայն դա էլ բոլորովին առաջին դեպքը չէր։ Տարբեր ժամանակներում տարբեր մարդիկ փորձել են վնասել Լենինի մարմինը։ 1934 թվականին մի տղամարդ իր հետ զենք էր բերել և փորձել կրակել Լենինի դիակի վրա։ Նրան շրջապատող մարդիկ խոչընդոտել են, ի վերջո նա ինքնասպան է եղել։ Գոնե այս դեպքում շարժառիթը հայտնի է՝ մարդը հուսահատ քայլի էր դիմել։ Քաջ գիտակցում էր, որ ողջ չի մնալու և գրություն էր թողել` պատմելով, որ աշխատում է հեռավոր մի սովխոզում, որտեղ աղաղակող անօրինականություններ են տեղի ունենում։ Ինքը բազմիցս այդ մասին ահազանգել է, նամակներ է գրել Կրեմլ, բայց արձագանք չի ստացել և ի վերջո որոշել է գոնե նման ձևով գրավել խորհրդային իշխանության ուշադրությունը։ Ասում են` նրա այդ գրությունը հայտնվել է Իոսիֆ Ստալինի սեղանին, առաջնորդը կարդացել է և կարգադրել այն հանձնել արխիվ։ Ու վերջ։ Այսինքն` այդ մարդու հուսահատ քայլն էլ որևէ արդյունք չի տվել։

​Իսկ Լենինի մարմնի նկատմամբ ոտնձգությունները շարունակվեցին նաև Ստալինի մահվանից հետո։ 1959 թվականին մի մարդ մուրճ էր իր հետ բերել ու հարվածել սարկոֆագին։ Ապակին բավական պինդ էր, միայն ճաքեց։ Մեկ տարի անց՝ 1960-ին, մի տղամարդ  անսպասելիորեն թռավ սարկոֆագի վրա, ոտքով հարվածեց. այս անգամ ապակին ջարդվեց, Լենինի դեմքը վնասվեց։ Ժամանակավորապես փակեցին դամբարանը։

Ո՞ր խավին ենք պատկանում հայերս․ սոցիալիզմի ու կապիտալիզմի արանքում

​Բայց խնդիրը մնում է։ Ռուսաստանի իշխանությունները, ինչպես ժողովուրդն է ասում, կրակն են ընկել՝ չեն կարողանում վերջնականապես կողմնորոշվել դամբարանի հարցում։ Հասարակությունում տիրող տրամադրություններն էլ տարբեր են։ Երեք տարի առաջ անցկացրած հարցումների համաձայն՝ կարծիքները բաժանվել են երեք՝ գրեթե հավասար մասերի՝ 31 տոկոսը կողմ է, որ ոչինչ չփոխվի, ու Լենինի մարմինը մնա դամբարանում, 32 տոկոսը գտնում է, որ առաջնորդին պետք է թաղել Կրեմլի պատի մոտ, 29 տոկոսն էլ համաձայն է, որ նրա աճյունն ամփոփվի Սանկտ Պետերբուրգի գերեզմանատներից մեկում։ Ի դեպ, ըստ BBC-ի, այժմ ողջ աշխարհում կա Լենինի 3260 արձան, գերակշիռ մասը՝ 2800-ը, իհարկե, Ռուսաստանի տարբեր բնակավայրերում է։ Բայց ըստ նույն աղբյուրի` Հայաստանում էլ մնացել է Լենինի 4 արձան, Վրաստանում դրանք երկուսն են։ Երկու արձան էլ Նորվեգիայում կա ։ Մեկն էլ՝ Ճապոնիայում։

Ինչո՞ւ Խրուշչովը կոշիկով խփեց ՄԱԿ-ի սեղանին, ում ելույթն էր հունից հանել ԽՍՀՄ առաջնորդին

​Կազանում գործում է նաև գիշերային ակումբ, որը կոչվում է Լենին։ Դրա տերը բացատրել է՝ ոչ մի գաղափարական ենթատեքստ չկա, ուղղակի Լենինը հայտնի անուն է, ինչպես հիմա են ասում՝ բրենդ։ Մի անգամ մի տարեց, թոշակառու կին էր եկել, ուզում էր մտնել, անվտանգության աշխատակիցներն ասել էին. «Մայրիկ, ախր դու ինչ գործ ունես, սա գիշերային ակումբ է»։ Խեղճ կինն էլ խոստովանել էր. «Ես էլ կարծում էի, թե Լենինի երկրպագուների ակումբն է»։

135
թեգերը:
ԽՍՀՄ, Մոսկվա, դամբարան, մահափորձ, Վլադիմիր Իլյիչ Լենին
թեմա:
5 րոպե Դուլյանի հետ
Ըստ թեմայի
Անհավանական է. քանի շիշ շամպայն է խմել Չերչիլը և որտեղ են տիեզերագնաց Արմսթրոնգի կոշիկները
Ինչու են թուրքմենները թղթադրամների վրա գրում «Բերդիմուհամեդով, հեռացի՛ր»
«Բանտում մարդիկ մերն են, Լենինն էլ է դատվել». Վարդան Ղուկասյանը պատրաստ է «նստել»
Կիևյան կամուրջ

Երևանում 60–ամյա տղամարդը նետվել է Կիևյան կամրջից

0
(Թարմացված է 11:17 10.07.2020)
Դեպքի վայր մեկնած փրկարարները Հրազդան գետից դուրս են բերել մոտ 60 տարեկան տղամարդու դի։

ԵՐԵՎԱՆ, 10 հուլիսի — Sputnik. Երևանում ինքնասպանություն է տեղի ունեցել։ Ինչպես տեղեկացնում են ՀՀ ԱԻՆ մամուլի ծառայությունից, հուլիսի 9-ին, ժամը 22:28-ին Ճգնաժամային կառավարման ազգային կենտրոն տեղեկություն է ստացվել, որ քաղաքացին ինքնասպանություն է գործել՝ նետվելով Երևանի Կիևյան կամրջից։

Կորոնավիրուսի հետևանքով 11 մահվան դեպք է գրանցվել. ամենաերիտասարդը 51 տարեկան է

Դեպքի վայր է մեկնել ԱԻՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը։

Պարզվել է, որ քաղաքացու դին գտնվում է Հրազդան գետում: Փրկարարները գետից դուրս են բերել մոտ 60 տարեկան տղամարդու դի։

0
թեգերը:
Կիևյան կամուրջ, փրկարար, տղամարդ, ինքնասպանություն, Երևան
թեմա:
Վթար, պատահար, սպանություն, գողություն
Ըստ թեմայի
Մահացել է Առաջատար տեխնոլոգիաների ձեռնարկությունների միության տնօրեն Կարեն Վարդանյանը
557 նոր դեպք` մեկ օրում. Հայաստանում կորոնավիրուսով վարակվածների թիվը հասավ 30 903-ի