Հայկ Մարության

Ո՞րը պետք է լինի Հայկ Մարությանի առաջին քայլը, կամ ինչպե՞ս խուսափել պառակտումից

186
(Թարմացված է 12:16 27.09.2018)
Սյունակագիր Սերգեյ Բաբլումյանը խորհրդածում է, թե ամենից առաջ ինչ խնդիր պետք է լուծի Երևանի նոր քաղաքապետը։

Հայկ Մարությանն այս տարվա հոկտեմբերի 10-ին կստանձնի Երևանի քաղաքապետի պաշտոնը։ Փողոցներում և հրապարակներում «երջանկության հորմոններ» բաժանելը ժամանակավորապես դադարեցվել է, բայց տոնը շարունակվում է։ Առջևում Ֆրանկոֆոնիայի փառատոնն է, Երևանի 2800-ամյակի կապակցությամբ հանդիսությունները։ Բացի այդ, բացվել են Բաղրամյան 26-ի դարպասները, ավելի ուշ ակնկալվում է, որ քաղաքացիներն ազատ մուտք կունենան նույն փողոցում գտնվող Ազգային ժողովի այգի։ Զբոսնիր, շուրջդ նայիր, մտածիր։ Ահա և մտածում ենք։

Ո՞րը պետք է լինի նոր քաղաքապետի առաջին քայլը։ Առաջին և զուտ սուբյեկտիվ առաջարկ։ Ձեռք բերել (կամ վերադարձնել) սեփական դեմքը և դուրս գալ այն կերպարից, որը չափազանց շատ է հիշեցնում ներկա վարչապետին։ Այլապես երկիրը կարող է միանգամից երկու Փաշինյան ունենալ, մեկը` Հանրապետության հրապարակում` վարչապետի նստավայրում, մյուսը` Արգիշտի փողոցում` քաղաքապետարանի շենքում։ Իսկ դա արդեն շատ է։ Բացի այդ, մենք չգիտենք` օրիգինալն ուզո՞ւմ է նմանակ ունենալ։

Երկրորդ առաջարկը` հնարավորինս արագ վերադարձնել Երևանի դեմքը։ Մտածել այն մասին, որ առօրյան վերադառնա քաղաք։ Այնպես չէ, որ տոները վատ բան են, բայց քաղաքն անընդհատ աղմկում է տարբեր պատճառներով. աղմուկը դեռ չդադարած` վիճակը նորից է թեժանում, հաջորդ օրերին նորերերն են ծրագրվում, ու ստացվում է ինչ-որ Փարիզ, որը միշտ քեզ հետ է։ Իսկ երևանցիները հազարավոր հարցեր ունեն և գրեթե ոչ մի պատասխան։ Խոստումները հաշվի մեջ չեն։

Շարունակում ենք մտածել։ Հաղթական խրախճանքից հետո սպասում ես արագ փոփոխությունների, բայց ցանկացած հեղափոխություն միայն վատացնում է տնտեսությունը։ Չափազանց շատ ժամանակ և ուժ է ծախսվում նախկինը քանդելու վրա, ընդ որում` հաճախ թեժ ձեռքի տակ է ընկնում այն, ինչը սթափ հայացքով ոչ թե վնաս է, այլ օգուտ։ Բայց ամեն դեպքում պետք է բարելավել մարդկանց կյանքը։

Տարոն Մարգարյանի օրոք քաղաքապետարանում հաստատ եղել են բարձր որակավորում ունեցող մասնագետներ, և չարժե նրանց դիլետանտներով փոխարինել (միայն այն պատճառով, որ բոլորը յուրային լինեն)։

Քաղաքապետի թեկնածուն ամեն կերպ փորձում էր ցույց տալ, որ բոլորը, ովքեր իր հետ են, «սպիտակ ուժեր» են, իսկ մնացածերը` «սև»։ Միաժամանակ շատերն ընդհանրապես չեն մասնակցել ավագանու ընտրություններին։ Իսկ ովքե՞ր են նրանք հիմա։ Եթե քաղաքապետը կարող է վերածել նրանց դաշնակիցների, ապա կշահեն բոլորը, եթե չուզենա կամ չցանկանա, ապա հասարակության պառակտումը, ամենայն հավանականությամբ, կխորանա։

Խնդրանքով դիմողներից շատերը (իսկ նրանց թիվն աճում է), որոնք մոտենում են Փաշինյանին, սկսում են նրանից, որ հիշեցնում են հեղափոխության օրերին իրենց աջակցության, բողոքի ակցիաներին մասնակցելու և փողոցները փակելու մասին։

«Միացրու «յուրային-օտար» համակարգը, հիշիր և օգնիր», — կարծես ասում են նրանք։

Բայց ինչպե՞ս վարվել նրանց հետ, ովքեր չեն նստել ասֆալտին, չեն մասնակցել ակցիաներին, բայց նույնպես օգնության կարիք ունեն…

Իսկ հիմա շատերը օգնության համար կդիմեն Մարությանին։ Ինչո՞վ նա կօգնի։ Կապրենք, կտեսնենք։

Ամերիկյան առօրյայից։ ԱՄՆ-ի նախկին նախագահ Բարաք Օբաման, ինչպես հաղորդում է MSNBC-ը, կոչ է արել իր հայրենակիցներին մասնակցել կոնգրեսի ընտրություններին` երկիրն ԱՄՆ-ի նախագահ Դոնալդ Թրամփից փրկելու համար։

Օբամայի կարծիքով` Թրամփը հարստություն է դիզում ԱՄՆ-ի բնակիչների վախերի ու ցասման վրա։ Իշխանություն ունեցող մարդիկ ցանկանում են, որ մնացած բոլորը պառակտված մնան, հավելել է Օբաման։

Չգիտեմ` ԱՄՆ-ում ինչպես, բայց մեզ չի կարելի բաժանված մնալ։ Մարությանը բաժանարար գիծ է քաշել, որը հիմա պետք է վերացնել։ Կկարողանա՞ արդյոք։ Կրկին ցույց կտա ժամանակը։

Ինչ էլ որ լինի, քաղաքը նոր քաղաքապետ ունի և չի կարելի չշնորհավորել նրան։ Մի կողմ թողնելով վիրավորանքը, թյուրըմբռնումը, հիասթափությունը` օգնենք Երևանին վերադարձնել «աշխատավոր» քաղաքի դեմքը, որտեղ գլխավոր տեղն ունեն հենց երևանցիները։

186
թեգերը:
Հայկ Մարության, Հայաստան
Ըստ թեմայի
«Կուկուռուզնիկ» և Սայաթ–Նովա. Հայկ Մարությանը պատմեց «իսկական» Երևանի մասին
Հայկ Մարությանը լարված քարոզարշավում նաև զավեշտալի դեպքեր է արձանագրել
Ինչպես Նիկոլ Փաշինյանն արձագանքեց Հայկ Մարությանի հաղթանակին
Ինչպես է «Ժառանգությունը» շնորհավորել Հայկ Մարությանին
Գագիկ Ծառուկյանն ընդունում է Հայկ Մարությանի հաղթանակը
ՀՀԿ–ն շնորհավորեց Հայկ Մարությանին. կուսակցությունը հայտարարություն է տարածել
Քիմ Քարդաշանն ու Քանյե Ուեսթը. արխիվային լուսանկար

Եթե Քանյե Ուեսթը նախագահ դառնա, կշահենք մենք ու Չինաստանը

105
​Եկեք անկեղծ լինենք։ Քիմ Քարդաշյանի ամուսինը՝ ռեփեր Քանյե Ուեսթը, սիրում է անակնկալներ մատուցել։
Համ Ամերիկայի ապագա նախագահի կինը մեր հայրենակցուհին կլինի, համ էլ կհպարտանանք, որ այդ նախագահը լողացել է Կարապի լճում

Երևի կհիշեք, թե ինչպես տարիներ առաջ Հայաստան այցելելիս նա անսպասելիորեն նախօրոք չհայտարարված համերգ կազմակերպեց մեր Օպերայի մոտ՝ Կարապի լճի ափին, հետո էլ անսպասելիորեն ցատկեց ու երգը շարունակեց ջրի մեջ։ Մոտ մեկ շաբաթ առաջ Քանյե Ուեսթը շատ ավելի մեծ անակնկալ մատուցեց, հայտարարելով, որ մտադիր է մասնակցել Ամերիկայում այս տարվա նոյեմբերին կայանալիք նախագահական ընտրություններին։

​Հիմա կասեք՝ դե լավ էլի, ինչպե՞ս կարող է երգիչը, երաժիշտը երկրի բարձրագույն ղեկավար դառնալ։ Կներեք, ուրեմն մեզ մոտ՝ Հայաստանում, լրագրողը կարող է, Ուկրաինայում հեռուստաաստղը կարող է, իսկ Ամերիկայում երգիչը չի՞ կարող։ Իսկ գիտե՞ք արդյոք, որ ամերիկացի նախագահներից շատերը նաև լրջորեն զբաղվել են երաժշտությամբ։

«Ուոլ սթրիթ ջորնալ» թերթը վկայում է, որ ԱՄՆ-ի երրորդ նախագահ, Անկախության հռչակագրի հեղինակ Թոմաս Ջեֆերսոնը հենց ջութակի շնորհիվ է գերել իր ապագա կնոջը՝ Մարթա Սքելթոնին։ Բայց ինչո՞ւ հեռու գնանք. Բարաք Օբաման բազմիցս երգել է հենց Սպիտակ տանը կազմակերպված տարբեր միջոցառումների ժամանակ։ Իսկ Պրահայի կենտրոնում ինքս եմ տեսել այն ջազ ակումբը, որի մուտքի մոտ գրված էր. «Այստեղ սաքսոֆոն է նվագել Բիլ Քլինթոնը»։

Անհավանական է. քանի շիշ շամպայն է խմել Չերչիլը և որտեղ են տիեզերագնաց Արմսթրոնգի կոշիկները

​Բայց վերադառնանք Քանյե Ուեսթին։ Ո՞ր կուսակցությունից է պատրաստվում մասնակցել նախագահական ընտրություններին։

Համաձայնեք` շատ հետաքրքիր հարց է, որովհետև հաջողության հասնելու համար պիտի կա՛մ դեմոկրատ, կա՛մ հանրապետական լինես։ Սևամորթները ավանդաբար դեմոկրատներին են հարում, բայց Քանյե Ուեսթը ժամանակին իր աջակցությունն էր հայտնել հանրապետական Դոնալդ Թրամփին։ Իսկ երկու օր առաջ Forbes հանդեսին տված ծավալուն հարցազրույցում Քանյե Ուեսթն ասել էր.

«Այ հենց հիմա հանում եմ այն գլխարկը, որի վրա գրված է Թրամփի կարգախոսը՝ «Մենք կրկին հզոր կդարձնենք Ամերիկան»»։

Վերլուծաբաննները, սակայն, համոզված են, որ եթե Քանյե Ուեսթի նախագահական հավակնությունները լուրջ են և նա իրոք մտնի ընտրապայքարի մեջ, շահողը հենց Դոնալդ Թրամփն է լինելու, որովհետև սևամորթ ռեփերը աֆրոամերիկացիների ձայները կխլի դեմոկրատների հիմնական թեկնածուից՝ նախկին փոխնախագահ Ջո Բայդենից։

Ի դեպ, Քանյե Ուեսթն արդեն դատապարտել է Բայդենի իրոք խիստ վիճահարույց արտահայտությունը՝ «Եթե սևամորթը չի քվեարկում դեմոկրատների օգտին, ուրեմն ինքն իսկական սևամորթ չէ»։

Բոլոր հիմարությունները դեմքի խելոք արտահայտությամբ են արվում, կամ Մյունխհաուզենի սինդրոմը

Մյուս կողմից, Դոնալդ Թրամփը շատ հանգիստ է արձագանքել նախագահ դառնալու` ռեփերի մտադրությանը.

«Թող փորձի էլի»,–ասել է Թրամփը։

​Ինչևէ՝ ռեփերը մտադիր է ստեղծել իր սեփական կուսակցությունը և անվանել այն The Birthday Party։ Երևի հասկանում եք, որ սա բառախաղ է, քանզի «փարթի» բառն անգլերենում նշանակում է թե՛ կուսակցություն, թե՛ երեկույթ։

Քայնե Ուեսթի բացատրությունը սա է.

«Եթե մենք հաղթենք, բոլոր ամերիկացիները կզգան, որ դա իրենց ծննդյան օրվա երեկույթի նման մի բան է»։

Համաձայնեք՝ մի քիչ տարօրինակ, բայց հաճելի բացատրություն է։

​Կարելի է ասել, որ ընդամենն այսքանն է հստակ։ Նույնիսկ պարզ չէ, թե ով է լինելու Ամերիկայի ապագա փոխնախագահը, քանզի ռեփերն ինչ-որ հոգևորականի անուն է տվել, որին լայն հասարակայնությունն ընդհանրապես չի ճանաչում։ Արտաքին և ներքին քաղաքականության մասին Քանյե Ուեսթը նույնպես շատ անորոշ կերպով է արտահայտվել, ասելով միայն, որ կհամագործակցի լավագույն մասնագետների հետ և կհրավիրի նրանց Սպիտակ տուն։

Ո՞վ է կորոնավիրուսի մեղավորը. Թրամփը գիտի պատասխանը, մնացինք մենք

​Ինչ կարելի է ասել։ Պարզ է ընդամենը մի բան` եթե Քանյե Ուեսթը նախագահ դառնա, կշահենք մենք ու Չինաստանը։

Չինաստանի մասին Քանյե Ուեսթն արդեն դրվատանքով է արտահայտվել, կարծիք հայտնելով, որ այդ երկիրը կորոնավիրուսի տարածման համար մեղավոր չէ և ավելացնելով. «Ես սիրում եմ Չինաստանը։ Չինաստանը փոխեց իմ կյանքը»։

Իսկ թե ինչու է Քանյե Ուեսթի նախագահ ընտրվելը շահեկան լինելու մեզ համար, կարծում եմ բացատրության կարիք չկա՝ բա աշխարհի ամենահզոր երկրի առաջին տիկինը մեր հայրենակցուհին է լինելու։

105
թեգերը:
Կարապի լիճ, ամուսին, Քիմ Քարդաշյան, Քանյե Ուեսթ, Նախագահ, ԱՄՆ, Արմեն Դուլյան
թեմա:
5 րոպե Դուլյանի հետ
Ըստ թեմայի
Ո՞ր խավին ենք պատկանում հայերս․ սոցիալիզմի ու կապիտալիզմի արանքում
Արժե՞ վստահել վարկանիշներին. ինչ անել, որ հայկական բուհերն էլ լավագույնների շարքին դասվեն
«Մահափորձեր» մահվանից հետո. Լենինին նաև դամբարանում էին ուզում «սպանել»
Грусть

Ինչպես հայերը պատրաստվեն COVID-19–ի երկրորդ ալիքին. փորձառու մարդկանց խորհուրդներ

271
(Թարմացված է 00:45 10.07.2020)
Sputnik Արմենիայի սյունակագիրը մտորում է կորոնավիրուսի համավարակի երկրորդ ալիքի, կարանտինի և ինքնամեկուսացման դժվարությունների մասին, ինչպես նաև ներկայացնում այն մարդկանց խորհուրդները, որոնք գիտեն` ինչպես է մարդը գոյատևում, երբ մնում է ինքն իր հետ։

Կորոնավիրուսի, այսպես կոչված, «երկրորդ ալիքը» կլինի՞, թե՞ բախտներս կժպտա։ Կարծես թե առաջին տարբերակն է լինելու։ Այդ մասին են վկայում բազմաթիվ վարակաբանները, փորձագետներն ու նույնիսկ հասարակ դիտորդները։ Ի՞նչ են ասում նրանք։

Լսում ենք. Պետդումայի պատգամավոր, Ռուսաստանի նախկին գլխավոր սանիտարական բժիշկ Գենադի Օնիշչենկո. «Կորոնավիրուսը կվերադառնա աշնանը»։

WMA բժիշկների համաշխարհային արհմիության նախկին ղեկավար, պրոֆեսոր Լեոնիդ Էյդելման. «Սուր շնչառական վիրուսային վարակի սեզոնային դրսևորմամբ սրված նոր տիպի կորոնավիրուսային վարակի երկրորդ ալիքի բռնկմանը պետք է սպասել նոյեմբեր–դեկտեմբերին»։

Բժշկական գիտությունների թեկնածու, պրոֆեսոր Վիկտոր Զուև. «Երբ համավարակի անկում նկատվի, COVID-19–ի վարակիչ հատկությունը մի փոքր կնվազի, իսկ երկրորդ ալիքը կսկսվի հոկտեմբերից»։

Ստացվում է, որ թուլանալը դեռ վա՞ղ է։ Այո՛։ Այնտեղ, որտեղ շտապել են կարանտինը չեղարկել, կորոնավիրուսն արդեն վերադարձել է` չսպասելով աշնանը, և ստիպված են դարձյալ խիստ միջոցներ ձեռնարկել։ Նախկինից էլ խիստ։

Սինգապուրցի գիտնականը կանխատեսում է, որ առաջիկայում նոր կորոնավիրուսի բռնկում է լինելու

Իտալական Վենետոյում (Վենետիկ) կորոնավիրուսով վարակված, սակայն ստացիոնար բուժումից հրաժարված բնակիչներին ազատազրկում է սպառնում։

COVID-19–ի հետ կապված իրավիճակի բարդացման պատճառով Սերբիայի նախագահը խոստանում է Բելգրադում պարետային ժամ սահմանել։ Այդ պատճառով բողոքի ակցիաները չեն դադարում։

Եվ այսպես շարունակ։ Ասածս ի՞նչ է։ «Կորոնայի» առաջին ալիքն ամբողջությամբ չմարելով` աշնանը կամ սպասվող ձմռան սկզբին կարող ենք հայտնվել երկրորդի հարվածի տակ, և այդ ժամանակ ինքնամեկուսացման կամ հարկադիր մեկուսացման խստացումներն ավելի սարսափելի պատկեր կստանան։ Խիստ կարանտինը կվերադառնա, և դա որևէ լավ բան չի խոստանում։

Այդ «պատժամիջոցը»՝ մեկուսացումը, ինչպես արդեն գիտենք, ամենաբարդն է մեզ համար․ բակերը, ընկերները, հարևանները, նարդին, սուրճը, մանղալը, գրկախառնություններ-համբույրները և խիստ հայկական «ջիգյարի» այլ արտահայտումները՝ ամեն բան գրողի ծոցն է գնում և վճռական հակասության մեջ է մտնում չորս պատերի մեջ փակված մնալու հեռանկարի հետ։ Դե, սովոր չենք, չենք կարողանում, չենք ցանկանում․․․

Իսկ այժմ՝ նրանց մասին, ովքեր կարողանում են, գիտեն և անգամ հաճույք են ստանում դրանից։ Օգտակար կլինի իմանալ հնարավոր տհաճություններից առաջ։

Աշխարհում բազմաթիվ մասնագիտություններ և սիրողական զբաղմունքներ կան, որոնք տևական ժամանակ հասարակությունից հեռու ապրելու ունակություն են ենթադրում՝ երկրաբաններ, տիեզերագնացներ, միայնակ ճանապարհորդներ, սուզանավերի նավաստիներ, էլ չասենք նրանց մասին, ովքեր նստած են ճաղերի հետևում։

Կորոնավիրուսից հետո խանգարումնե՞ր են ի հայտ գալիս. գիտնականների նոր բացահայտումը

Օրինակ` գործարար Վարդա Ա․-ն, որը տնտեսական հոդվածով անազատության մեջ էր հայտնվել։ Բանտախցում նստած է եղել գրեթե մեկ տարի, այն էլ` մենախցում։ Վարդան Ա․-ն չի հասկանում նրանց, ովքեր չեն կարողանում իրենք իրենց հետ մենակ մնալ․ միայնության մեջ ավելի լավ ես մտածում, ավելի արագ ես լուծումներ գտնում, կոնֆլիկտների ավելի քիչ առիթներ կան։ Թեև բանտը, իհարկե, քաղցր բան չէ, ավելին` առանձնանալու վատագույն վայրն է։

Կարող ես մենակության զգացողությունը «վայելել» ոչ միայն բանտախցում, այլև տիեզերքում։ Քանի որ մենք սեփական տիեզերագնացներ դեռ չունենք, հիշենք ռուս տիեզերագնացներին։ Տիեզերագնաց-փորձարկող Ալեքսանդր Միսուրկինի խոհերից․ «Փոքրիկ, փակ տարածքում երկար ժամանակ միևնույն մարդկանց հետ ծանր է ապրել, բայց պետք է հասկանալ, որ կայանի ներսում անվտանգ է, իսկ եթե դուրս գաս, կմեռնես, չէ՞ որ դրսում վակուում է»։

COVID-19-ի հետ համեմատությունը ակամա է ծնվում․ ինքնամեկուսացումը չարիք չէ, այլ բարիք, իսկ համաճարակաբանորեն ոչ բարենպաստ տարածություն դուրս գալը վտանգավոր է յուրաքանչյուրիս և մեր մտերիմների համար։ Տիեզերագնացը նաև նշում է, որ փակ տարածության մեջ շատ կարևոր են մարդկանց միջև հարգալից և փոխվստահելի հարաբերությունները։

Բնակարանի չորս պատերի մեջ երկար ժամանակ մենակ մնացած մարդկանց մասին․ այստեղ տեղին է հիշել հայտնի ճանապարհորդ Ֆյոդոր Կոնյուխովի խորհուրդները։ Առավելագույն ժամանակը, որ նա անցկացրել է ինքն իր հետ, 222 օր է՝ զբոսանավով շուրջերկրյա ճամփորդություն կատարելու ընթացքում, առանց նավահանգիստներ մտնելու և առանց բջջային հեռախոսների. 1990թ․-ին դրանք դեռ չկային։

Հայտնի ճանապարհորդը հաստատում է գործարար-բանտարկյալի կարծիքը․ «Մենակությունը շուրջդ դիտելու, ինքդ քո մեջ նայելու հնարավորություն է տալիս»։

Բայց նույն այդ Կոնյուխովը Esquire ամսագրին տված հարցազրույցում խոստովանում է․ «Գիտարշավների ժամանակ ձանձրանալու, տաղտուկին տրվելու ժամանակ չկա, պետք է աշխատես, դու ունես նպատակ, դրան հասնելու միջոցներ, հեռանկարները հստակ են և հասկանալի։ Այդ առումով, իհարկե, օվկիանոսում ավելի հեշտ է, քան Մոսկվայում ինքնամեկուսացման մեջ»։

Կոնյուխովը, իհարկե, չգիտի, որ Երևանում շատ ավելի դժվար է ինքնամեկուսացած լինել, փոխարենը մենք գիտենք։ Եվ երևի սկսում ենք գիտակցել, որ փորձությունների շրջանում ամենավատ բանը մենակությունը չէ․ ամենավատը ձեռքերը ծալած նստելն է։

Իսկ մինչ այդ կորոնավիրուսի երկրորդ ալիքը թափ է առնում։ Իսպանիայի հյուսիս-արևմուտքում՝ Լուգո գավառում, դրա պատճառով կրկին կարանտին են հայտարարել։ Լուգոն արդեն երկրորդ մարզն է Իսպանիայում, որտեղ կրկնակի կարանտին է։ Հուլիսի 4-ին նույնը տեղի ունեցավ ավելի քան 200 հազար բնակչություն ունեցող Սեգրիայում (կատալոնական Լյեյդա գավառ)։

Հայաստանում կորոնավիրուսի առաջին ալիքն անգամ դեռ չի ավարտվել։ Պատրաստվել է պետք։

271
թեգերը:
քաղբանտարկյալ, տիեզերագնաց, վարակ, կորոնավիրուս, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
Գիտնականներին հաջողվել է գտնել կորոնավիրուսի թույլ կողմերը
Կորոնավիրուսի կարող է վտանգավոր լինել սրտի համար. ռուս գիտնական
Գիտնականները կանխատեսո՞ւմ էին համավարակի բռնկումը
Բեռնատարներ. արխիվային լուսանկար

Ինչպե՞ս լուծել ԵԱՏՄ-ում բեռների փոխադրման խնդիրները․ նոր մարմին է ստեղծվել

0
(Թարմացված է 23:26 10.07.2020)
Ենթադրվում է, որ օպերատիվ կոմիտեն գլխավորելու է Եվրասիական տնտեսական հանձնաժողովի նախագահ Միխայիլ Մյասնիկովիչը։ Աշխատանքային խմբում կներառվեն հինգ նախարարները՝ Գեղամ Վարդանյանը, Տիմուր Ժակսիլիկովը, Օլեգ Պանկրատովը, Վիկտոր Նազարենկոն ու Անդրեյ Սլեպնևը։

ԵՐԵՎԱՆ, 10 հուլիսի - Sputnik. Եվրասիական տնտեսական հանձնաժողովն այսօր ԵԱՏՄ սահմաններով ապրանքների փոխադրման հետ կապված վիճելի հարցերի լուծման օպերատիվ կոմիտե է ստեղծել։ Միության անդամ երկրների միջև բազում տարաձայնություններ են ծագել՝ ԵԱՏՄ-ի ներսում բեռների երկարատև ստուգում, Չինաստանից «մոխրագույն» ներմուծում և այլն։ Sputnik Արմենիան փորձել է հասկանալ՝ ինչ գործիքների միջոցով կարելի է լուծել ներկայիս խնդիրներն ու ինչու են դրանք առաջացել։

Խնդիրները կապված են այն փաստի հետ, որ Միության ներսում սահմաններին բեռների փոխադրման վերահսկողության միջոցառումներ են սկսել անցկացվել։ Տեղեկությունը Sputnik Արմենիայի հետ զրույցում հայտնեց Եվրասիական տնտեսական հանձնաժողովի (ԵԱՏՀ) մաքսային համագործակցության նախարար Օլեգ Պանկրատովը։

«Բոլորս էլ հասկանում ենք, որ միասնական մաքսային ու տնտեսական տարածքը նման հսկողություն չի ենթադրում, սակայն դրա կիրառման համար օբյեկտիվ պատճառներ կան (Ռուսաստանը ստուգում է` արդյո՞ք բեռների մեջ չկան ապրանքներ, որոնք արգելված է ՌԴ ներկրել, – խմբ․), - ավելացրեց ԵԱՏՀ անդամը։

ՌԴ–ն կբացի ԵԱՏՄ երկրների հետ օդային սահմանը, բայց համաճարակաբանական վիճակը հաշվի առնելով

Այժմ Միության երկրները ԵԱՏՄ տարածքով բեռների փոխադրման ժամանակ ծագած հակասությունների լուծման «ճանապարհային քարտեզ» են մշակում։

«Մենք հասկանում էինք, որ ստեղծված իրավիճակը տանում է ներքին առևտրի նվազեցմանն ու որոշակի լարվածության առաջացմանը։ Այս պատճառով հանձնաժողովում որոշվեց բարձր մակարդակի խումբ (օպերատիվ կոմիտե, – խմբ․) ստեղծել։ Այն օպերատիվ կերպով վիճելի իրավիճակների լուծման «ճանապարհային քարտեզ» կձևավորի», - ասում է Պանկրատովը։

Նախարարը նշում է, որ «ճանապարհային քարտեզի» նպատակը պետությունների շահերի բալանսը գտնելն է։

«Այնպիսի քայլեր են ձեռնարկվելու, որ երկրները, որոնք սահմանափակում են մուտքն իրենց շուկա, շահագրգռված լինեն մուտքը բացելու հարցում։ Իսկ երկրները, որոնք ապրանք են մատակարարում այդ շուկա, ուզենան հնարավորինս արագ իրենց մոտ ներդնել ժամանակակից տեխնոլոգիաներ, որոնք ցույց կտան, որ ապրանքների բոլոր հոսքերը «սպիտակ» են ու լիարժեք մաքսային մաքրում են անցնում», - ասում է ԵԱՏՀ կոլեգիայի անդամը։

Նախարարի խոսքով՝ այդ տեխնոլոգիաները կապահովեն հարկերի ամբողջական վճարումը ԵԱՏՄ բյուջե ու երկրների բյուջեների առաջ հարկային պարտականությունների կատարումը։

Ենթադրվում է, որ օպերատիվ կոմիտեն գլխավորելու է Եվրասիական տնտեսական հանձնաժողովի նախագահ Միխայիլ Մյասնիկովիչը։ Աշխատանքային խմբում կներառվեն հինգ նախարարները՝ Գեղամ Վարդանյանը, Տիմուր Ժակսիլիկովը, Օլեգ Պանկրատովը, Վիկտոր Նազարենկոն ու Անդրեյ Սլեպնևը։

Բացի այդ, կոմիտեում կընդգրկվեն յուրաքանչյուր երկրից պետական իշխանության օրգանների երեք-չորս ներկայացուցիչ, որոնք պատասխանատու են ներքին առևտրի, մաքսային ոլորտի ու ֆիսկալային մուտքերի համար։

Կուբան, Ուզբեկստանն ուզում են ԵԱՏՄ-ում դիտորդ երկրի կարգավիճակ ստանալ. ինչ է պահանջել ՀՀ–ն

Ռուսաստանի գիտությունների ակադեմիայի (ՌԳԱ) Պրիմակովի անվան Համաշխարհային տնտեսության և միջազգային հարաբերությունների ինստիտուտի ավագ գիտաշխատող Ստանիսլավ Պրիտչինը կարծում է, որ օպերատիվ կոմիտեի ստեղծումն «այն քայլն է, որը թույլ կտա լուծել գոյություն ունեցող հակասությունները»։

ԵԱՏՄ սահմաններին խնդիրների մի ամբողջ համալիր զարգացավ այն պատճառով, որ Միությունը չափազանց արագ էր զարգանում։

«Եթե համեմատենք այն ճանապարհը, որը Եվրասիական տնտեսական հանձնաժողովն անցել է ստեղծման պահից մինչև ինտեգրման ներկայիս փուլը, ապա Եվրոպական խորհրդին դրա համար մի քանի տասնյակ տարի է պետք եղել։ Մենք առաջ ենք ընկել ժամանակացույցից. բնականաբար, աճի հետ կապված ցավեր են առաջանում», - կարծում է փորձագետը։

Առկա խնդիրները հիմա է պետք լուծել, քանի որ ԵԱՏՄ զարգացման` մինչև 2025 թվականի ռազմավարություն է մշակվում։ Փաստաթուղթը պետք է կազմված լիներ մայիսի 19-ին Բարձրագույն Եվրասիական տնտեսական խորհրդի նիստում, սակայն ԵԱՏՄ երկրների նախագահները որոշել էին, որ ռազմավարության մեջ պետք է լրացումներ անել։

2025 թ-ին ԵԱՏՄ-ում պետք է ձևավորվի գազի միասնական սակագին. Քոչարյան

0
թեգերը:
բեռնատար, Եվրասիական Տնտեսական Միություն (ԵԱՏՄ), Հայաստան
թեմա:
Հայաստան և ԵԱՏՄ
Ըստ թեմայի
Հայկական բիզնեսը կշահի ԵԱՏՄ ապրանքների մատակարարման կանոնների պարզեցումից
ԵԱՏՄ տարածքում արդեն ուզում են մեղմացնել սահմանափակումները. քննարկում է եղել
ԵԱՏՄ–ում էներգակիրների միասնական շուկան հնարավոր կլինի կուլմինացիայի դեպքում. Լուկյանով