ԵՐԵՎԱՆ, 14 ապրիլի – Sputnik. Բաքուն նախատեսում է մինչև Հայաստանի սահման հասնող երկաթուղու շինարարությունն ավարտել երկու, առավելագույնը 2-2,5 տարվա ընթացքում, հայտարարել է Ադրբեջանի նախագահ Իլհամ Ալիևը:
«Այն անպայման կկառուցվի, քանի որ մենք արդեն դրա համար միջոցներ ենք հատկացրել բյուջեից և ձեռնամուխ ենք եղել աշխատանքներին», - ասել է Ալիևը՝ պատասխանելով «Նոր հայացք Հարավային Կովկասին. հետկոնֆլիկտային զարգացում և համագործակցություն» խորագրով միջազգային խորհրդաժողովի մասնակիցների հարցին:
Այդ երկաթգիծը կդառնա մինչև Ադրբեջանի Նախիջևանի Ինքնավար Հանրապետություն տանող երկաթուղային ենթակառուցվածքի մի մասը։
Նա հայտարարել է, որ երկաթուղու ևս 40 կիլոմետրանոց հատվածը պետք է կառուցվի Հայաստանի տարածքում։ «Բայց այդ հատվածը պետք է կառուցի «Ռուսական երկաթուղիները»։ Պատճառն այն է, որ Հայաստանի երկաթուղին պատկանում է «Ռուսական երկաթուղիներին»։ Մեզ արդեն հայտնել են, որ իրենք մտադիր են անել դա»,-ասել է Ալիևը։
Նա հավելել է, որ այդ նախագծի իրագործումը Հայաստանի համար ելք կբացի դեպի Ռուսաստան, Իրան և, հավանական է, Թուրքիա, իսկ Ադրբեջանի համար՝ դեպի Նախիջևան և Թուրքիա (Զանգեզուրի միջանցքով)։
«Մենք Թուրքիայի հետ արդեն հաղորդակցություն ունենք Վրաստանի տարածքով՝ Բաքու-Թբիլիսի-Կարս երկաթուղու միջոցով։ Ռուսաստանը Ադրբեջանի և Հայաստանի տարածքով լրացուցիչ կապեր կունենա Թուրքիայի հետ։ Իրանը նույնպես կապեր կունենա Հայաստանի հետ։ Այս նախագիծը կարող է նաև Իրանից Ռուսաստան տանող Հարավ-Հյուսիս տրանսպորտային միջանցքի մաս լինել»,-ասել է Ալիևը։
Հիշեցնենք, որ տարածաշրջանում տրանսպորտային հաղորդակցության ապաշրջափակման հարցով զբաղվում է Հայաստանի, Ռուսաստանի և Ադրբեջանի փոխվարչապետների ղեկավարած աշխատանքային խումբը:
