ԵՐԵՎԱՆ, 10 մարտի —Sputnik. Թբիլիսիում ուժեղ քամու հետևանքով ավելի քան 50 տներ են վնասվել, ծառեր տապալվել, վնասվել ենթակառուցվածքները։ Այս մասին հայտնում է Sputnik Գրուզիան` հղում անելով արտակարգ իրավիճակների կառավարման ծառայության Facebook-յան էջին։
Քամին չի դադարի նաև այսօրվա ընթացքում։
Ծառայության տվյալներով` քամու հետևանքով Թբիլիսիում մարտի 9-ին 5 ժամվա ընթացքում 68 ծառ է վնասվել, 7 լուսատու, 6 ավտոմեքենա, 6 գովազդային վահանակ և 5 գազախողովակ։
Քամին խաթարել է նաև մայրաքաղաքի միջազգային օդանավակայանի աշխատանքը. 10 ինքնաթիռ վայրէջք են կատարել Բաթումի և Քութայիսիի օդանավակայաններում։
Քամուց տուժել են նաև մարզերի բնակիչները։ Իմերեթի մարզում Սաջավախո գյուղում անձրևի հետևանքով սողանքներ են եղել, և փլուզվել է ավտոճանապարհի երթևեկելի հատվածի մի մասը։
Մցխեթ-Մթիանետի մարզում ջրհեղեղ է եղել. Քուռ գետը դուրս է եկել ափերից և վնասել ափամերձ բնակելի տներից մեկը։
Նշված ժամանակահատվածում 112 ծառայությունը 254 ահազանգ է ստացել, որոնցից 166-ը` Թբիլիսիից։
Թբիլիսիի քաղաքապետարանն ավելի վաղ կոչ էր արել բնակիչներին զգույշ լինել և ուժեղ քամու դեպքում ծառերի և թեթև շինությունների մոտ չկանգնել։
