ԵՐԵՎԱՆ, 7 դեկտեմբերի — Sputnik. Վրաստանի քաղաքացին որոշել է ապօրինի հատել Թուրքիայի սահմանը ճամպրուկում` այդ երկիր մուտք գործելու արգելքի պատճառով, հայտնում է Sputnik Գրուզիան։
«Թուրքական սահմանապահները «Սարփի» հսկիչ անցակետում հայտնաբերել են ճամպրուկում թաքնված աղջկան, որը Վրաստանի քաղաքացիություն ունի։ 22-ամյա քաղաքացին փորձում էր ապօրինի ճանապարհով անցնել Թուրքիա», — ասվում է հրապարակման մեջ։
Վրաստանի քաղաքացուն արգելել են Թուրքիա մուտք գործել, այդ պատճառով նա որոշել է ճամպրուկի մեջ ճանապարհորդել։ Այդ հարցում նրան օգնել է Վրաստանի մեկ այլ քաղաքացի, որին պատկանել է այդ ճամպրուկը։ Սահմանապահների մոտ կասկած է առաջացել, երբ Վրաստանի քաղաքացին, մեծ ճամպրուկը բռնած, փորձել է ոտքով հատել սահմանը։
Ճամպրուկի մեջ թաքնվելու միջոցով սահմանը հատելու փորձեր հաճախ են լինում։ Այս տարվա փետրվարին թուրքական սահմանապահները ճամպրուկի մեջ հայտնաբերել էին Վրաստանի 28-ամյա քաղաքացու, որը Վրաստանից Թուրքիա էր ուղևորվում։ Իսկ սեպտեմբերին Վրաստանի մեկ այլ քաղաքացի փորձել էր ճամպրուկի մեջ Վրաստանից Թուրքիա անցկացնել Ռուսաստանի 27-ամյա քաղաքացուն։
