ԵՐԵՎԱՆ, 14 մարտի — Sputnik. Ադրբեջանում կալանավորված բլոգեր, ՌԴ և Իսրայելի քաղաքացի Ալեքսանդր Լապշինի կինն իր ֆեյսբուքյան էջում հայտնում է, որ ամուսնու հետ վերջին հեռախոսազրույցից լավատեսական տպավորություն է ստացել:
ՙԶրուցել ենք ուրբաթ օրը, և ձայնն էր, կարծես, առույգ, և լավատեսությունն էր նկատելի, և պայմաններն այժմ ավելի լավ են, քան Բելառուսում էին՚,- գրում է կալանավորված բլոգերի կինը և հավելում, որ բարելավում է նկատել անգամ տեղական լրատվամիջոցների հրապարակումներում, որոնք, նրա որակմամբ, ՙնվազեցրել են զայրույթի աստիճանը՚:
ՙԲայց անհանգստացնում է այն, որ մինչ այժմ որևէ պարզություն չկա գործի մեջ՚,- իր ֆեյսբուքյան գրառման մեջ նշում է Լապշինի կինը:
Ի դեպ, կնոջ տեղեկացմամբ, Լապշինին թույլատրվել է հարազատների հետ հեռախոսակապ հաստատել միայն օրեր առաջ՝ մարտի 4-ին, ուստի ուրբաթ օրը՝ մարտի 10-ին Լապշինը կնոջը զանգահարել է երկրորդ անգամ:
Ի դեպ, Լապշինի հետ մարտի 9-ին կալանավայրում հանդիպել է նաև նրա փաստաբան Էդուարդ Չեռնինը, ով չի բացառել, որ առաջիկայում Լապշինին թույլատրվի նաև հանդիպել հարազատներին կալանավայրում:
Հիշեցնենք, Բլոգեր Լապշինի նկատմամբ Ադրբեջանում քրեական գործ էր հարուցվել այն փաստով, որ նա ապօրինի հատել է այդ երկրի սահմանն ու այցելել ԼՂՀ: Այս գործի սահմաններում նրա նկատմամբ հայտարարվել էր միջազգային հետախուզում: 2016 թվականի դեկտեմբերի 15-ին Լապշինը հայտնաբերվել և ձերբակալվել էր Բելառուսում, ապա այդ երկրի գլխավոր դատախազի որոշմամբ արտահանձնվել Ադրբեջանին: