Արման Թաթոյանը Սյունիքում (արխիվային լուսանկար)

Սյունեցիներին ստիպում են ցուցմունք տալ համայնքապետների դեմ. Թաթոյանը բողոքներ է ստացել

94
(Թարմացված է 13:17 12.07.2021)
Ըստ ահազանգերի՝ հատկապես ճնշումներ են գործադրում կանանց նկատմամբ` իրենց կամ ամուսիններին Երևան տանելու, ձերբակալելու կամ կալանավորելու սպառնալիքներով:

ԵՐԵՎԱՆ, 12 հուլիսի – Sputnik. Մարդու իրավունքների պաշտպան Արման Թաթոյանը հայտնում է, որ սյունեցիներից բողոքներ է ստացել այն մասին, թե իրավապահ մարմինները սպառնալիքով ստիպում են ցուցմունքներ տալ ընտրակաշառքի վերաբերյալ։

Սյունիքի մարզի բնակիչները մասնավորապես հայտնել են, որ իրավապահ մարմինները բերման են ենթարկում իրենց ու հարկադրում տալ իրականությանը չհամապատասխանող ցուցմունքներ: Բնակիչների խոսքով` Գորիս, Քարահունջ, Որոտան համայնքների ղեկավարներն իրենց սոցիալական աջակցություն են տվել, որոնք իրավապահները ստիպում են ներկայացնել որպես ընտրակաշառք:

Բնակիչները պնդել են, որ իրենք մշտապես սոցիալական աջակցություն են ստացել, և դրանք որևէ առնչություն չունեն ընտրությունների, վարչապետի պաշտոնակատարին կամ այլ քաղաքական ուժի ղեկավարի օգտին քվեարկելու կամ չքվեարկելու հետ:

Ըստ ահազանգերի՝ հատկապես ճնշումներ են գործադրում կանանց նկատմամբ` իրենց կամ ամուսիններին Երևան տանելու, ձերբակալելու կամ կալանավորելու սպառնալիքներով:

Այդ մասին առկա են նաև հրապարակումներ համացանցում, որոնք այսօր կուղարկվեն դատախազություն՝ քննության նպատակով։

Թաթոյանը նաև աշխատանքային խումբ է գործուղել Սյունիք։

Մարդու իրավունքների պաշտպանի հանձնարարությամբ՝ այսօր այցեր կիրականացվեն նաև Քարահունջ, Որոտան վարչական շրջանների կալանավորված ղեկավարներին, ինչպես նաև Քաջարան համայնքի ղեկավարին, որը գտնվում է քրեակատարողական հիմնարկում:

Հիշեցնենք` ԱԱԾ աշխատակիցները երեկ խուզարկություն էին իրականացրել Քաջարանի համայնքապետի բնակարանում, Զանգեզուրի պղնձամոլիբդենային կոմբինատում, ձերբակալել կոմբինատի աշխատակիցներից մեկին։

Քաջարանի համայնքապետին բերման էին ենթարկել, հուլիսի 7-ին բերման էր ենթարկվել, ապա ազատ արձակվել Գորիս համայնքի ղեկավար Առուշ Առուշանյանը, իսկ Քարահունջի վարչական ղեկավար Լուսինե Ավետյանը կաշառք տալու մեղադրանքով հուլիսի 9–ին կալանավորվեց։

Հուլիսի 9–ին hայտնի դարձավ նաև, որ Որոտան համայնքի վարչական ղեկավար Սուրեն Օհանջանյանին նույնպես ձերբակալել են։

94
թեգերը:
Հայաստան, Սյունիք, Արման Թաթոյան
Ըստ թեմայի
Որոտանի գյուղապետի տնից զենք ու զինամթերք է հայտնաբերվել
Մութ հարցեր են. Մեղրիի նախկին համայնքապետ Մխիթար Զաքարյանին ԿԸՀ գնալու ծանուցագիր են տվել
Դիմակավորված անձինք Զաքարյանին պառկեցրել են գետնին, նկարահանել ու ներս տարել. փաստաբան
Սյունիք

Ադրբեջանցի զինծառայողները Ճակատեն և Դավիթ Բեկ գյուղերից գողացել են 8 կով և 1 ցուլ. ՄԻՊ

64
(Թարմացված է 00:17 04.08.2021)
ՀՀ ՄԻՊ–ը ևս մեկ անգամ վերահաստատել է, որ ՀՀ բնակչության պաշտպանության, իրավունքների երաշխավորման համար Սյունիքի և Գեղարքունիքի շուրջ անհրաժեշտ է ստեղծել անվտանգության գոտի:

ԵՐԵՎԱՆ, 4 օգոստոսի – Sputnik. Հայաստանի մարդու իրավունքների պաշտպան Արման Թաթոյանը ֆեյսբուքյան իր էջում ներկայացրել է, թե վերջին օրերին ինչ ահազանգեր է ստացել ադրբեջանական զինծառայողների` Սյունիքի հատվածից անասուններ գողանալու վերաբերյալ։

«Ադրբեջանական զինծառայողները գողացել են ՀՀ Սյունիքի մարզի Կապանի Ճակատեն և Դավիթ Բեկ գյուղերի 3 ընտանիքի պատկանող 8 կով և 1 ցուլ»,–գրել է նա:

Մասնավորապես, ՀՀ մարդու իրավունքների պաշտպանի աշխատակազմը 2021 թվականի օգոստոսի 3-ի ահազանգերով պարզել է, որ Սյունիքի մարզի Կապան համայնքի Ճակատեն գյուղի վարչական տարածքում՝ անմիջապես գյուղից մոտ 1 կմ հեռավորության վրա գտնվող արոտավայրում 2021 թվականի հուլիսի 26-ին արածացնելու են տարել գյուղի երկու ընտանիքին պատկանող 4 կովեր:

Կենդանիներն, արածելով, հասել են գյուղի վարչական տարածքում գտնվող «Յուրդեր» անվամբ արոտավայրը և մոտեցել ադրբեջանական զինված ուժերի վերահսկողության տակ գտնվող տարածքին: Ըստ ահազանգերի՝ դրանից հետո ադրբեջանական զինծառայողները կենդանիներին կապել են իրենց հատվածում, թույլ չեն տվել վերադառնալ և, բնակիչները շուրջ 5 օր իրենց բնակելի տան դիմացի սարից հեռադիտակով տեսել են, որ կենդանիները գտնվում են «Ջամբար» կոչվող տարածքում, իսկ օգոստոսի 1-ի դրությամբ կենդանիներն արդեն անհետացել են:

Նշված դեպքից բացի, 2021 թվականի օգոստոսի 2-ին Մարդու իրավունքների պաշտպանի աշխատակազմը ևս մեկ ահազանգ է ստացել այն մասին, որ ՀՀ Սյունիքի մարզի Կապան համայնքի Դավիթ Բեկ գյուղի բնակիչը գյուղի 3 ընտանիքի պատկանող 6 խոշոր եղջերավոր կենդանիների (1 ցուլ, 5 կով) 2021 թվականի հուլիսի 14-ին արածացնելու է տարել գյուղին պատկանող՝ շուրջ 1.5 կմ հեռավորության վրա գտնվող արոտավայր:

Վերին Շորժայում մարդիկ ադրբեջանական նշանառության տակ են. Թաթոյանը լուսանկար է հրապարակել

Գյուղի բնակիչը, կարճ ժամանակ հեռացել է արոտավայրից և վերադառնալուն պես հայտնաբերել, որ կենդանիներից 5-ը չկան, իսկ կովերից մեկը ադրբեջանական զինված ուժերի վերահսկողության տակ գտնվող կողմից վերադառնում է՝ պարանը գլխին կապած (ինքը կենդանիներին առանց պարան է արածացնելու տարել):

Հեռվում նկատել է, թե ինչպես են ադրբեջանական զինծառայողները դեպի իրենց խորքը քշում կենդանիներին:

Նշված երկու դեպքերում էլ տեղի ունեցածի մասին բնակիչները տեղեկացրել են գյուղերի վարչական շրջանների ղեկավարներին:

Դեպքերի մասին տեղյակ են պահվել նաև ՀՀ Զինված ուժերի ներկայացուցիչները և ՌԴ սահմանապահները: Կենդանիների վերադարձման ուղղությամբ տարվող բանակցությունները օգոստոսի 3-ի դրությամբ արդյունք չեն տվել:

Ադրբեջանական զինծառայողները հրաժարվում են վերադարձնել կենդանիներին՝ պատճառաբանելով, թե նրանք իրենց մոտ չեն:

Այս տվյալները Մարդու իրավունքների պաշտպանի աշխատակազմը հաստատել է Ճակատեն և Դավիթ Բեկ գյուղերի նշված բնակիչների, նրանց համագյուղացիների հետ առանձնազրույցներով, ինչպես նաև դա հաստատել են համայնքային մարմինները:

«Ադրբեջանական զինծառայողների կողմից ՀՀ սահմանային բնակիչների պատկանող կենդանիների գողությունները, նրանց վնաս պատճառելն ունի պարբերական բնույթ: Նրանց անօրինական արարքները խախտում են ՀՀ բնակիչների սեփականության իրավունքը, այդ արարքներն ուղղված են անասնապահությամբ զբաղվելու և ընտանիքի եկամուտը վաստակելու հնարավորությունից զրկելուն»,– նշել է Թաթոյանը:

Նա ընդգծել է, որ այս ամենն իր հերթին անվտանգությունից բացի, առաջացնում է սոցիալական բնույթի խնդիրներ, այդ թվում` լուրջ վնասներ է հասցնում ՀՀ սահմանային բնակչությանը:

ՌԴ սահմանապահները մասնակիորեն տեղակայվել են Սյունիքում. Կոպիրկին

ՀՀ ՄԻՊ–ը ևս մեկ անգամ վերահաստատել է, որ ՀՀ բնակչության պաշտպանության, իրավունքների երաշխավորման համար Սյունիքի և Գեղարքունիքի շուրջ անհրաժեշտ է ստեղծել անվտանգության գոտի:

Դա պահանջում է նրանց հեռացում ՀՀ սահմանային գյուղերի հարևանությունից և Սյունիքի համայնքների միջև ճանապարհներից:

64
թեգերը:
ՀՀ ՄԻՊ, Արման Թաթոյան, Հայաստան, Սյունիք, կով, ադրբեջանցի, զինծառայող
Ըստ թեմայի
«Խաղաղությունը, ցավոք, միայն մեզնից չի կախված». Փաշինյանը` նախընտրական խոստման մասին
Փաշինյանն ասել է` ինչու ՀՀ–ն սահմանային իրադրությունը լուծելու միջոցներ չի ձեռնարկում
Ռուսաստանի աջակցությամբ Հայաստան է վերադարձել 81 գերի. ՀՀ–ում ՌԴ դեսպան
Արման Թաթոյան

ՄԻՊ–ը կուսումնասիրի խորհրդարանում լրագրողների աշխատանքի սահմանափակումների հարցը

18
(Թարմացված է 23:44 03.08.2021)
Լրագրողների մասնագիտական աշխատանքի սահմանափակումների առնչությամբ ՄԻՊ–ը նախաձեռնել է ուսումնասիրություն՝ հրատապության սկզբունքով։

ԵՐԵՎԱՆ, 3 օգոստոսի – Sputnik. ՀՀ Մարդու իրավունքների պաշտպանը կուսումնասիրի ԱԺ-ում լրագրողների աշխատանքի սահմանափակումների հարցը։ Տեղեկությունը հայտնում է ՀՀ ՄԻՊ Արման Թաթոյանը` ֆեյսբուքյան իր էջում։

Նշվում է, որ Ազգային ժողովում լրագրողների մասնագիտական աշխատանքի սահմանափակումների առնչությամբ Մարդու իրավունքների պաշտպանը երեկվանից նախաձեռնել է ուսումնասիրություն՝ հրատապության սկզբունքով:

«Իրականացվում է լրագրողների ահազանգերի, դիմումների, պաշտոնական հրապարակային պարզաբանումների, ինչպես նաև միջազգային փորձի ու չափանիշների ուսումնասիրություն: Ահազանգերը քննարկվել են լրագրողների հետ, պաշտոնական պարզաբանումներ են հայցվել Ազգային ժողովից»,–նշված է հաղորդագրության մեջ:

Ուսումնասիրության արդյունքներով Մարդու իրավունքների պաշտպանի դիրքորոշումը կհրապարակվի առաջնահերթության սկզբունքով:

Հիշեցնենք, որ Աժ 8-րդ գումարման նստաշրջանը մեկնարկել է խորհրդարանում լրագրողների ազատ տեղաշարժի սահմանափակումներով։

Ինչի՞ կհանգեցնի իշխանության և ընդդիմության լարումը ԱԺ–ում, կամ բոլոր կամուրջներն այրված են

Նրանց տեղաշարժը հսկում են Պետական պահպանության ծառայության աշխատակիցները, առաջիկայում նախատեսվում է ընդհանրապես արգելել լրագրողներին մուտք գործել խորհրդարանի շենք, լինել միջանցքներում, հարցազրույցներ իրականացնել հայրենի օրենսդիրների հետ:

Նշենք, որ խորհրդարանում հավատարմագրված լրագրողները ստորագրահավաք են նախաձեռնել՝ պահանջելով չեղարկել լրագրողների տեղաշարժի հետ կապված սահմանափակումները: Նրանք պատրաստվում են նաև Աժ խոսնակի հետ քննարկել հարցը։

18
թեգերը:
ԱԺ, Հայաստան, խորհրդարան, Ալեն Սիմոնյան, Լրագրող, ԶԼՄ, Արման Թաթոյան, ՀՀ ՄԻՊ
Ըստ թեմայի
Ադրբեջանական ԶՈւ-ի պատճառով Գեղարքունիքի որոշ գյուղեր զրկվել են խմելու և ոռոգման ջրից. ՄԻՊ
Ինքնահրկիզման դեպքը ՄԻՊ–ի հետ առնչություն չունի. քաղաքացին ավելի քան 50 տոկոս այրվածք ունի
Ազատազրկվածներին պահելու խցերում անմարդկային պայմաններ են․ ՄԻՊ–ը լուսանկարներ է հրապարակել