ԵՐԵՎԱՆ, 12 հունիսի - Sputnik. Հայաստանն ու Ռուսաստանը հետևողականորեն զարգացնում են հայ-ռուսական դաշնակցային հարաբերությունները, որոնց հիմքում ընկած է մեր ժողովուրդների դարավոր բարեկամության ամուր հիմքի վրա բազմաբնույթ փոխգործակցություն կառուցելու ձգտումը։ Ռուսաստանի օրվա կապակցությամբ ՌԴ նախագահ Վլադիմիր Պուտինին ուղղված ուղերձում այս մասին նշել է ՀՀ վարչապետի պաշտոնակատար Նիկոլ Փաշինյանը։
Նա շնորհավորել է Պուտինին ու Ռուսաստանի եղբայրական ժողովրդին պետական տոնի` Ռուսաստանի օրվա առթիվ, նշել, որ Ռուսաստանի նորագույն պատմության մեջ հունիսի 12-ը մարմնավորում է երկրի քաղաքական և տնտեսական ոլորտներում հիմնարար վերափոխումները, միջազգային ասպարեզում Ռուսաստանի դերի ու տեղի էլ ավելի ամրապնդումը:
«Համոզված եմ, որ հայ-ռուսական միջպետական հարաբերությունները կշարունակեն զարգանալ դաշնակցային փոխգործակցության հունով` հանուն մեր պետությունների շահերի, տարածաշրջանային կայունության և անվտանգության ապահովման»,–ասվում է Փաշինյանի ուղերձում:
Փաշինյանը ՌԴ նախագահին մաղթել է քաջառողջություն և նորանոր հաջողություններ, իսկ Ռուսաստանի ժողովրդին՝ երջանկություն և բարեկեցություն:
ՌԴ-ն հավատարիմ է իր դաշնակից Հայաստանի անվտանգության ապահովման հանձնառությանը. Լավրով
