ԵՐԵՎԱՆ, 11 մայիսի – Sputnik. ՀՀ 2–րդ նախագահ Ռոբերտ Քոչարյանի և ՀՀ նախկին փոխվարչապետ Արմեն Գևորգյանի գործով այսօրվա նիստին Քոչարյանի պաշտպանը միջնորդեց հաջորդ դատական նիստը նշանակել հունիսի 20-ից ոչ շուտ, քանի որ պաշտպանյալը պետք է արտահերթ ընտրություններին մասնակցի։
Նշենք, որ նիստն ընթանում էր Երևանի ընդհանուր իրավասության դատարանի Շենգավիթի նստավայրում, դատավոր Աննա Դանիբեկյանի նախագահությամբ։ Արմեն Գևորգյանը ներկա չէր նիստին, քանի որ վատառողջ էր։
Քանի որ ամբաստանյալներից մեկի բացակայության պայմաններում հնարավոր չէր շարունակել դատական նիստը, Քոչարյանի պաշտպան Արամ Վարդևանյանն ասաց, որ իր պաշտպանյալը մասնակցելու է արտահերթ ընտրություններին և ունի ընտրվելու իրավունք, ուստի հաջորդ նիստը պետք է նշանակվի ընտրություններից հետո։
«Ընտրությունների մասնակցող անձինք ունեն հավասար մրցակցության իրավունք, այսինքն` պատգամավորի թեկնածուն պետք է ունենա բոլոր այն իրավունքները, ինչ մյուսները։ Առաջարկում եմ հաջորդ դատական նիստը նշանակել հունիսի 20-ից հետո կամ ասենք հունիսի 19-ին` լռության օրը»,–ասաց Վարդևանյանը` հավելելով, որ գործ ունենք հանրային շահի հետ։
Գործով դատախազը, սակայն, Ռոբերտ Քոչարյանի պաշտպանի միջնորդությունն առարկեց` ասելով, որ խոսքն այս դեպքում մասնավոր շահի մասին է։
Դատավորն էլ իր հերթին հայտնեց` Վարդևանյանի պատճառաբանությունը հիմնավոր չէր, հետևաբար հաջորդ նիստը չի կայանա հունիսի 20-ից հետո, այլ մայիսի 25-ին կլինի։
Հիշեցնենք, որ նախորդ` մայիսի 4-ին նախատեսված նիստը նույնպես հետաձգվեց, քանի որ Քոչարյանը և Գևորգյանը ներկա չէին նիստին։
Հիշեցնենք, որ ըստ մեղադրանքի`Քոչարյանը, իր պաշտոնեական դիրքն օգտագործելով, «Թի Էս Էս Սի Արմենիայի» տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ ընկերությանը տրամադրված ընդերքն օգտակար հանածոների շահագործման նպատակով ուսումնասիրության լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008–ի փետրվարին և մայիսին Սամվել Մայրապետյանի օժանդակությամբ նրանից ստացել է 3 միլիոն դոլար կաշառք։ Նրան մեղադրանք է առաջադրվել ՀՀ քրեական օրենսգրքի 311 հոդվածի 4-րդ մասի 2-րդ կետով (առանձնապես խոշոր չափի կաշառք ստանալը)։
Նշենք, որ մյուս քրգործով` ՀՀ քրեական օրենսգրքի 300.1 (սահմանադրական կարգը տապալելը) հոդվածով Քոչարյանի նկատմամբ քրեական հետապնդումը դադարեցվել է։ ՍԴ–ն որոշել էր, որ այդ հոդվածը չի համապատասխանում ՀՀ Սահմանադրությանը։
Արմեն Գևորգյանն էլ մեղադրվում է փողերի լվացման մեջ։
