ԵՐԵՎԱՆ, 17 ապրիլի - Sputnik. Հայ և սիրիացի ժողովուրդները կապված են պատմական սերտ առնչություններով և բարեկամական զգացմունքներով, որոնք իրական հիմք են հանդիսացել մեր երկրների միջև համագործակցության և հարաբերությունների զարգացման համար։ Սիրիայի նախագահ Բաշար Ալ-Ասադին Ազգային տոնի առթիվ հղած ուղերձն այսպես է սկսել ՀՀ վարչապետ Նիկոլ Փաշինյանը։
«Լիահույս եմ, որ Սիրիայի ժողովուրդը շուտափույթ կհաղթահարի ծանր ճգնաժամի հետևանքներն ու կընթանա խաղաղության և կայունության ուղիով։ Վերահաստատում եմ մեր պատրաստակամությունը` շարունակելու մեր նպաստը բերել առկա մարդասիրական խնդիրների լուծմանն ու մեր երկրների միջև ավանդական երկխոսության առավել խորացմանը՝ ի շահ մեր երկրների և ժողովուրդների»,–նշված է վարչապետի ուղերձում։
Նա Սիրիայի նախագահին քաջառողջություն և հաջողություններ է մաղթել, իսկ Սիրիայի բարեկամ ժողովրդին՝ խաղաղություն և բարօրություն։