ԵՐԵՎԱՆ, 9 ապրիլի - Sputnik. Անհետ կորածների և գերիների ծնողներն այնքան են մնալու ՊՆ–ի մոտ, մինչև իրենց հստակ երաշխիքներ տան իրենց որդիների վերադարձի կազմակերպման համար։ Լրագրողների հետ զրույցում այս մասին ասաց անհետ կորածներից մեկի հայրը։
Նշենք, որ երեկվանից անհետ կորած զինծառայողների ծնողները փակել են ՊՆ–ի բոլոր մուտքերը և թույլ չեն տալիս, որ ներսում գտնվող աշխատակիցները դուրս գան։ Քիչ առաջ, սակայն, Sputnik Արմենիայի տեսախցիկը ֆիքսել է, որ ուղղաթիռով ՊՆ տարածքը լքում են հղիները, առողջական խնդիրներ ունեցող կանայք։
«Շարունակելու ենք մնալ այստեղ։ Գնանք տուն` ի՞նչ անենք։ Երեկվանից այստեղ ենք, և որևէ մեկը մեզ չի ընդունել։ Եթե բավարար ջանքեր ներդնեին, հիմա մեր երեխաներն այստեղ կլինեին»,–ասաց տղամարդը։
Լուրերին, թե ադրբեջանական կողմը չի տվել գերիներին` անհետ կորածի հայրն այսպես արձագանքեց. «Թող մեր իշխանությունն էլ Քելբաջարը չտար Ադրբեջանին, թող մինչև այն տալը գերիներին ուզեին»։
Տղամարդը պատմեց, որ հոկտեմբերի 14-ից իր 18 տարեկան մինուճար տղայից լուր չունեն։ Երբ պատերազմը սկսվել է, նրա որդին 1-2 ամսվա զինվոր է եղել։ Հոկտեմբերի 14-ից հետո ադրբեջանական համարից զանգ է եկել, ասել են, որ տղան իրենց մոտ է։ Զինվորի հայրն ասաց` շատ մանրամասներ հայտնել չի կարող, դրանք ԱԱԾ–ին է պատմել։
Նշենք նաև, որ ոստիկանապետ Վահե Ղազարյանը հանդիպել է ծնողների մի մասի հետ։ Հանդիպումն ավարտվել է, սակայն ծնողները հրաժարվեցին մանրամասներ հայտնել. նրանք այժմ քննարկում են իրականացնում։
Հավելենք, որ երեկ պաշտոնական լուրեր տարածվեցին, որ գերիների նոր խումբ է վերադառնում Հայաստան։ Ադրբեջանում պահվող անձանց ծնողներն ու հարազատները հավաքվեցին «Էրեբունի» օդանավակայանում, սակայն ավելի ուշ փոխվարչապետ Ավինյանի գրասենյակը հայտարարեց, որ գերիների վերադարձ չի հաջողվել կազմակերպել։
Դրանից հետո ռազմագերիների հարազատները միացան ՊՆ–ի մոտ հավաքված անհետ կորածների հարազատներին։
Շիրակի մարզը շարունակում է «շրջափակման» մեջ մնալ. գերիների հարազատները պայման են դրել
