ԵՐԵՎԱՆ, 9 ապրիլի – Sputnik. Մամուլում հրապարակված տեղեկատվությունը, թե ապրիլի 8-ին Երևան է ժամանել ադրբեջանաթուրքական պատվիրակություն, իրականությանը չի համապատասխանում։ Տեղեկությունը հայտնում է ՀՀ ՊՆ մամուլի ծառայությունը։
«ԶԼՄ-ների ներկայացուցիչներին ևս մեկ անգած հորդորում ենք զերծ մնալ չճշտված տեղեկություններ հրապարակելուց, առավել ևս` հանրության համար զգայուն խնդիրների վերաբերյալ»,–նշված է հաղորդագրության մեջ։
Հիշեցնենք` երեկ` ապրիլի 8–ին, պաշտոնական լուրեր տարածվեցին, որ գերիների նոր խումբ է վերադառնում Հայաստան։ Ադրբեջանում պահվող անձանց ծնողներն ու հարազատները հավաքվեցին «Էրեբունի» օդանավակայանում։
Ինքնաթիռը եկավ, սակայն առանց գերիների։ Կառավարությունում եղած մեր աղբյուրի տվյալներով` ինքնաթիռով Երևան էր եկել Ռուսաստանի խաղաղապահ զորախմբի հրամանատար, գեներալ-լեյտենանտ Ռուստամ Մուրադովը։
«Էրեբունի» օդանավակայանում հավաքված գերիների ծնողների մոտ խուճապ սկսվեց։ Նրանց մի մասը հայտարարեց, որ գնում են ՊՆ շենքի մոտ, մյուս կեսը պահանջեց գնալ դեպի կառավարության շենք` բողոքի ակցիաներ իրականացնելու։ Դրանից հետո համացանցում սկսեցին քննարկել, թե գերիների փոխարեն Երևան է ժամանել ադրբեջանաթուրքական պատվիրակություն։
Ինքնաթիռը եկավ առանց գերիների. Ադրբեջանից հայ ռազմագերիներ չեն վերադարձել