ԵՐԵՎԱՆ, 8 ապրիլի – Sputnik. Կառավարության «Հանրային կապերի և տեղեկատվության կենտրոն» ՊՈԱԿ-ի տնօրեն Լիլի Մինասյանն ազատվել է պաշտոնից։ Տեղեկությունը հայտնում է «Հրապարակ» թերթը` նշելով, որ այդ կազմակերպությունը հայտնի է որպես «Ֆեյքերի ՊՈԱԿ»։
«Նա նշանակվել էր ընդամենը անցյալ տարվա դեկտեմբերին, մինչ այդ ԱԺ աշխատակազմի ղեկավարի տեղակալն էր։ Այդ ժամանակ գրվեց, թե Մինասյանը փորձել է գազային ատրճանակով մուտք գործել ԱԺ տարածք, սակայն անվտանգության աշխատակիցները կանխել են, հետո բացատրել է, թե ցանկացել է ստուգել անվտանգության զգոնությունը»,– գրում է թերթը։
Մինասյանը հաստատել է աշխատանքից ազատվելու լուրը՝ նշելով, որ ապրիլի 6-ին է ազատվել, անձնական պատճառներով։ «Աշխատակազմի ղեկավար Արսեն Թորոսյա՞նն է ջանք գործադրել» հարցին ի պատասխան ասել է․ «Չգիտեմ՝ ինձ ինչքանով եք ճանաչում, բայց ոչ մեկ չի կարա ջանք գործադրի, որ ես աշխատանքից դուրս գամ»։
Լրագրողի դիտարկմանը, թե շատ կարճ է տևել «ֆեյքերի ՊՈԱԿ»-ում նրա պաշտոնավարումը, Մինասյանը հայտարարել է, թե այնտեղ ֆեյքեր չեն եղել։
«Ի դեպ, մեր տեղեկությամբ, հնարավոր է` Մինասյանի փոխարեն նշանակվի «ֆեյքային» դաշտում հայտնի Տարոն Չախոյանը, որը վերջերս նշանակվել էր կառավարության աշխատակազմի ղեկավարի տեղակալ»,- գրում է թերթը:
Նշենք, որ ըստ տեղեկությունների` Լիլի Մինասյանը մինչ պաշտոնից ազատվելը չի հանդիպել ամբողջ կոլեկտիվի հետ։ Երկու օր առաջ նա հավաքել է աշխատակիցներին միայն նրա համար, որ տեղեկացնի պաշտոնից հեռանալու մասին։ Տեղեկություններ կան նաև, որ ՊՈԱԿ-ում սպասվում են կրճատումներ, մոտ 150 աշխատակիցներից կեսին են պահելու։
Mediaport Telegram–ալիքն ավելի վաղ գրել էր, որ Մինասյանն աշխատանքից ազատվել է ՀՀ վարչապետ Նիկոլ Փաշինյանի աշխատակազմի ղեկավար Արսեն Թորոսյանի հետ ունեցած կոնֆլիկտի պատճառով. նա պարբերաբար զանգել է ՊՈԱԿ ու ֆեյքային հարձակումներ է հրահանգել իր անձնական թշնամիների դեմ: Ըստ ալիքի` Մինասյանը մի քանի անգամ մերժել է՝ պատճառաբանելով, որ իրենց ռեսուրսն անգամ Փաշինյանին ուղղված քննադատությանը պատասխանելուն չի բավարարում և լրացուցիչ աշխատանք չեն կարող անել, ինչից հետո Թորոսյանը հասել է վերջինիս պաշտոնանկությանը:
