ԵՐԵՎԱՆ, 2 ապրիլի – Sputnik. Երևանի արևմտյան օղակաձև ճանապարհի մաս կազմող Բաբաջանյան–Աշտարակ–Արգավանդ–Շիրակ ճանապարհահատվածներում շինարարական աշխատանքներն ընթանում են ամբողջ թափով։ Ծրագրի ընթացքին աշխատանքային այցի ժամանակ ծանոթացել է Երևանի քաղաքապետ Հայկ Մարությանը։ Քաղաքապետը Facebook–ի իր էջում այցից տեսանյութ է հրապարակել։
«Ճանապարհն իրար կկապի Աշտարակի և Արտաշատի խճուղիները՝ շրջանցելով քաղաքի կենտրոնը հարավից ու հարավ-արևմուտքից: Այստեղ, ինչպես գիտեք, նաև 252 մետր երկարությամբ մետաղական կոնստրուկցիայով նոր կամուրջ ենք կառուցում՝ Հրազդան գետի վրայով անցնող հինգերորդ կամուրջը»,– տեսանյութին կից գրել է Մարությանը:
Ճանապարհի ընդհանուր երկարությունը կազմելու է մոտ 15 կմ։ Բաբաջանյան–Աշտարակ ճանապարհահատվածի ընդհանուր երկարությունը 9,4 կմ է, միջին լայնությունը 24 մետր։
Տոնը` շատրվաններով. ապրիլի 7-ին կգործարկվեն Երևանի շատրվաններն ու ջրավազանները. տեսանյութ
Արդեն գրեթե պատրաստ ավտոճանապարհով երթևեկել է Հայկ Մարությանը։
«Որպես վարորդ ասեմ, որ ճանապարհը էականորեն տարբերվում է մյուսներից։ Պահանջները շատ խիստ են դրված և համապատասխան միջազգային ստանդարտներին»,–ասում է Մարությանը։
Հավելենք, որ ճանապարհահատվածն ու կամուրջը նախատեսվում է շահագործման հանձնել տարվա երկրորդ կեսին:
