ԵՐԵՎԱՆ, 26 մարտի - Sputnik. Հայրենիքի փրկության շարժման վարչապետի թեկնածու Վազգեն Մանուկյանը կտրականապես դեմ է արտահերթ ընտրություններին։ Նա այդ մասին հայտարարեց հայաստանյան վեց հեռուստաընկերություններին տված հարցազրույցում։

Մանուկյանը կարծում է, որ արտահերթ խորհրդարանական ընտրությունները չեն լուծելու իշխանափոխության հարցը։

«Կարծում եմ, որ նախ Հայաստանը պատրաստ չէ դրան, բացի այդ, ընտրությունները խորացնելու են ճգնաժամը, ոչ թե այն լուծելու են։ Մենք ուրիշ երկրների առջև խայտառակ կլինենք, որ Նիկոլ Փաշինյանը երկիրը կործանելուց հետո ընտրություններն է ղեկավարելու։ Ավելի լավ է` նա մի քիչ էլ երկար մնա, մենք ուժ հավաքենք և նրան գցենք տեղից, քան ղեկավարի ընտրությունները։ Էլ չեմ ասում, որ նա ընտրություններին ինչ–որ տոկոս կհավաքի»,–ասաց Մանուկյանը։

Նրա խոսքով` եթե Փաշինյանը նորից դառնա վարչապետ, ինչը չի բացառվում, ապա դրանից հետո ողջ աշխարհն է մեզ վրա ծիծաղելու։ Հենց այդ իսկ պատճառով էլ, ըստ Մանուկյանի, միակ ծրագիրը Հայրենիքի փրկության շարժման առաջարկածն էր` 1 տարով ժամանակավոր վարչապետ նշանակվի, որից հետո նոր միայն ընտրություն անցկացվի։ Մանուկյանը նշեց, որ եթե դուր չի գալիս, որ ժամանակավոր թեկնածուն ինքն է լինելու, ապա կարող են և թեկնածուին փոխել։

© Sputnik / Asatur Yesayants

ԸՕ–ի փոփոխություններն այս փուլում ընդունելի չեն. Արփինե Հովհաննիսյանը պարզաբանում է` ինչու

Հարցին, թե չի՞ կարծում, որ ժողովուրդը հիասթափված է ընդդիմությունից, քանի որ սպասում էր ռադիկալ քայլերի, Մանուկյանը պատասխանեց, որ ինքն էլ է հիասթափված իրենից էլ, ընդդիմությունից էլ, քանի որ կարծում է` կարելի էր շատ ավելի արդյունավետ աշխատել։

Նա նշեց, որ իրենց առաջարկած ճանապարհը սա է` փողոցային պայքարի միջոցով հասնել իշխանափոխության, ժամանակավոր վարչապետի թեկնածու նշանակվի, օրենքների փոփոխություններ լինեն, գուցե սահմանադրական փոփոխություններ լինեն և Ընտրական օրենսգիրքը փոխվի, և նոր միայն ընտրություններ անցկացնեն։

Հակառակ դեպքում, նրա խոսքով, ընտրությունները քաոս են ստեղծելու և ողջ կրիմինալ աշխարհը մասնակցելու է դրան։

Հիշեցնենք, որ նոյեմբերի 9-ի եռակողմ հայտարարության ստորագրումից հետո Հայաստանում սկսվեցին բողոքի ակցիաներ։ 17 կուսակցությունների նախաձեռնությամբ ստեղծված Հայրենիքի փրկության շարժումը պահանջում է վարչապետի հրաժարական, ապա մեկ տարի Ազգային համաձայնության կառավարություն՝ Վազգեն Մանուկյանի գլխավորությամբ, նոր միայն խորհրդարանական արտահերթ ընտրությունների անցկացում։ 

Մարտի 18-ին էլ ՀՀ վարչապետ Նիկոլ Փաշինյանը հայտարարեց, որ հունիսի 20-ին Հայաստանի Հանրապետությունում կանցկացվեն արտահերթ խորհրդարանական ընտրություններ։

ԵՐԵՎԱՆ, 13 ապրիլի – Sputnik. Դոլարի փոխարժեքը շուրջ կես տարի անընդմեջ բարձրանալուց հետո վերջին մի քանի օրվա ընթացքում Հայաստանում նվազել է շուրջ 15-20 դրամով։ Այսօր այս խնդրին ԱԺ-ի ամբիոնից անդրադարձավ «Բարգավաճ Հայաստան» խմբակցության անդամ Միքայել Մելքումյանը՝ արձանագրելով, որ նման անսպասելի անկման պատճառը եղել է այն, որ ԿԲ-ն միանգամից 56 մլն դոլարի ներարկում է արել ՀՀ ֆինանսական շուկա։

«Ես ուզում եմ հասկանալ՝ երբ դոլարի գինը 530-532 դրամից 2 օրվա մեջ հասավ 545-547 դրամի, դա օրինաչա՞փ երևույթ էր»,- ասաց Մելքումյանը, ԿԲ-ից պահանջելով հրապարակավ մեկնաբանել, թե ինչ է կատարվում ՀՀ ֆինանսական շուկայում, և ի վերջո ԿԲ-ն իր գործառույթներն իրականացրե՞լ է, թե՞ ոչ։

«2 օր դու հետևում ես, որ անընդհատ աճում է ու մի կախարդական փայտիկի հարվածով իջեցնում են։ Հիմա մենք չգիտենք, թե հաջորդիվ ինչ է լինելու, 56 մլն-ը բավարա՞ր էր, թե՞ չէ։ Թող բացատրեն։ Արտարժույթ չկա՞ երկրում»,- ասաց Մելքումյանը։

© Sputnik / Andranik Ghazaryan

Ինչո՞ւ է հայկական դրամի փոխարժեքը նվազել, ու ի՞նչ սպասել ամռանը. պարզաբանում է փորձագետը

Ընդդիմադիր պատգամավորը նաև կարծիք հայտնեց, որ դոլարի փոխարժեքի շարունակվող բարձրացումը հետևանք է արտահանման ծավալների կրճատման, ներդրումների դադարեցման, շինարարության ծավալների անկման և այլն, ԿԲ-ից ակնկալելով այս բոլոր հարցերի պատասխանները։

Հիշեցնենք՝ ապրիլի 6-ին, երբ ԱԺ-ում ՀՀ կենտրոնական բանկի նախագահի տեղակալ Ներսես Երիցյանին հարցրին, թե արդյո՞ք դոլարի փոխարժեքի բարձրացումն ու ՀՀ-ում գրանցվող գնաճը կառավարելի են, Երիցյանն ասաց․ «Իրավիճակը կառավարելի է, հակառակ դեպքում ես այսօր չէի գա, կզբաղվեինք այդ գործով»։

Երկու օր անց՝ ապրիլի 8-ին, ԿԲ-ն հայտարարեց, որ ՀՀ ֆինանսական շուկաների բնականոն գործունեության ապահովման նպատակով ՀՀ արտարժութային շուկայում գործառնություններ կիրականացնի։

Այդ գործառնությունների արդյունքում դոլարի փոխարժեքը Հայաստանում միանգամից նվազեց շուրջ 20 դրամով։

Ինչու է դոլարի փոխարժեքը տատանվում և ինչ զարգացումներ են սպասվում արժութային շուկայում