Եթե նախագահը ՍԴ չդիմի, Շուշիի անկումն իր խղճի վրա է. Վազգեն Մանուկյան
(Թարմացված է 17:59 06.03.2021)
Ընդդիմադիրներն ու նրանց աջակիցները Բաղրամյան պողոտայում ընթացող հանրահավաքից հետո երթ սկսեցին։
ԵՐԵՎԱՆ, 6 մարտի - Sputnik. Այս իշխանությունը շատ թույլ է և սարսափելի վտանգավոր երկրի համար։ Բաղրամյան պողոտայում Հայրենիքի փրկության շարժման հանրահավաքի ժամանակ նման կարծիք հայտնեց շարժման վարչապետի թեկնածու Վազգեն Մանուկյանը։
«Մեր երկրում պետք է ընտրություններ լինեն, և սա մենք ենք ասում։ Սակայն դրանք չպետք է լինեն Նիկոլ Փաշինյանի վարչապետության օրոք։ Ո՞նց կարող են ընտրություններ լինել ոստիկանական պետությունում, քանի որ մենք արդեն ոչ թե ժողովրդավարական, այլ ոստիկանական պետություն ենք. Փաշինյանը հիմա միայն ոստիկանության միջոցով է պահում պետությունը»,–ասաց Մանուկյանը։
Նրա խոսքով` 1995-ից ընտրությունների կազմակերպման դառը փորձ ունենք, սակայն այս անգամ «մաքուր ընտրություններ» պիտի կազմակերպեն։
Անդրադառնալով ՀՀ նախագահ Արմեն Սարգսյանի` ԳՇ պետի աշխատանքից ազատման դիմումը ՍԴ չուղարկելուն` Մանուկյանը նշեց, որ դա նախագահի պարտականությունն է։
«Վաղը մենք Սարգսյանին կհանդիպենք ու կհամոզենք, բայց ինչքա՞ն կարելի է։ Ո՞նց կարելի է րոպեն մեկ հանդիպել ինչ–որ պաշտոնյաների ու համոզել, որ իրենց պարտքը կատարեն։ Եթե նախագահը չկատարի իր պարտքը և ՍԴ չդիմի, Շուշիի անկումն իր խղճի վրա է»,–ասաց նա։
Նշենք, որ Բաղրամյան պողոտայում հավաքված ընդդիմադիրներն ու նրանց աջակիցները Վազգեն Մանուկյանի խոսքից հետո երթ սկսեցին։
Ինչպեսարդեն հայտնել ենք` այսօր ընթացող հանրահավաքի ժամանակ ՀՅԴ ԳՄ ներկայացուցիչ Իշխան Սաղաթելյանը հայտնեց` վաղը ՀՀ նախագահ Արմեն Սարգսյանը Հայրենիքի փրկության շարժման առաջնորդների հետ հանդիպում է խնդրել։
Ըստ իրավաբանների` նախագահը մինչև մարտի ինը կա՛մ պետք է ստորագրի Օնիկ Գասպարյանին աշխատանքից ազատելու վարչապետի առաջարկությունը, կա՛մ ՍԴ դիմի։
©
Sputnik / Asatur Yesayants
Հիշեցնենք` ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
Մարտի 2-ին հայտնի դարձավ, որ նախագահը չի ստորագրել Օնիկ Գասպարյանին ԳՇ պետի պաշտոնից ազատելու հրամանագիրը, բայց ՍԴ դիմելու է ոչ թե Նիկոլ Փաշինյանի ներկայացրած հրամանագրի նախագծի սահմանադրականության հարցը պարզելու համար, այլ «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով:
Այս տարի ցրտահարության ռիսկերը մի փոքր ավելի մեծ են. Գագիկ Սուրենյան
ԵՐԵՎԱՆ, 23 մարտի - Sputnik. Այս տարի գյուղատնտեսական կուլտուրաների ու պտղատու ծառերի համար ցրտահարության ռիսկերը մի փոքր ավելի մեծ են, բայց դա չի նշանակում, որ ցրտահարություն կլինի։ Այսօր հրավիրված ասուլիսի ժամանակ ասաց ՀՀ շրջակա միջավայրի նախարարության «Հիդրոօդերևութաբանության և մոնիտորինգի կենտրոն» ՊՈԱԿ-ի տնօրենի տեղակալ Գագիկ Սուրենյանը:
Նրա խոսքով` արդեն նկատվում է, որ ծիրանենիները սկսել են ծաղկել։ Մինչև մարտի 25–ը Արարատյան դաշտում տեղի կունենա ծիրանենիների զանգվածային ծաղկում։
«Այդ պարագայում հնարավոր է` առաջիկա օրերի ցուրտը որոշակի ազդեցություն ունենա ծիրանենիների վրա, բայց առանձնապես մեծ վնասներ չի պատճառի։ Մեր փորձը ցույց է տվել, որ -1 աստիճանը ծիրանենու վրա այդքան էլ մեծ ազդեցություն չի ունենում», – ասաց Սուրենյանը։
Սուրենյանը հիշեցրեց, որ նախորդ տարի եղանակը շատ ավելի կայուն էր, ցուրտ հոսանքների ներթափանցումն ավելի քիչ էր, քան հիմա։
«Հիդրոօդերևութաբանության և մոնիտորինգի կենտրոն» ՊՈԱԿ-ը ցրտահարման վտանգի մասին նախապես կտեղեկացնի բնակչությանը։
Ավելի վաղ հայտնել էինք, որ այսօր երեկոյան հերթական հզոր ցիկլոնը կներթափանցի Հայաստան։ Այդ ցիկլոնը մեզ մոտ կգործի մինչև մարտի 25–ը ներառյալ։ Բոլոր շրջաններում սպասվում են տեղումներ, բարձր լեռնային շրջաններում` ձյան տեսքով, նախալեռներում և հովտային գոտիներում` անձրևի տեսքով։ Առանձին հատվածներում (Արագածոտն, Կոտայք) վաղը տեղումները կլինեն բավականին ինտենսիվ, կուղեկցվեն ամպրոպներով, կլինի քամու ուժգնացում`20-25 մ/վ արագությամբ։ Չի բացառվում, որ մարտի 28–ից եղանակի պարզեցում լինի, բայց գիշերային ժամերին օդի ջերմաստիճանը կնվազի։ Ըստ կանխատեսումների` Արարատյան դաշտում օդի ջերմաստիճանը կմոտենա -1-ից -2–ի։
«Կոչ եմ անում կողմ քվեարկել». ԱԺ նախագահը` ռազմական դրությունը վերացնելու նախագծի մասին
(Թարմացված է 13:09 23.03.2021)
Վաղն առավոտյան ԱԺ պատգամավորները կքվեարկեն ռազմական դրությունը վերացնելու վերաբերյալ ընդդիմության նախագծին։ԵՐԵՎԱՆ, 23 մարտի - Sputnik. Այսօր խորհրդարանի երկու ընդդիմադիր խմբակցությունները` ԼՀԿ–ն ու ԲՀԿ–ն, երկրորդ անգամ ներկայացրին ՀՀ-ում ռազմական դրությունը հանելու վերաբերյալ նախաձեռնությունը:
©
Sputnik / Asatur Yesayants
Նախագծի զեկուցող «Լուսավոր Հայաստան» խմբակցության ղեկավար Էդմոն Մարուքյանը նշեց, որ ռազմական դրության ռեժիմը սահմանափակում է ընդդիմության իրավունքները, սահամանփակվում է երկրում ժողովրդավարությունը, քանի որ կան համայնքներ, որտեղ ՏԻՄ ընտրություններ չեն լինում:
«Կարծում եմ` ռազմական դրությունը մնացել է որպես զուտ քաղաքական երևույթ, և քանի որ կա պայմանավորվածություն արտահերթ ընտրությունների գնալու` առաջարկում ենք հանել այն»,-ասաց Մարուքյանը։
ԱԺ նախագահ Արարատ Միրզոյանը նշեց, որ բացարձակապես անհիմն են պնդումները, որ ռազմական դրության ժամկետը երկարաձգվում է քաղաքական նկատառումների պատճառով։ Ըստ նրա` դրա վառ վկայությունն է Բաղրամյան պողոտայում ընդդիմության տեղադրած վրանները։
«Արտահերթ ընտրություններից առաջ ռազմական դրությունը պետք է հանվի։ Առաջարկում եմ ընդառաջել ընդդիմադիր գործընկերներին ու կողմ քվեարկել նախագծին»,–ասաց Միրզոյանը։
Որևէ քաղաքական հիմք չկա. ինչու Հայաստանում չի վերացվում ռազմական դրությունը
Նա կոչ արեց վաղն առավոտյան, երբ նախագիծը քվեարկության կդրվի, կողմ քվեարկել։
Հիշեցնենք, որ ռազմական դրությունը վերացնելու՝ «Լուսավոր Հայաստան» խմբակցության օրենսդրական առաջարկը նախորդ անգամ մերժվել էր 2020-ի նոյեմբերի 26-ին (36 կողմ, 56 դեմ, 2 ձեռնպահ)։