ԵՐԵՎԱՆ, 25 փետրվարի - Sputnik. Դատախազությունը հերքում է մամուլում, սոցցանցերում տարածված այն տեղեկությունները, թե պատրաստվում են «մտնել ՊՆ ու ձերբակալել հայկական բանակի գեներալներին»։ Տեղեկությունը հայտնում է ՀՀ գլխավոր դատախազի խորհրդական Գոռ Աբրահամյանը` Facebook-ի իր էջում հրապարակված հայտարարության մեջ։
«Հարթակներից հնչող ու լրատվամիջոցներից տարածվող տեղեկությունները, թե իբր «Նիկոլ Փաշինյանի հրահանգով դատախազությունը սանկցիա է պատրաստում, որպեսզի շտուրմի ու զինված խմբերի միջոցով սանկցիա կիրառի, մտնի ՊՆ ու ձերբակալի հայկական բանակի գեներալներին», իրականությանը չի համապատասխանում»,– նշել է Աբրահամյանը:
Նրա խոսքով`դատախազությունը հրահանգ կատարող չէ և չկա առհասարակ նման բան:
Նշենք, սակայն, որ Sputnik Արմենիայի տվյալներով, դատախազությունում նման հարց քննարկվել է։
Ավելի վաղ ՀՅԴ ԳՄ ներկայացուցիչ, Հայրենիքի փրկության շարժման համակարգող Իշխան Սաղաթելյանը Ազատության հրապարակում հայտարարել էր, որ տեղեկություններ կան այն մասին, թե վարչապետի նոր հրամանով բարձրաստիճան զինվորականներ են ձերբակալվելու։
Հիշեցնենք` ՀՀ ԶՈւ Գլխավոր շտաբն այսօր` փետրվարի 25-ին, պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության Հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։
