ԵՐԵՎԱՆ, 9 փետրվարի – Sputnik. Քրեական գործ հարուցելու հասկացությունը հայաստանյան իրավական համակարգից կարող է վերանալ: ՀՀ Արդարադատության նախարարությունն ԱԺ-ի քննարկմանը ներկայացրած նոր «Քրեական դատավարության օրենսգրքի» նախագծով առաջարկում է քրեական գործ հարուցելու գործողությունը փոխարինել վարույթ հարուցելով: Իսկ հետաքննությունն այսուհետ կփոխարինվի միանգամից նախաքննությամբ՝ պարզեցնելով մինչդատական վարույթի հարուցումը:
«Այսինքն՝ հանցագործության մասին բավարար տեղեկությունների դեպքում քննիչը կազմում է արձանագրություն, միանգամից անցնում է նախաքննությանը և իրազեկում է դրա մասին դատախազությանը: Իսկ հետաքննությունը նախաքննության հետ զուգահեռ է իրականացվելու: Քննիչի հանձնարարությամբ հետաքննչական մարմինն իրականացնելու է գաղտնի քննչական գործողություններ և իրականացնելու է օպերատիվ հետախուզական գործունեություն»,- ԱԺ նիստում նախագիծը ներկայացնելիս` ասաց Արդարադատության նախարար Ռուստամ Բադասյանը:
Նոր օրենսգրքով փոփոխություններ են կատարվել նաև խափանման միջոցների մեջ: Նախատեսվել են նոր միջոցներ՝ տնային կալանք և վարչական հսկողություն: Իսկ այդ նոր խափանման միջոցները գործնականում կիրառելու համար, նախարարի խոսքով, էլեկտրոնային «բրասլետների» պետական գնման գործընթացն արդեն պլանավորված է:
«Տնային կալանքի որոշման պարագայում ֆիքսվելու է անձի պահվելու հասցեն և հսկողությունն իրականացվելու է կա՛մ էլեկտրոնային հսկողության օղակներով, կա՛մ պրոբացիայի ծառայության կողմից տեղում իրականացվող հսկողության տարբերակով»,- ասաց Բադասյանը:
Քրգործերի քննության արագությունը կմեծանա. Բադասյանը` նոր նախագծի մասին
Մեկ այլ նորամուծություն էլ թվային խուզարկությունն է, որը նախատեսում է էլեկտրոնային կրիչների տվյալների խուզարկություն: Ըստ Բադասյանի` այս մասով գործող օրենսդրության մեջ կան թերկարգավորումներ, իսկ նոր օրենսգիրքը հնարավորություն կտա կանոնակարգել նաև խուզարկության այս ժամանակակից ու շատ կիրառելի միջոցը:
