ԵՐԵՎԱՆ, 6 փետրվարի - Sputnik. Հայաստանում մի քանի ժամվա տարբերությամբ երկրորդ երկրաշարժն է գրանցվել։ Տեղեկությունը հայտնում է ՀՀ արտակարգ իրավիճակների նախարարության մամուլի ծառայությունը։
«Սույն թվականի փետրվարի 6-ին, տեղական ժամանակով ժամը 00:06-ին ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցը Շորժա գյուղից 5 կմ հյուսիս-արևելք, օջախի 10 կմ խորությամբ, 3.7 մագնիտուդով երկրաշարժ է գրանցել»,- նշված է հաղորդագրության մեջ:
Ըստ ԱԻՆ-ի՝ էպիկենտրոնային գոտում ստորգետնյա ցնցման ուժգնությունը կազմել է 5 բալ: Երկրաշարժը զգացվել է Գեղարքունիքի և Տավուշի մարզերում 4-5 բալ ուժգնությամբ:
Հիշեցնենք` նախորդ երկրաշարժը գրանցվել էր փետրվարի 5-ին, Երևանի ժամանակով ժամը 19:36-ին Շորժա գյուղից 5 կմ հյուսիս-արևելք, որը զգացվել էր նաև Հայաստանի այլ մարզերում ու մայրաքաղաք Երևանում։
ԱԻՆ-ի հայտնած տեղեկությունների համաձայն՝ էպիկենտրոնում ստորգետնյա ցնցման ուժգնությունը կազմել էր 6-7 բալ:
Գեղարքունիքի մարզում այն զգացվել էր 5-6 բալ ուժգնությամբ, Կոտայքի, Տավուշի, Լոռու և Արարատի մարզերի բազմաթիվ բնակավայրերում՝ 4-6 բալ, Երևան քաղաքում՝ 3-4 բալ ուժգնությամբ:
Գեղարքունիքի մարզի Արտանիշ համայնքում փլուզվել է չգործող, կիսաքանդ դպրոցի պատը։ Աղբերք և Շորժա համայնքներում փլուզվել են մեկական հին հողապատ գոմերի միջնապատեր։
