ԵՐԵՎԱՆ, 29 հունվարի – Sputnik. Փաստաբաններ Հովհաննես Խուդոյանն ու Արամ Օրբելյանը դատարանից պահանջում են չեղարկել ՀՀ վարչապետ Նիկոլ Փաշինյանի դեմ քրեական գործ հարուցելը մերժելու մասին Հատուկ քննչական ծառայության և Դատախազության որոշումները:
Փաստաբանների բողոքի քննությունը Երևանի ընդհանուր իրավասության դատարանում վարում է դատավոր Մնացական Մարտիրոսյանը:
Հատուկ քննչական ծառայությունն ու Դատախազությունը դատական նիստին չեն ներկայացել: Սակայն դատարանը որոշեց գործը քննել նրանց բացակայությամբ:
«Ներկայացված փաստերն ու գործողությունները պարունակում են քրեական հանցագործությունների հատկանիշներ, և քննիչ Կոստանդյանի որոշումը պատճառաբանված չէ»,- դատական նիստում ներկայացնելով իրենց բողոքը` ասաց Հովհաննես Խուդոյանը:
Ռոբերտ Քոչարյանի հրամանագրերն անվավեր են ճանաչվել. դատարանը բավարարել է Ջհանգիրյանի հայցը
Ըստ նրա` Նիկոլ Փաշինյանի՝ նոյեմբերի 10-ի ելույթն ուղղված է եղել ՀՀ նախկին իշխանությունների ներկայացուցիչներին։
Հիշեցնենք` փաստաբանները ՀՔԾ և Դատախազություն էին դիմել Նիկոլ Փաշինյանի՝ նոյեմբերի 10-ի ֆեյսբուքյան ուղիղ եթերում արած հայտարարությունների հիմքով: «Էդ հայրենիք ծախողները մտածում են, որ կարող են հայրենիքի բեռը մեր վրա թողնե՞ն, բացառված է։ Ես ՀՀ բոլոր արժանապատիվ քաղաքացիներին կոչ եմ անում պատրաստ լինել, որ մենք գնալու ենք դրանց հետևից, էսօրվա դեբոշերների հետևից՝ հատ-հատ, և իրենց շեֆերի հետևից։ Գնալու ենք «Դաշնակցության» կոռուպցիոն հատվածի հետևից։ Էդ հայրենիքի ծախողները, էդ ազատագրված տարածքները փողով ծախողները, որի առիթով քրգործ կա հարուցված, հանկարծ չմտածեն, թե էս ծխածածկույթի տակ հաջողելու են․ բացառված է»,- ասել էր Փաշինյանը։
Հաղորդում ներկայացրած փաստաբանները վարչապետի այդ հայտարարությունը մեկնաբանում են քրեական իրավունքի տեսանկյունից ու կարծում, որ այն պարունակում է ՀՀ ՔՕ 137-րդ հոդվածի հատկանիշներ (Սպանության, առողջությանը ծանր վնաս պատճառելու կամ գույք ոչնչացնելու սպառնալիքը):
Լսելով դիմող կողմի դիրքորոշումն ու դիմումի բովանդակությունը՝ Մնացական Մարտիրոսյանը հայտնեց, որ ՀՔԾ-ն ու Դատախազությունը ոչ միայն դատարան չեն ներկայացել, այլև գործի հետ կապված նյութերը, այդ թվում՝ մերժման որոշումն ու դրա հիմնավորումը չեն ուղարկել դատարան:
Այս հիմքով դատավորը որոշեց հետաձգել դատական քննությունը, որպեսզի կարողանա հաջորդ նիստից առաջ ստանալ ու ծանոթանալ նաև մյուս կողմի դիրքորոշմանը:
Դատական հաջորդ նիստը նշանակվեց փետրվարի 17-ին:
