ԵՐԵՎԱՆ, 25 դեկտեմբերի – Sputnik. Այս պահին քննարկումներ են գնում` պատերազմի հետևանքով սահմանամերձ համարվող համայնքների վերջնական ցանկը ճշգրտելու համար։ Պաշտոնի նշանակվելուց հետո իր առաջին ասուլիսի ժամանակ այս տեղեկությունը հայտնեց աշխատանքի և սոցիալական հարցերի նախարար Մեսրոպ Առաքելյանը։
«Մենք ունենք «Սահմանամերձ համայնքների սոցիալական աջակցության մասին օրենք», որտեղ նշվում են, թե որ համայնքների բնակիչներն են աջակցություն ստանում։ Այդ ցանկում կընդգրկվեն նոր համայնքներ։ Պատերազմի հետևանքով սահմանամերձի վերածված նոր համայնքների բնակիչները նույնպես այդ օրենքի շրջանակներում աջակցություն կստանան»,–ասաց Առաքելյանը։
Նրա խոսքով` եթե կլինի անհրաժեշտություն այդ օրենքի շրջանակներից դուրս միանվագ աջակցություն տրամադրելու, ապա նման ծրագիր էլ կիրականացնեն։
