ԵՐԵՎԱՆ, 16 նոյեմբերի – Sputnik. Ազատության հրապարակում կազմակերպված հանրահավաքի ժամանակ ՀՅԴ անդամ Գեղամ Մանուկյանը հայտնեց, որ «Հայրենիք» կուսակցության ղեկավար Արթուր Վանեցյանին նորից ԱԱԾ են կանչել։
«Արթուր Վանեցյանն այստեղ պետք է լիներ, բայց նրան ևս կանչել են ԱԱԾ»,- ասաց նա։
Առայժմ հայտնի չէ, թե Վանեցյանն ինչ գործի շրջանակում և ինչ կարգավիճակով է հրավիրվել ԱԱԾ։
Հիշեցնենք, որ ՀՀ ազգային անվտանգության ծառայությունը նոյեմբերի 14-ին ՀՀ վարչապետ Նիկոլ Փաշինյանի սպանության փորձի փաստով հարուցված քրեական գործի շրջանակներում որպես կասկածյալներ ձերբակալել էր մի շարք անձանց, այդ թվում՝ «Հայրենիք» կուսակցության ղեկավար Արթուր Վանեցյանին, ՀՀ ԱԺ նախկին պատգամավոր, ՀՀԿ խմբակցության ղեկավար Վահրամ Բաղդասարյանին, ՀՅԴ անդամ Աշոտ Ավագյանին, ինչպես նաև Սիսիանի կամավորականների ջոկատի հրամանատար Աշոտ Մինասյանին։
Բոլոր 4 կասկածյալներին մեղադրանք է առաջադրվել Քրեական օրենսգրքի 35-300-րդ հոդվածի 1-ին մասի (իշխանության յուրացման), 35-305-րդ հոդվածի (պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) և 235-րդ հոդվածի (ապօրինի զենք զինամթերք պահելու) կասկածանքով։
Վանեցյանին ազատ են արձակել, քանի որ դատարանը ոչ իրավաչափ է համարել ձերբակալության որոշումը։ Բայց Շենգավիթի ընդհանուր իրավասության դատարանում նշանակված է նրա նկատմամբ որպես խափանման միջոց կալանավորումը ընտրելու մասին նախաքննական մարմնի միջնորդությունը։
