ԵՐԵՎԱՆ, 6 նոյեմբերի - Sputnik. ՀՀ մարդու իրավունքների պաշտպան Արման Թաթոյանը հանդիպել է Հայաստանում Շվեդիայի դեսպան Պատրիկ Սվենսոնի հետ։ Պաշտպանի գրասենյակի տեղեկացմամբ՝ պաշտպանը փաստերով ներկայացրել է Հայաստանի ու Արցախի խաղաղ խաղաղ բնակիչների նկատմամբ Ադրբեջանի ԶՈւ–ի վայրագություններն ու դաժանությունները։
Թաթոյանն անդրադարձել է խաղաղ բնակիչների նկատմամբ արգելված կասետային ու քիմիական տարրեր պարունակող զինատեսակների կիրառությանը, քաղաքացիական ենթակառուցվածքների զանգվածային ավերածություններին։
«Մարդու իրավունքների պաշտպանն ընդգծել է, որ ադրբեջանական չտարբերակված հարձակումներն Արցախի ու Հայաստանի բնակչության նկատմամբ շարունակում են ուղեկցվել էթնիկ հայերի նկատմամբ մեծ ծավալի ատելության խոսքով։ Այդ ատելությունն այն աստիճանի բարձր է, որ դրսևորվում է վայրագություններով ու խոշտանգումներով, դաժան վերաբերմունքով»,- նշված է հաղորդագրության մեջ։
Պաշտպանի գրասենյակի դիտարկումներն ու ուսումնասիրությունները ցույց են տվել, որ նման տեսանյութերն ու լուսանկարները հրապարակվում են հատուկ նպատակով` ադրբեջանական սոցիալական մեդիայում արժանանալով հանրային գովեստի ու հայասպանության խրախուսանքի։
Նշվում է, որ հանդիպման մասնակիցներն ընդգծել են մարդու իրավունքների պաշտպանության ոլորտում համագործակցության կարևորությունը։
Նրանք ձեռք են բերել համագործակցության նոր պայմանավորվածություններ:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 5-ի ժամը 15։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7290 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 257 անօդաչու թռչող սարք, 16 ուղղաթիռ, 25 ինքնաթիռ, 723 զրահատեխնիկա, 6 ՏՈՍ համակարգ։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
