ԵՐԵՎԱՆ, 2 նոյեմբերի – Sputnik. Հայաստանի Հանրապետության արտաքին գործերի նախարարությունը խստորեն դատապարտում է Լիոնում ՀՀ գլխավոր հյուպատոսության շենքի նկատմամբ իրականացված վանդալիզմի ակտը։ Տեղեկությունը հայտնում է ԱԳՆ մամուլի ծառայությունը։
«ՀՀ գլխավոր հյուպատոսության շենքի վրա արված գրառումներն առավել քան խոսուն են, քանի որ պարունակում են Հայոց ցեղասպանության կրկնման սպառնալիք և Թուրքիայի ներկայիս նախագահ Ռեջեպ Թայիբ Էրդողանի փառաբանում: Պատահական չէ, որ հայ ժողովրդի հասցեին նմանօրինակ սպառնալիքներ հնչեցվում են այն ժամանակ, երբ թուրք-ադրբեջանական ցեղասպան դաշինքը միջազգային ահաբեկիչների ներգրավմամբ փորձում է բնաջնջել Արցախի հայ բնակչությունը»,-նշված է հաղորդագրության մեջ:
ՀՀ ԱԳՆ-ն համոզված է, որ ֆրանսիական իշխանությունները պատասխանատվության կկանչեն այս վանդալիզմն իրականացողներին և նրանց ետևում կանգնած ծայրահեղական ուժերին:
Ինչպես արդեն տեղեկացրել ենք, Ֆրանսիայի Լիոն քաղաքում թուրքերը պղծել են Հայաստանի Հանրապետության գլխավոր հյուպատոսության շենքը:
Ավելի վաղ թուրք ծայրահեղականները Լիոն քաղաքում պղծել էին Հայոց ցեղասպանության զոհերի հուշարձանը:
Հրապարակված լուսանկարներում հստակ երևում է հուշարձանի վրա գրված «loup gris» գրությունը, որը ֆրանսերենից թարգմանաբար նշանակում է «գորշ գայլեր»:
Նշենք, որ այսօր լուրեր տարածվեցին, որ Ֆրանսիան կարգելի «Գորշ գայլեր» թուրքական ծայրահեղ ազգայնական կազմակերպության գործունեությունը։
