ԵՐԵՎԱՆ, 19 հոկտեմբերի – Sputnik. Ադրբեջանցիների կողմից հայ զինվորին գլխատելու փաստը ներկայացվելու է Մարդու իրավունքների միջազգային դատարան։ Այսօր հրավիրված ասուլիսում տեղեկությունը հայտնեց ՄԻԵԴ-ում ՀՀ ներկայացուցիչ Եղիշե Կիրակոսյանը։
Նրա խոսքով` Հայաստանը երեկ է դիմել ՄԻԵԴ` արդեն ներկայացված փաստերը նշված փաստով լրացնելու խնդրանքով։
«Այսօր մենք կիրառված միջանկյալ միջոցի շրջանակներում թարմացում ենք նախապատրաստում ՄԻԵԴ ուղարկելու համար, և այդ փաստը ևս անպայման ներառելու ենք մեր կոմունիկացիայի մեջ»,– պատասխանելով Sputnik Արմենիայի հարցին` ասաց Եղիշե Կիրակոսյանը։
ՄԻԵԴ–ում ՀՀ ներկայացուցիչը նաև հայտնեց, որ Եվրոպական դատարան են ներկայացվել հայաստանցի զինծառայողների, ռազմագերիների, գերիների, ինչպես նաև դիակների նկատմամբ խոշտանգման, անմարդկային վերաբերմունքի, գլխատումների այլ փաստեր ևս։
«Մենք այս անհանգստացնող դրվագները տեսնելով` որոշում կայացրինք, որ պետք է դիմենք դատարան ու խնդրենք, որպեսզի ընդլայնի կիրառած միջոցի շրջանակները քաղաքացիականից դուրս և տարածի նաև պաշտպանության տակ մտնող այլ անձանց նկատմամբ»,– ասաց Կիրակոսյանը` հավելելով, որ դրանք Եվրոպական կոնվենցիաների ուղղակի խախտումներ են` պատերազմական հանցագործություններ։
Արդեն վտանգավոր է ողջ տարածաշրջանի համար. Թաթոյանը` համաճարակների բռնկման մասին
Հիշեցնենք` հոկտեմբերի 18-ին կեսգիշերին մոտ ՀՀ Մարդու իրավունքների պաշտպանը փաստեր ներկայացրեց ադրբեջանցիների կողմից հայ զինծառայողին գլխատելու մասին։
Հոկտեմբերի 16-ին, ժամը 13-ի սահմաններում մի ադրբեջանցի զանգահարել է հայ զինծառայողի հարազատ եղբորը և տեղեկացրել, որ նրա եղբայրը գտնվում է իրենց մոտ, իրենք կտրել են եղբոր գլուխը, իսկ լուսանկարը տեղադրելու են համացանցում:
Զանգից մի քանի ժամ անց սպանված զինծառայողի լուսանկարը եղբայրը հայտնաբերել էր նրա սոցիալական ցանցի էջում, որտեղ այն տեղադրել էին հենց ադրբեջանցիները տղային սպանելուց հետո:
Ըստ ՄԻՊ–ի` Ադրբեջանի զինվորականների հետ սպանվածի եղբայրն ունեցել է իրար հաջորդող երկու հեռախոսային խոսակցություն, որոնց ընթացքում ադրբեջանական մի քանի զինվորական խմբով ծաղրել են, նվաստացնել սպանված զինծառայողի եղբորը, նրա հետ խոսել ատելության խոսքով:
Ընդ որում` զանգերը կատարվել են հենց սպանված զինծառայողի հեռախոսահամարից:
Հադրութում ադրբեջանցիները սպանել են 2 բնակչի` մորն ու հաշմանդամություն ունեցող որդուն
