ԵՐԵՎԱՆ, 24 սեպտեմբերի – Sputnik. «Բարգավաճ Հայաստան» կուսակցության նախագահ Գագիկ Ծառուկյանի փաստաբանական թիմն այսօր հայտարարություն է տարածել` բացատրելով, թե ինչու իրենք ու իրենց պաշտպանյալը երեկ կայացած դատական նիստին չէին ներկայացել։
«Գագիկ Ծառուկյանն ու նրա պաշտպանները պատշաճ կարգով ծանուցված չեն եղել դատական նիստի տեղի և ժամանակի մասին, ուստի հարգելի պատճառով չեն ներկայացել դատարան»,– ասված է հայտարարության մեջ։
Բանն այն է, որ Երևանի Կենտրոն համայնքի ընդհանուր իրավասության դատարանում սեպտեմբերի 23-ին նշանակված դատական նիստը` Գագիկ Ծառուկյանին կալանավորելու վերաբերյալ քննիչի միջնորդության քննության հարցով, հետաձգվել էր հենց դատական նիստին Ծառուկյանի ու նրա պաշտպանների չներկայանալու պատճառով։ՀՀ բարձրագույն դատական խորհուրդը երեկ հաղորդագրություն էր տարածել` հայտնելով, որ պատասխանող կողմը ծանուցված եղել է նիստի տեղի և ժամանակի վերաբերյալ։ Այս հայտարարությանը Ծառուկյանի փաստաբանական թիմն այսպես է արձագանքել. «Պետք է ընդգծել, որ ԲԴԽ-ն նշված հաղորդագրությամբ իրավացիորեն խուսափել է այդ ենթադրյալ ծանուցումները որպես պատշաճ գնահատելուց»։
Ծառուկյանի փաստաբանները նաև հիշեցնում են, որ ազատության մեջ գտնվող մեղադրյալի կամ պաշտպանի չներկայանալն օրենքով չի խոչընդոտում միջնորդության քննությանը:
«Քանի որ Գագիկ Ծառուկյանը գտնվում է ազատության մեջ, ուստի վերը նշվածն ուղիղ նշանակում է, որ եթե նա և պաշտպանները պատշաճ կարգով ծանուցված լինեին դատական նիստի տեղի ևւ ժամանակի մասին, ապա դա խոչընդոտ չէր առանց վերջիններիս դատական նիստը շարունակելու համար»,– ասված է հայտարարության մեջ։
«Գագիկ Ծառուկյանը գրել գիտի՞». Փաշինյան-ԲՀԿ հակամարտությունը նոր թափ է առնում. տեսանյութ
Փաստաբանները ենթադրում են` սա խոսում է այն մասին, որ նախաքննական մարմինն այս կերպ փորձում է կալանավորման միջնորդության քննությունն իրականացնել իր նախընտրած դատավորի կողմից։
Գագիկ Ծառուկյանի որդին հարցաքննվել է «Պարտեզի» սպանության գործով
Ծառուկյանի փաստաբանները նաև հայտնում են, որ լրատվամիջոցներից են տեղեկացել հաջորդ դատական նիստի օրվա ու տեղի մասին, ուստի հայտարարում են, որ ներկայանալու են դատարան։
Նշենք, որ Երևանի ընդհանուր իրավասության դատարանի դատավոր Մնացական Մարտիրոսյանը հաջորդ դատական նիստը նշանակել է սեպտեմբերի 25-ին` ժամը 10:00-ին:
Հիշեցնենք` հունիսի 14-ին ԱԱԾ-ն խուզարկություն էր իրականացրել Գագիկ Ծառուկյանի առանձնատանը: Ավելի ուշ հայտնի դարձավ, որ նրա դեմ 3 քրեական գործ է հարուցվել ապօրինի ձեռնարկատիրական գործունեության, ընտրակաշառք բաժանելու և հողատարածքների օտարման փաստերով։
Գագիկ Ծառուկյանը տուժող է ճանաչվել բռնաբարությանը վերաբերող քրեական գործով
