ԵՐԵՎԱՆ, 23 սեպտեմբերի – Sputnik. Բարձրագույն դատական խորհուրդը տեղեկացնում է, որ Երևանի ընդհանուր իրավասության առաջին ատյանի դատարանի կենտրոնի նստավայրում այսօր ժամը 11։00-ին սկսված` Գագիկ Ծառուկյանին կալանավորելու վերաբերյալ ԱԱԾ քննիչի միջնորդության քննությունը հետաձգվել է:
«Նիստի հետաձգման պատճառը մեղադրյալ Ծառուկյանի և նրա պաշտպանների չներկայանալն է, չնայած սեպտեմբերի 17-ին և 18-ին դատարանը ծանուցումներ է ուղարկել նրանց։ Բացի այդ, էլփոստով ծանուցում են ուղարկել Ծառուկյանի ԱԺ պատգամավորի պաշտոնական էլեկտրոնային հասցեին, հեռախոսային կապի միջոցող հավելյալ տեղեկացրել են նիստի օրվա, ժամի մասին, վայբեր ծրագրի միջոցով փոխանցել տեղեկատվությունը, որով ուղարկված տեղեկատվության ստանալը ծրագիրը հաստատել է»,–նշված է հաղորդագրության մեջ։
Սեպտեմբերի 22-ին դատարանի աշխատակազմը փաստաբանի հետ հեռախոսազրուցի ընթացքում հիշեցրել է այսօրվա նիստի մասին:
Այսօր՝ 11:00-ին մեկնարկած նիստի ընթացքում, դատարան ներկայացած դատավարության մասնակիցները միջնորդել են դատարանին քննությունն իրականացնել մեղադրյալի և պաշտպանների բացակայությամբ։ Սակայն դատարանը, հաշվի առնելով հարցի կարևորությունը, որոշում է կայացրել միջնորդության քննությունը հետաձգել մինչև սեպտեմբերի 25-ը ևս մեկ անգամ պաշտպանության կողմին ծանուցելու համար:
Ըստ այդմ, նիստը վարող դատավոր Մնացական Մարտիրոսյանը հաջորդ դատական նիստը նշանակել է սեպտեմբերի 25-ին, ժամը 10:00-ին:
Գագիկ Ծառուկյանը տուժող է ճանաչվել բռնաբարությանը վերաբերող քրեական գործով
Հիշեցնենք, որ հունիսի 14-ին ԱԱԾ-ն խուզարկություն էր իրականացրել Գագիկ Ծառուկյանի առանձնատանը: Ավելի ուշ հայտնի դարձավ, որ նրա դեմ 3 քրեական գործ է հարուցվել ապօրինի ձեռնարկատիրական գործունեության, ընտրակաշառք բաժանելու և հողատարածքների օտարման փաստերով։
Հունիսի 30-ին պարզվեց, որ Ծառուկյանը կորոնավիրուսով է վարակվել։ Վերջին դատական նիստերին նա չէր գալիս։
ԲՀԿ–ի ընտրակաշառքի գործով մի քանի տասնյակ մեղադրյալներ կան. ԱԱԾ տնօրեն
