ԵՐԵՎԱՆ, 21 սեպտեմբերի – Sputnik. Հայաստանի ազգային անվտանգության ծառայությունում կան անձինք, որոնք պետք է լքեն ծառայության շարքերը։ Եռաբլուրում լրագրողների հետ զրույցում ասաց ԱԱԾ տնօրեն Արգիշտի Քյարամյանը` պատասխանելով հարցին, թե շատերն ԱԱԾ-ից լյուստրացիա են պահանջում, հնարավո՞ր է նման քայլերի գնան։
«ԱԱԾ-ում կան բազմաթիվ պատվախնդիր սպաներ, որոնք իրենց աշխատանքը կատարում են ի բարօրություն Հայաստանի։ Սակայն, բնականաբար, ինչպես բոլոր մնացած կառույցներում, այդ թվում ԱԱԾ-ում, կան անձինք, որոնք էլ բնականոն պրոցեսի ընթացքում պետք է լքեն ծառայության շարքերը», -ասաց Քյարամյանը։
Նրա խոսքով` աշխատանքից ազատումների գործընթացն արդեն իսկ սկսել է։ Քյարմայանը նշեց` մարդիկ գալիս–գնում են, և այդտեղ որևէ արտառոց իրադարձություն փնտրել պետք չէ։
Մեկ այլ հարցի, թե ինչպե՞ս կգնահատի իր աշխատանքն ԱԱԾ–ում, քանի որ միակ տնօրենն է, որը «դրսից» է, ոչ թե կառույցի ներսից` Քյարամյանն ասաց` ինքը չէ, որ պետք է գնահատի իր իսկ աշխատանքը։
Հիշեցնենք` հունիսի 8–ին, Նիկոլ Փաշինյանի նախաձեռնությամբ Հայաստանում մի շարք աղմկահարույց պաշտոնանկություններ եղան։ Պաշտոններից ազատվեցին Ազգային անվտանգության ծառայության տնօրեն Էդուարդ Մարտիրոսյանը, ԶՈւ գլխավոր շտաբի պետ Արտակ Դավթյանն ու ՀՀ ոստիկանապետ Արման Սարգսյանը։
Նույն օրը ԱԱԾ տնօրենի պաշտոնում նշանակվեց ԱԱԾ տնօրենի տեղակալ Արգիշտի Քյարամյանը։ Նա ԱԱԾ համակարգ էր ոտք դրել տնօրենի պաշտոնում նշանակվելուց մոտ մեկ ամիս առաջ` որպես ԱԱԾ փոխտնօրեն։ Դրանից առաջ նա 1 օրով նշանակվել էր ՀՀ Քննչական կոմիտեի նախագահի տեղակալ։ Ավելի վաղ` 2019 թվականի մարտի 1-ից նա աշխատել է որպես ՀՀ պետական վերահսկողական ծառայության ղեկավարի օգնական, ապա ղեկավարի տեղակալ, հետո նաև պետի ժամանակավոր պաշտոնակատար։
