ԵՐԵՎԱՆ, 9 սեպտեմբերի — Sputnik․ Ռուս հայտնի շախմատիստուհի, գրոսմայստեր Ալիսա Գալյամովան դիտարկմամբ՝ ՖԻԴԵ-ն շախմատի առցանց օլիմպիադայի ընթացքում երկակի ստանդարներ է կիրառել։ Շախմատիստուհին նման կարծիք է հայտնել «Спорт Бизнес онлайн» պարբերականին տված հարցազրույցում։
Գալյամովան նշել է, որ օլիմպիադայի այն պարտիաները, որոնց ընթացքում կապն ընդհատվել է, պետք է վերախաղարկվեին։ Մասնավորապես, եզրափակիչի երկու պարտիաները, որոնցում հանդիպել են Ռուսաստանի և Հնդկաստանի հավաքականները։
«Պետք էր ուղղակի վերախաղարկել այդ երկու պարտիաները, դա դժվար չէր լինի անել։ Չէ՞ որ Ռուսաստանը 2,5։1,5 հաշվով առջևում էր։ «Ոսկին» Հնդկաստանի հետ կիսելու որևէ հիմք չկար։ Շատ ոչ սպորտային ստացվեց։ Երկակի ստանդարտներն ամենավատ բանն են։ Կապի ընդհատման հետ նմանատիպ իրավիճակ է եղել նաև հայերի մոտ, բայց նույն Հնդկաստանի հետ խաղում նրանց պարտություն գրանցեցին։ Իսկ հնդիկներին, ստացվում է՝ հաղթանակ շնորհեցին»,- ասել է գրոսմայստերը։
Մրցաշարի եզրափակիչում հաղթեց Ռուսաստանի հավաքականը։ Առաջին ռաունդն ավարտվեց ոչ ոքի՝ 3։3 հաշվով։ Երկրորդ ռաունդում 4,5։1,5 հաշվով հաղթեց Ռուսաստանի թիմը, բայց Հնդկաստանը բողոքարկեց վերջին երկու խաղերի արդյունքները, քանի որ կապը chess.com կայքի սերվերի հետ ընդհատվել էր։ Այդ պարտիաներում ևս հաղթանակ էին տարել ռուս շախմատիստները։
Երկակի ստանդարտներ ՀՀ հավաքականի դեմ. Սերժ Սարգսյանը նամակ է գրել ՖԻԴԵ–ի նախագահին
ՖԻԴԵ-ն որոշեց երկու թիմերին էլ հաղթանակ շնորհել, իսկ բողոքարկման բավարարման դեպքում հարկ կլիներ շարունակել պարտիաները կապի ընդհատման պահից:
Շախմատի համաշխարհային օլիմպիադայի քառորդ եզրափակիչում Հայաստանի հավաքականի մրցակիցը Հնդկաստանն էր: Առաջին իսկ փուլում Հայաստանի թիմը պարտություն կրեց, սակայն մեր պատվիրակությունը բողոքարկեց Հայկ Մարտիրոսյանի պարտիան։ Օնլայն ծրագրի հետ կապված խնդիր է առաջացել, ինչի պատճառով Մարտիրոսյանը չի կարողացել քայլ անել։ ՖԻԴԵ-ն չընդունեց հայկական կողմի բողոքը։
ՖԻԴԵ–ի նման պահվածքից հետո հայ շախմատիստները հրաժարվեցին շարունակել մասնակցել օլիմպիադային։ Առաջատար հայ գրոսմայստերներ Լևոն Արոնյանը, Էլինա Դանիելյանը քննադատեցին շախմատի միջազգային ֆեդերացիային, որը, անտեսելով հայկական կողմի բողոքը, առաջին օնլայն Օլիմպիադայի հաղթող ճանաչեց Ռուսաստանի և Հնդկաստանի թիմերին: Կազմակերպության ղեկավարությանն ուղղված նամակով հանդես եկավ Հայաստանի Շախմատի ֆեդերացիայի նախագահ Սերժ Սարգսյանը։
