ԵՐԵՎԱՆ, 23 օգոստոսի — Sputnik. Ռուսաստանում ՀՀ դեսպանությունը Facebook–ի իր էջում տեղեկացնում է, որ առաջիկա օրերին Մոսկվայից Երևան մի շարք չվերթեր են նախատեսված։
«Մասնավորապես, Մոսկա–Երևան ուղղությամբ 4 չվերթ կիրականացվի` օգոստոսի 28–ին, 29-ին, 30-ին և 31-ին։ Բոլոր չվերթերը կիրականացվեն «Դոմոդեդովո» օդանավակայանից` «Nord Star» ընկերության կողմից»,–նշված է դեսպանատան տարածած հաղորդագրության մեջ։
Օգոստոսի 28-ի թռիչքը կիրականացվի ժամը 09:00-ին, իսկ օգոստոսի 29-ի թռիչքը` ժամը 12:30-ին։ Հաջորդ երկու օրերին թռիչքները նախատեսված են ժամը 11-ին։
Տոմսերն ազատ վաճառքի սկզբունքով կարելի է ձեռք բերել «Դոմոդեդովո» օդանավակայանի N 85 և N 94 տոմսարկղերից: Տոմսարկղերի աշխատանքային ժամերն են 10։00-21։00-ն։ Ինչ վերաբերում է տոմսերի արժեքին, ապա դրանք կարելի է ձեռք բերել 14 700 ռուբլով։ Չվերթի հետ կապված բոլոր հարցերով պետք է դիմել նշված ավիաընկերությանը։
Հայաստանը հատուկ չվերթով դեղորայք, բժշկական սարքավորումներ, սնունդ կհասցնի Լիբանան
Դեսպանատունը քաղաքացիներին հորդորում է ստուգել իրենց անձը հաստատող փաստաթղթերը. ժամկետանց կամ օգտագործման համար ոչ պիտանի փաստաթղթերի առկայության պարագայում խնդրում են հնարավորինս սեղմ ժամկետներում դիմել ՌԴ-ում ՀՀ դեսպանության հյուպատոսական բաժին։
Հիշեցնենք, որ ՀՀ կառավարության օգոստոսի 12-ի արտահերթ նիստում կայացված որոշման համաձայն՝ ՀՀ քաղաքացի չհանդիսացող անձինք կարող են օդային ճանապարհով մուտք գործել Հայաստան։ Օտարերկրյա քաղաքացիների համար վերացվել է ՀՀ սահմանային անցման կետերում մուտքի վիզա ստանալու հնարավորությունը: Օտարերկրյա քաղաքացիները ՀՀ մուտքի արտոնագիր կարող են ստանալ միայն արտերկրում ՀՀ դիվանագիտական ծառայության մարմիններում (դեսպանություն, հյուպատոսություն, հյուպատոսական կետ) կամ e-visa էլեկտրոնային համակարգով։
Երևան–Մոսկվա նոր չվերթ կկայանա. ովքե՞ր կարող են մեկնել Ռուսաստան
Հայաստան մուտք գործող անձը (եթե ախտանշաններ առկա չեն, և նա չի հոսպիտալացվել) կարող է իր ընտրությամբ կա՛մ ինքնամեկուսանալ 14-օրյա ժամկետով, կա՛մ էլ անցնել ՊՇՌ հետազոտություն և թեստի բացասական պատասխան ստանալու դեպքում դուրս գալ ինքնամեկուսացումից։
