ԵՐԵՎԱՆ, 28 հուլիսի – Sputnik. Արմավիրի մարզի Եղեգնուտ համայնքի մի շարք բնակիչների կողմից ինքնիրավչություն կատարելու դեպքի առթիվ քրեական գործ է հարուցվել։ Տեղեկությունը հայտնում է ՀՀ քննչական կոմիտեն։
Հարցն այն է, որ 2018–ի իշխանափոխությունից հետո Եղեգնուտ համայնքը 27 տարի պաշտոնավարած Ռազմիկ Մարգարյանը գյուղի բնակիչների ճնշման ազդեցության տակ լիազորությունները վաղաժամկետ դադարեցնելու դիմում էր ներկայացրել Եղեգնուտի ավագանուն:
Արմավիրի նախկին մարզպետի՝ Գագիկ Միրիջանյանի օգոստոսի 24-ի որոշմամբ` Եղեգնուտ համայնքի ղեկավարի պաշտոնակատար էր նշանակվել նույն գյուղի բնակիչ Ռազմիկ Մկրտչյանը։ Սակայն համայնքի նախկին ղեկավարը մտափոխվել է և մարզպետի որոշումը բողոքարկել ՀՀ վարչական դատարան, որն էլ բավարարել է բողոքը` անվավեր ճանաչելով մարզպետի որոշումը (այսինքն` դատարանի որոշմամբ ԺՊ–ն պետք է հեռանա, և նախկին ղեկավարը շարունակի պաշտոնավարել)։ Դրանից հետո Արմավիրի ներկայիս մարզպետի` Համբարձում Մաթևոսյանի` այս տարվա հունիսի 22-ի որոշմամբ ևս անվավեր է ճանաչվել Արմավիրի նախկին մարզպետի`Ռազմիկ Մկրտչյանին համայնքի ղեկավարի ԺՊ նշանակելու որոշումը։ Մաթևոսյանի որոշմամբ` ստեղծվել է աշխատանքային խումբ Եղեգնուտում ընդունման-հանձնման աշխատանքները կազմակերպելու նպատակով:
«Աշխատանքային խումբը հուլիսի 8-ից 15-ն այցելել է Եղեգնուտ, սակայն համայնքի բնակիչները, համաձայն չլինելով դատարանի, ինչպես նաև Արմավիրի մարզպետի որոշումների հետ, արգելափակել են համայնքապետարանի վարչական շենքի մուտքը և դռան վրա փակցրել «Փակ է» գրառմամբ թուղթ: Արդյունքում աշխատանքային խումբը չի կարողացել իրագործել ընդունման-հանձնման աշխատանքները»,–նշված է ՔԿ հաղորդագրության մեջ։
Դեպքի առթիվ հարուցվել է քրեական գործ՝ ՀՀ քրեական օրենսգրքի 322-րդ հոդվածի (ինքնիրավչությունը) 1-ին մասի հատկանիշներով։
Հիշեցնենք, որ Sputnik Արմենիան անդրադարձել էր մեծ աղմուկ հանած այս դեպքին։ Գյուղացիներն օրեր շարունակ բողոքի ակցիա էին անում համայնքի նախկին ղեկավարի կրկին պաշտոնավարման դեմ։ Համայնքի ղեկավարի ժամանակավոր պաշտոնակատար Ռազմիկ Մկրտչյանը Sputnik Արմենիայի հետ զրույցում հայտնել էր` նախկին ղեկավարի մուտքը համայնք բացառվում է, քանի որ համագյուղացիներից որևէ մեկը չի ուզում նրան ընդունել։ Մկրտչյանն ասել էր նաև, որ ինքը կառչած չէ պաշտոնից և կարող են այլ` երրորդ անձի նշանակել համայնքի ղեկավար, միայն թե գյուղում իրավիճակը հանդարտվի, և փողոցում կանգնելու, բողոքի ակցիա անելու փոխարեն մարդիկ գնան իրենց հողի գործին։
