ԵՐԵՎԱՆ, 24 հուլիսի – Sputnik. Գեղարքունիքի մարզպետ նշանակվելուց հետո Գնել Սանոսյանը երկու անգամ այցելել է Դուբայ: Այսօր Սևանի ափին կազմակերպված մամուլի ասուլիսում լրագրողները հետաքրքրվեցին՝ ինչ նպատակով ու ինչ միջոցներով:
«Առաջին անգամ այցելել եմ ամբողջությամբ իմ անձնական միջոցների հաշվին, երկրորդը՝ պարոն Հակոբ Արշակյանի (բարձր տեխնոլոգիական արդյունաբերության նախարար,–խմբ.) հետ: Ունեցել ենք պաշտոնական հրավեր և պետական պատվիրակության կազմում` պետական միջոցների հաշվին, մեկնել ենք այնտեղ»,- ասաց Սանոսանը:
Մարզպետը նշեց, որ հրավիրող կողմը հետաքրքրված է եղել մասնավորապես այլընտրանքային էներգետիկայի ոլորտով ու այդ նպատակով նաև պատասխան այցով եղել են Հայաստանում:
«Մարզում բազմաթիվ տեղամասեր իրենց ցուցադրել ենք՝ որպես արևային էներգիայի պոտենցիալ վայրեր: Բայց ունենք հետևյալ խնդիրը՝ իրենք բավական մեծ արևային էլեկտրակայան են ուզում կառուցել ու դրա համար 50 հա-ից ավելի մեծ հողամաս են ցանկանում վերցնել»,- ասաց Սանոսյանը:
Հողի խնդրից զատ, մարզի էներգետիկ ենթակառուցվածքները ևս, մարզպետի խոսքով, արդեն սպառել են իրենց պոտենցիալն ու ի վիճակի չեն ավելի մեծ ծավալի արտադրված էլեկտրաէներգիա վերցնելու:
21 մահ. Գեղարքունիքի մարզպետը ներկայացրեց մարզում կորոնավիրուսի հետ կապված իրավիճակը
«Մեր մարզի էներգետիկ պոտենցիալը շատ մեծ է, և մենք այն թերի ենք իրացնում հենց ենթակառուցվածքների բացակայության հետևանքով»,- ասաց նա:
Մարզպետը հույս հայտնեց, որ առաջիկայում նախարարությունը հնարավորություն կունենա հզորացնել էլեկտրական ենթակայաններն ու մարզի էներգետիկ կարողությունները ևս կհզորանան՝ հնարավորություն ստեղծելով նոր ներդրումային ծրագրերի իրականացման համար:
Սևանի արևելյան ափի ավտոճանապարհը վերջին անգամ կապիտալ վերանորոգվել էր 1974 թ-ին. մարզպետ