ԵՐԵՎԱՆ, 16 հուլիսի – Sputnik. ՀՀ կառավարության այսօրվա նիստում ՀՀ վարչապետ Նիկոլ Փաշինյանի առաջարկով գործադրի անդամները մեկ րոպե լռությամբ հարգեցին վերջին օրերին Հայաստանի սահմանների նկատմամբ Ադրբեջանի ռազմական գործողությունների հետևանքով զոհված հայ զինվորականների հիշատակը:
«Վերջին օրերին հայ-ադրբեջանական սահմանին լարվածության հետևանքով զոհվել են ՀՀ ԶՈւ մայոր Գարուշ Համբարձումյանը, ԶՈւ կապիտան Սոս Էլբակյանը, ԶՈւ կրտեր սերժանտներ Սմբատ Գաբրիելյանը և Գրիշա Մաթևոսյանը: Ես առաջարկում եմ մեկ րոպե լռությամբ հարգել մեր զոհերի հիշատակը»,– ասաց Փաշինյանը:
Հիշեցնենք՝ բոլոր 4 զինվորականները զոհվել են հուլիսի 14-ին հակառակորդի իրականացրած հրետակոծության հետևանքով:
Հուլիսի 15-ին ՀՀ վարչապետի առաջարկով ՀՀ նախագահ Արմեն Սարգսյանը հետմահու մեդալներ էր շնորհել զոհվածներին:
Հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 15-ի պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ, 10 վիրավոր։
Այսօր առավոտյան ՊՆ–ն հայտնել էր, որ գիշերը՝ ժամը 03:40-ի սահմանում, ՀՀ ԶՈւ դիրքապահները հակառակորդի շարժ են նկատել։ Անցնելով շրջանաձև պաշտպանության՝ հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Պաշտպանության նախարար Դավիթ Տոնոյանը կապ է հաստատել ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշչիկի հետ։ Նա ներկայացրել է ժամը 03:40-ից ՀՀ պետական սահմանին ստեղծված իրավիճակը, նշել, որ ադրբեջանական կողմն ունի բազմաթիվ վիրավորներ և զոհեր։
