ԵՐԵՎԱՆ, 23 հունիսի - Sputnik. Մի խումբ դերասաններ և հաղորդավարներ միացել են «Կրիր, որ կրենք» խորագրով առցանց ակցիային և «ասել», թե ինչ են մտածում դիմակների մասին։
Օրինակ` հաղորդավարուհի Դիանա Մալենկոն նկարում ասում է․ «Դժվարությամբ եմ համադրում դիմակը հագուստի հետ, բայց չեմ դժգոհում»։ Դիզայներ Գայկա Մանուկյանն էլ համաձայն է․ «Դիմակը դարձել է պարտադիր աքսեսուար, որը դժվար է համադրել լուքերի հետ, բայց չեմ դժգոհում»։ Դերասան Վաչե Թովմասյանը նշում է․ «Թեթև հումոր ես անում ու չես հասկանում՝ մարդը ժպտում է, թե ջղայնանում, բայց չեմ դժգոհում»։ Մի խոսքով, բոլորի մեջբերումներն ավարտվում են «բայց չեմ դժգոհում» արտահայտությամբ՝ ակնարկելով հասարակության շրջանում դիմակների պարտադիր պահանջի հանդեպ դժգոհություններն ու բողոքները։
Նրանց լուսանկարները հրապարակել է վարչապետ Նիկոլ Փաշինյանը՝ իր հետևորդներին առաջարկելով տարածել իրենց նախընտրած տարբերակը։
Օգտատերերից շատերն անսացել են վարչապետի հորդորին և միացել դիմակներ դնելու և չդժգոհելու կոչին։ Մի մասին էլ, սակայն, զայրացրել է նման ֆլեշմոբը։ «Կարելի էր ավելի ստեղծարար մոտենալ, անտաղանդ գովազդ է», «Հասկացանք, ժողովուրդը դիմակ կրում է վաղուց, դուք ձեր գործը արեք», «Եթե արդեն սահմանված է պետական տուգանք, ինչի՞ համար են նման ակցիաները, ստիպեք՝ ոստիկանները լավ աշխատեն, ոչ թե փող ծախսեք նման բաների վրա», – գրել են մեկնաբանություններում։
Նշենք, որ Հայաստանում դիմակ դնելը պարտադիր է մայիսի 25-ից, առանց դիմակի քաղաքացիները տուգանվում են 10 հազար դրամով։
Հիշեցնենք, որ մարտի 16-ից Հայաստանում արտակարգ իրավիճակ է հայտարարվել, որն արդեն 3 անգամ երկարացվել է։ Եթե նորից չերկարաձգվի, արտակարգ դրության ռեժիմը կավարտվի հուլիսի 13-ին։ Հունիսի 23-ի դրությամբ Հայաստանում կորոնավիրուսի հաստատված 21006 դեպք կա։ Մահվան ելքով դեպքերը 372–ն են։
Դիմակ բաժանող նախարարների օրինակը վարակիչ է դարձել․ հայտնի է՝ ում միտքն էր ակցիան
