ԵՐԵՎԱՆ, 20 հունիսի – Sputnik. ՀՀ վարչապետ Նիկոլ Փաշինյանը շրջեց Երևանի Էրեբունի թաղամասի բակերում և դիմակներ բաժանեց։ Նա հորդորում էր դիմակ դնել ու, ամենակարևորը, դիմակը ճիշտ դնել` այնպես, որ այն փակի քիթն ու բերանը, այլ ոչ թե միայն բերանը։
Փաշինյանը մոտենալով մի աղջնակի` նրանից հետաքրքրվեց.
–Հայրիկը, մայրիկը կրո՞ւմ են դիմակ։
–Այո,–պատասխանեց երեխան։
–Ճիշտն ասա,– ճշտեց Փաշինյանը։
Սակայն երեխայի պատասխանը չփոխվեց` այո, ծնողները դնում են դիմակ։
Իսկ տարեց մի տղամարդ, տեսնելով Փաշինյանին, անկեղծորեն բարևեց. «Հը, բարի օր, ո՞նց ես»։
Մեկ օրում 1800 քաղաքացի տուգանվել է դիմակ չկրելու համար. Փաշինյան
Շրջելով փողոցներով` Փաշինյանը տեսավ մի տղամարդու, որը դիմակ չուներ, կողքից հուշեցին` կարծես թե չունի դիմակ։
«Անունը Վռամ է»,–ասացին հարևանները։
Տղամարդը չնայած խուսափում էր տեսախցիկների առջև երևալ և արագ փորձեց հեռանալ, սակայն Փաշինյանը հասավ նրան ու մի կապոց դիմակ նվիրեց։
Էրեբունու բնակիչներից մեկն էլ, վերցնելով դիմակն ու շնորհակալություն հայտնելով, հավելեց, թե` միայն դիմակ բաժանելով չի։ Տղամարդն ասաց, որ մարդիկ ամիսներով տանն են ու ապրել չի լինում։
Մեկ ուրիշ քաղաքացի էլ Փաշինյանին ասաց, որ շատ է նիհարել, թող էլ չնիհարի։ Փաշինյանը, սակայն, արձագանքեց.
«Նիհար լավ չի՞. փոխանակ դու էլ նիհարես, ինձ ես ասում` մի նիհարի»։
Մի կին էլ Փաշինյանին ինչ–որ բան պատմելիս երդվեց «երեխաների արև» ասելով, որ ուզածը շատ բան չի` մարդիկ լավ ապրեն։
Մինչ Փաշինյանը դիմակներ էր բաժանում` շրջելով փողոցներով, երեխաներն ու մեծահասակները նրա հետ նկարվել էին ուզում։
Հայաստանում նորաձև են դառնում կտորե դիմակները. նախարարը կոչ է անում մոդայի հետևից չընկնել
Փաշինյանը հորդորում էր սոցիալական հեռավորությունը պահպանել նկարվելիս, ավելին, միայն դիմակ ունենալու դեպքում էր նրանց հետ սելֆի անում։ Իսկ երբ տարեցներն ուզում, բայց չէին կարողանում սելֆի անել, Փաշինյանը հեռախոսը վերցնում ու ինքն էր նրանց հետ սելֆի անում։
Հիշեցնենք, որ սա առաջին դեպքը չէ, որ Փաշինյանը դիմակներ է բաժանում թաղամասերում շրջելով։ Մինչ այս նա շրջել էր Կենտրոն վարչական շրջանում ու դիմակ բաժանել։
Դիմակի պատճառով բշտիկնե՞ր են առաջանում․ Մալիշևան խոսել է ակնեի դեմ պայքարի 3 եղանակի մասին
