ԵՐԵՎԱՆ, 15 հունիսի- Sputnik. «Աերոֆլոտ» ավիաընկերության չվերթով Երևանից Ռուսաստան է մեկնել շուրջ 180 մարդ։ Տեղեկությունը հաղորդում է Հայաստանում ՌԴ դեսպանատան մամուլի ծառայությունը:
«Ռուսաստանի Դաշնության քաղաքացիներին հայրենիք վերադարձնելու աշխատանքների շրջանակներում, որն իրականացվում է Հայաստանում Ռուսաստանի Դաշնության դեսպանության կողմից ՝ Ռուսաստանի Դաշնության կառավարությանն առընթեր օպերատիվ շտաբի գլխավորությամբ, այսօր` հունիսի 15 - ին «Աերոֆլոտ» ընկերությունը կատարել է Երևան - Մոսկվա - Կազան-Մախաչկալա չվերթը: Այս չվերթով տուն են վերադարձել 179 ռուսաստանցիներ», - ասված է հաղորդագրության մեջ ։
Դեսպանության հյուպատոսական բաժնի դիվանագետները «Զվարթնոց» միջազգային օդանավակայանում համակարգել են ուղևորների գրանցման և նստեցման գործընթացը, ինչպես նաև քաղաքացիներին ցուցաբերել անհրաժեշտ աջակցություն: Տեղեկացվում է, որ ամեն ինչ իրականացվել է ՝ պահպանելով Հայաստանի պարետի հրապարակած անվտանգության բոլոր կանոնները։
Առաջիկայում ևս 4 չվերթ է նախատեսված Ռուսաստանի տարբեր քաղաքներից ու Մինսկից. մանրամասներ
Ընդհանուր առմամբ այս ընթացքում համալիր աշխատանքի շնորհիվ Հայաստանից դուրս է բերվել 1270 մարդ։ Ռուսաստանցիների վերադարձը տուն շարունակվում է ։
Նշենք, որ հունիսի 16-ին Սանկտ Պետերբուրգից Երևան չարթերային չվերթ կիրականացնի, որով հայրենիք կվերադառնան Հայաստանի ավելի քան 200 քաղաքացիներ:
