ԵՐԵՎԱՆ, 11 հունիսի - Sputnik. Կորոնավիրուսի դեմ պայքարը ցույց տվեց, որ ճգնաժամային իրավիճակներում իշխանությունը չի կարողանում կառավարել երկիրը։ Նման հայտարարություն արեց ԱԱԾ նախկին տնօրեն Արթուր Վանեցյանը՝ իր գլխավորած «Հայրենիք» կուսակցության գրասենյակի բացման ժամանակ։
Նրա խոսքով՝ աշխատանքից դուրս գալուց հետո իշխանությունները լծվել են իրեն մեկուսացնելու գործին։ Արդյունքում տարբեր «շինծու գործեր», մեղադրանքներ են փորձել կառուցել, սակայն, Վանեցյանի խոսքով, իր մասին տարածվող տեղեկություններից որևէ մեկն այդպես էլ չի հաստատվել։
Վանեցյանը նշեց, որ իր դեմ գտագործվել են այն «մանիպուլյատիվ գործիքները, որոնք այս իշխանությունները էֆեկտիվ կարողանում են օգտագործել և ժողովրդին մոլորեցնել»։
«Խնդիր էր դրվել, որ ինձ մեկուսացնեին գոնե երկու ամսով շինծու գործով։ Երկար քննարկումներ են եղել իրավապահ համակարգում, որից հետո հասկացել են, որ ոչինչ չեն կարողանում անել։ Այդ գաղափարից կարծես թե այս փուլում հետ են կանգնել, բայց դա ժամանակի հարց է, որովհետև այս իշխանություններից ամեն ինչ սպասելի է»,- նշեց նա՝ հավելելով, որ խիստ հսկողություն է սահմանվել իր հետ շփում ունեցող յուրաքանչյուրի հանդեպ։
«Կանգ առ, Նիկոլ». Վանեցյանը դիմել է Փաշինյանին
ԱԱԾ նախկին տնօրենի խոսքով՝ անգամ իր անչափահաս երեխաների հեռախոսն են գաղտնալսում։ Նա վստահ է՝ դա խոսում է իշխանությունների մեծ վախի մասին, քանի որ նրանք ժողովրդի աջակցությունն են կորցրել։
Վանեցյանը հայտարարեց, որ իրեն հնարավոր չէ վախեցնել ձերբակալություններով կամ այլ գործիքներով։
«Ես ընտրել եմ մի ճանապարհ և այդ ճանապարհից մի վայրկյան հետ չեմ կանգնելու։ Ունենալու ենք մի երկիր, որի մասին երազել ենք և պայքարել ենք։ ժամանակ չունենք, կյանքը գնում է»,- ասաց Վանեցյանը։
Հիշեցնենք՝ Վանեցյանը ԱԱԾ տնօրենի պաշտոնից ազատվել է 2019 թվականի սեպտեմբերին։ Նրա` պաշտոնից հեռանալը զուգորդվեց իր ու վարչապետ Նիկոլ Փաշինյանի «փոխհրաձգությամբ»։ Նա Փաշինյանին սթափության ու կանգառի կոչ արեց, իսկ Փաշինյանն ասաց, որ Վանեցյանն իր հայտարարություններով աղբարկղն է նետել սպայի ուսադիրները։
Որոշ ժամանակ անց Վանեցյանը հայտարարեց, որ երկրում նոր, հակաճգնաժամային կառավարության ձևավորման անհրաժեշտություն կա, որովհետև ներկայիս իշխանությունը չի կարողանում լուծել իր առաջ դրված խնդիրները։
2020 թվականի փետրվարին, արդեն, Վանեցյանը հայտարարեց, որ մտադիր է կուսակցություն ստեղծել։ Սկզբում նա հիմնադրեց «Հայրենիք» հիմնադրամը, որը պետք է զբաղվեր կրթության հարցերով, քաղաքացիների իրավաբանական խորհրդատվություններով, բայց աստիճանաբար պարզ դարձավ, որ հիմնադրամը վերածվելու է կուսակցության։
Մայիսի 30-ին էլ հայտնի դարձավ, որ Վանեցյանը «Հայրենիք» կուսակցության համագումարում կուսակցության նախագահ է ընտրվել։
«Նիկոլ Փաշինյանի հրաժարականն առաջինը ես եմ պահանջել». Վանեցյանը ՀՔԾ–ում էր
