ԵՐԵՎԱՆ, 3 հունիսի – Sputnik. 63 տարեկան հասակում այսօր կյանքից հեռացել է ՀՀ ԱԺ նախկին նախագահ, Բելառուսում Հայաստանի արտակարգ և լիազոր նախկին դեսպան Արմեն Խաչատրյանը։ Տեղեկությունը Sputnik Արմենիայի հետ զրույցում հաստատեց ՀՀ ԱԳՆ մամուլի խոսնակ Աննա Նաղդալյանը։
Խաչատրյանը երկար ժամանակ տառապում էր ծանր հիվանդությամբ։
Արմեն Խաչատրյանը ծնվել էր 1957թ. օգոստոսի 13–ին Երևանում։ 1978թ–ին ավարտել էր Խ.Աբովյանի անվան Երևանի մանկավարժական ինստիտուտի բանասիրական ֆակուլտետը։
1999թ–ին եղել է Ազգային ժողովի պատգամավոր, ԱԺ արտաքին հարաբերությունների մշտական հանձնաժողովի նախագահ, 1999 -2003թթ–ին` Ազգային ժողովի նախագահ, ՀՀ անվտանգության խորհրդի անդամ, ԱՊՀ մասնակից պետությունների միջխորհրդարանական վեհաժողովի խորհրդի անդամ։
2003-2010թթ–ին եղել է Ուկրաինայում ՀՀ արտակարգ և լիազոր դեսպանը, 2004-2016թթ–ին` Մոլդովայի Հանրապետությունում ՀՀ արտակարգ և լիազոր դեսպանը (նստավայրը` Կիև), 2010-2017թթ–ին` Բելառուսի Հանրապետությունում ՀՀ արտակարգ և լիազոր դեսպանը, ԱՊՀ կանոնադրական և այլ մարմիններում` ՀՀ մշտական լիազոր ներկայացուցիչը։
