ԵՐԵՎԱՆ, 28 ապրիլի – Sputnik. Պետական, քաղաքական կամ հասարակական գործիչների, այդ թվում և ՀՀ երրորդ նախագահ Սերժ Սարգսյանի հետ Ամենայն Հայոց Կաթողիկոսի հանդիպումների համար որևէ արգելք և սահմանափակում չկա։ Facebook սոցիալական ցանցի իր էջում նման գրառում է արել Մայր աթոռ Սուրբ Էջմիածնի տեղեկատվական համակարգի տնօրեն տեր Վահրամ քահանա Մելիքյանը` անդրադառնալով մամուլի հրապարակումներից մեկին։
«Ծանոթանալով NewArmenia.am կայքում հրապարակված «Սերժ Սարգսյանն ու կաթողիկոսը հանդիպել են. պայմանավորվել են համատեղել ուժերը» նյութին՝ ցանկանում եմ նշել հետևյալը` այդպիսի հանդիպումները կազմակերպվում են ըստ անհրաժեշտության։ Նման հանդիպումներ լինում են ըստ նպատակահարմարության՝ քննարկելու մեր երկրին ու ժողովրդին հուզող տարաբնույթ խնդիրներ»,–գրել է տեր Վահրամը։
Նրա խոսքով` պետք է ձերբազատվել այդպիսի հանդիպումներին արհեստական օրակարգեր վերագրելուց և դավադրություններ փնտրելուց։ Տեր Վահրամը վստահեցնում է` անհեթեթություն է մտածել, որ այդպիսի օրակարգով հանդիպում կարող էր լինել։
Հիշեցնենք` ապրիլի 14-ին հայտնի դարձավ, որ կաթողիկոսը կարևոր է համարում ՀՀ երկրորդ նախագահ Ռոբերտ Քոչարյանին կալանքից ազատելը։ Դրանից հետո աղմուկ բարձրացավ, քանի որ ոմանք ասում էին, թե կաթողիկոսը քաղաքական հայտարարություն է արել։ Մայր աթոռը հորդորեց չքաղաքականացնել Գարեգին Բ–ի հայտարարությունը։
