ԵՐԵՎԱՆ, 21 ապրիլի – Sputnik. ՀՀ վարչապետի աշխատակազմի ղեկավար Էդուարդ Աղաջանյանը կառավարության մամուլի կենտրոնում կայացած ասուլիսի ժամանակ ասաց, որ Ցեղասպանության ճանաչման և դատապարտման հետ կապված՝ հայտնի «Հիշում ենք և պահանջում» կարգախոսն այս տարի չի փոխվի, բայց կարգախոսի փոփխության թեմայի շուրջ քննարկումներն առաջիկայում կշարունակվեն:
«Քննարկում է եղել կարգախոսի հետ կապված, և որոշում է կայացվել, որ կարգախոսը չի փոխվի առնվազն այս պահին։ Նման որոշում կայացնելու, այսինքն` փոփոխության գնալու համար շատ ավելի խորը և համապարփակ քննարկում է պետք»,–ասաց Աղաջանյանը։
Արտաքին գործերի նախարար Զոհրաբ Մնացականյանն էլ ընդգծեց, որ կարգախոսը համահայկական է։ Նրա խոսքով` Հայոց ցեղասպանության ճանաչումն ու դատապարտումը մի քանի սերունդների և ամբողջ հայության միասնական գործն է, և այս առումով հսկայական գործ է արվել։
«Ապրիլի 23-ի ամենամյա ջահերով երթն այս տարի նույն ձևաչափով տեղի չի ունենա». Սաղաթելյան
Մնացականյանն ասաց նաև, որ անգամ արտակարգ դրության պայմաններում այս անգամ էլ հնարավորություն կունենանք լսելի դարձնել հայության ձայնը, որ ոճիրից 105 տարի անց էլ հայ ժողովուրդը շարունակում է պայքարել արդարության վերականգնման համար։ Հայոց ցեղասպանության ճանաչումը, ըստ Մնացականյանի, միայն ու միայն հայ ժողովրդին վերաբերող հարց չէ, այլ նաև կարևոր քայլ է ցեղասպանությունների կանխարգելման առումով։
«Մենք ունեցել ենք տարբեր պայմաններ, սակայն երբևէ չենք դանդաղեցրել մեր հարգանքը մատուցել նահատակների հանդեպ, ու մեր միասնական ձայնը հնչեցնել ցեղասպանությունների դեմ»,–ասաց նախարարը։
Սփյուռքի գործերի գլխավոր հանձնակատար Զարեհ Սինանյանն էլ հորդորեց բոլորին մասնակցել Ցեղասպանության 105-րդ տարելիցի միջոցառումներին տնից։ Նրա խոսքով` նույնիսկ կորոնավիրուսի պայմաններում մեր ձայնը չի լռելու, և շարունակելու ենք պահանջել արդարություն։
Հիշեցնենք, որ Հայոց ցեղասպանության զոհերի հուշահամալիրն ապրիլի 24-ին փակ կլինի։
Ապրիլի 24-ին, ժամը 08։00-ից սկսած` քաղաքացիները կարող են հաղորդագրություն ուղարկել 1915 կարճ համարին (Հայաստանից) և 0037433, 191500 հեռախոսահամարներին (արտասահմանից)` իրենց անվամբ հաստատելու հեռակա մասնակցությունը օրվա խորհրդին։
Ապագան հայերի համար հետաքրքիր ժամանակներ է խոստանում, կամ Դիրաբեքիրի ծպտյալների կյանքը
