ԵՐԵՎԱՆ, 21 ապրիլի — Sputnik. Մայր Աթոռ Սուրբ Էջմիածինը համաձայն չէ ՀՀ վարչապետ Նիկոլ Փաշինյանի` ապրիլի 20–ին հոգևորականության հասցեին հնչեցրած գնահատականների ու արտահայտված տեսակետների հետ, բայց այս պահին ձեռնպահ է մնում անդրադառնալ դրանց։ Այս մասին ասվում է Մայր Աթոռի այսօր տարածած հայտարարության մեջ։
«Այս օրերին, երբ մեր ժողովուրդը պատրաստվում է աղոթքով իր խոնարհումը բերելու Հայոց Ցեղասպանության սուրբ նահատակների հիշատակի առջև, Մայր Աթոռ Սուրբ Էջմիածինը, չհամաձայնելով հանդերձ տրված գնահատականներին ու արտահայտված տեսակետներին, այս պահին ձեռնպահ է մնում անդրադառնալ վերջիններիս»,–ասված է հայտարարության մեջ։
Նշվում է, որ Ցեղասպանության սուրբ նահատակների հիշատակի օրվա նախաշեմին Նորին Սրբություն Գարեգին Երկրորդ Ամենայն Հայոց կաթողիկոսի հայրական հորդորն է՝ զերծ մնալ հակառակություններից ու շահարկումներից և սիրո, համերաշխության ու միաբանության ոգով հայցել բարեխոսությունը մեր սուրբ նահատակների՝ ի նպաստ հայրենիքի զորացման, համազգային կյանքում առկա մարտահրավերների հաղթահարման և մեր ժողովրդի բարօրության։
«Հայ եկեղեցու դեմ ծրագրված պայքար մղելը ընդունելի չէ»․ Մեծի Տանն Կիլիկիո կաթողիկոսություն
Նշենք, որ երեկ` ապրիլի 20–ին, ՀՀ վարչապետ Նիկոլ Փաշինյանը` անդրադառնալով Հայաստանում հեղափոխությունից հիասթափվածներին նրանց մեջ նշել էր նաև հոգևորականությունը։ «Ինչքան Հայաստանում ընդգծվում է գաղափարական իշխանության գոյության փաստը, այնքան ավելի ակնհայտ է դառնում Հայաստանում հոգևոր կյանքի սակավությունը», - ասել էր նա։
Փաշինյանն ընդգծել էր, որ այսօր հոգևորականության գործունեության մեջ երբեմն քաղաքական ինտրիգներ են նկատվում։
