ԵՐԵՎԱՆ, 18 ապրիլի – Sputnik. ԱԺ-ի ապրիլյան պարգևավճարները կազմել են 35 064 525 դրամ: Տեղեկությունը Sputnik Արմենիային հայտնեցին ԱԺ աշխատակազմի ղեկավարի գրասենյակից:
Այդ գումարի շրջանակում պարգևատրումներ են ստացել ԱԺ 132 պատգամավորներն ու 544 աշխատակիցները:
«ԱԺ 544 աշխատակիցներ ԱԺ բյուջեի պարգևատրման ֆոնդից պարգևատրվել են ամսական դրույքաչափի մինչև 30%-ի չափով՝ համաձայն դեռս նախորդ տարի հայտարարված պետական կառավարման ոլորտում վարձատրությունների բարձրացման համընդհանուր քաղաքականության, ինչպես նաև 2020թ-ի պետական բյուջեի մասին ՀՀ օրենքի»,- նշված է Sputnik Արմենիայի հարցման պատասխանում:
Հիշեցնենք` երեկ ԱԺ նախագահ Արարատ Միրզոյանը լրագրողների հետ զրույցում չէր հերքել մամուլում տարածված լուրերն այն մասին, որ պատգամավորների մարտ ամսվա պարգևավճարը կորոնավիրուսի դեմ պայքարի ֆոնդին փոխանցելու իր որոշումը որոշ պատգամավորների մոտ դժգոհություն է առաջացրել:
«Մեկ- երկու դեպք կար, երբ մարդիկ արդեն իրենց միջոցներից փոխանցումներ էին արել, մինչև այդ որոշումը, մի քանի մարզերից ընտրված պատգամավորներ այնտեղ ինչ-որ գործունեություն են ծավալում և այլն: Մի քիչ դժվար էր, բայց ես այդ որոշումը կայացրի»,- ասել էր Միրզոյանը:
Ընդ որում` ԱԺ նախագահի այդ որոշումը վերաբերել էր բացառապես պատգամավորների պարգևավճարներին, ԱԺ–ի աշխատակազմի պարգևավճարները վճարվել են աշխատողներին, ինչպես մնացած ամիսներին:
Ապրիլ ամսվա պարգևավճարների մասին նման որոշում ԱԺ նախագահը չի կայացրել: Դրանք, ԱԺ նախագահի կարգադրությամբ, վճարվել են պատգամավորներին ու աշխատակիցներն:
Քաղաքապետարանը 30 միլիոն դրամի հասնող պարգևավճարներ է բաժանել. ովքե՞ր են երջանիկները